TITUS
Biblia Udica, Versio Nizhensis: Vetus Testamentum
Part No. 205
Previous part

Chapter: 75 

75-ǯi ω͑vel mä͑ġ
75-ci Ǐvel mə̌ğ



Farḳalxoy däsṭin kalaṭaynaḳ. Asafi "za efa" uḳala faren mä͑ġe͑ġala ω͑vel mä͑ġ.
Fark'alxoy dəst'in kalat'aynak'. Asafi "za efa" uk'ala faren mə̌ğěğala Ǐvel mə̌ğ.


Verse: 1    Šüküryanbsa yan Va, ay Buxaʒ́ux,
   Şüküryanbsa yan Va, ay Buxačux,
    Vi xožina tarakaloroxyan yan!
    Vi xojina tarakaloroxyan yan!
    Vi aḳesṭi möǯüzoġoṭun ǯar saḳsa amdarxon.
    Vi ak'est'i möcüzoğot'un car sak'sa amdarxon.

Verse: 2    Metäre pi Buxaʒ́uġon: "Iz vaxṭ eġaṭan,
   Metəre pi Buxačuğon: "İz vaxt' eğat'an,
    Bez täyinbi vädine aḳesṭoz Zu düzgün divanbsuni ḳä baksuna!
    Bez təyinbi vədine ak'est'oz Zu düzgün divanbsuni k'ə baksuna!

Verse: 3    Oćal iz ganuxun galḳale ṭe vädä,
   Oç̌al iz ganuxun galk'ale t'e vədə,
    Iz loxol bakalṭoġoval q̇ə͑yen haq̇ale,
    İz loxol bakalt'oğoval q'ı̌yen haq'ale,
    Ama šaaṭez osṭaarbe Zu šoṭay binorina!
    Ama şaat'ez ost'aarbe Zu şot'ay binorina!

Verse: 4    Ičoġoxun iräziṭoġo "vä͑x bitoṭuxun üsṭün ma biq̇anan",
   İçoğoxun irəzit'oğo "və̌x bitot'uxun üst'ün ma biq'anan",
    Šär bakalṭoġo "amdarxoy loxol q̇o͑q̇o͑zläyinšaksuna,
    Şər bakalt'oğo "amdarxoy loxol q'ǒq'ǒzləyinşaksuna,

Verse: 5    Göynuxun taysuna bosanan,
   Göynuxun taysuna bosanan,
    Bäsṗanan źomo buybi vä͑x tärifläyinšbsuna" pizu".
    Bəsp'anan ǰomo buybi və̌x tərifləyinşbsuna" pizu".

Verse: 6    Nä be͑ġ č̣eġala täräfäxun, nä be͑ġ batḳala täräfäxun,
   Nə běğ c'eğala tərəfəxun, nə běğ batk'ala tərəfəxun,
    Nääl čölexun bakalṭay kiyel tene iču alabsun.
    Nəəl çölexun bakalt'ay kiyel tene içu alabsun.

Verse: 7    Sayǯä Buxaʒ́uxe q̇ärar č̣evḳalo!
   Saycə Buxačuxe q'ərar c'evk'alo!
    Amdari bula ala efaloval, šoṭo saki oćalen sabaloval Šone!
    Amdari bula ala efaloval, şot'o saki oç̌alen sabaloval Şone!

Verse: 8    Aġu fi u͑ġe͑sṭale Q̣ONƷ́UĠON pisṭoġo,
   Ağu fi ǔğěst'ale Q'ONČUĞON pist'oğo,
    Šoṭoġoy bitoṭaynaḳ baḳale Iz kiyel bakala ǯazin ǯamaxun,
    Şot'oğoy bitot'aynak' bak'ale İz kiyel bakala cazin camaxun,
    Ṭe fine tumal c̣orobi u͑ġä͑lṭun šoṭoġon!
    T'e fine tumal s'orobi ǔğə̌lt'un şot'oğon!

Verse: 9    Zu isä hämišä moṭo bayanboz,
   Zu isə həmişə mot'o bayanboz,
    Iaḳovi Buxaʒ́uġo mä͑ġpi tärifläyinšoz!
    İak'ovi Buxačuğo mə̌ğpi tərifləyinşoz!

Verse: 10    Šoṭaynaḳ ki, metäre pi Šoṭin:
   Şot'aynak' ki, metəre pi Şot'in:
    "Pisṭoġoy mu͑q̇inä duġi sakoz Zu,
    "Pist'oğoy mǔq'inə duği sakoz Zu,
    Düzgünṭoġo isä mu͑q̇ä͑lä bi ičoġoy zora avuzboz".
    Düzgünt'oğo isə mǔq'ə̌lə bi içoğoy zora avuzboz".



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.