TITUS
Biblia Udica, Versio Nizhensis: Vetus Testamentum
Part No. 181
Previous part

Chapter: 51 

51-ǯi ω͑vel mä͑ġ
51-ci Ǐvel mə̌ğ



Mä͑ġḳalxoy kalaṭaynaḳ. Davidi ω͑vel mä͑ġ.
Mə̌ğk'alxoy kalat'aynak'. Davidi Ǐvel mə̌ğ.

Davidi günax äšṗesṭi Baṭ-Ševaxun ə͑śaluġbiṭuxun oša xavarečal Naṭani iz ṭo͑ġo͑l eġaṭan campi mä͑ġ. *
Davidi günax əşp'est'i Bat'-Şevaxun ı̌šaluğbit'uxun oşa xavareçal Nat'ani iz t'ǒğǒl eğat'an śampi mə̌ğ. *


Verse: 1    Vi nu badalbakala čuresuna aḳesṭi za baġəšlayinša, ay Buxaʒ́ux!
   Vi nu badalbakala çuresuna ak'est'i za bağışlayinşa, ay Buxačux!
    Vi üḳ boḳospsuna zaxun kammaba, bez günaxxo silba!
    Vi ük' bok'ospsuna zaxun kammaba, bez günaxxo silba!

Verse: 2    Bito bez taxsərxo oc̣ḳa taša,
   Bito bez taxsırxo os'k'a taşa,
    Za bezi günaxaxun tämizba.
    Za bezi günaxaxun təmizba.

Verse: 3    Vi äyitäxun č̣eysuna avazu,
   Vi əyitəxun c'eysuna avazu,
    Äšṗesṭi günaxi bə͑hiluġal q̇amišzu.
    Əşp'est'i günaxi bı̌hiluğal q'amişzu.

Verse: 4    Vi be͑śzu günaxkär, Vi ḳanunxoxun č̣eriz günax äšṗesṭi,
   Vi běšzu günaxkər, Vi k'anunxoxun c'eriz günax əşp'est'i,
    Vi piyes pis aḳeġala äšez biq̇i zu.
    Vi piyes pis ak'eğala əşez biq'i zu.
    Šoṭo göräl haq̇ galan divanbsa,
    Şot'o görəl haq' galan divanbsa,
    Düzgün q̇ärar č̣evḳalonu Hun!
    Düzgün q'ərar c'evk'alonu Hun!

Verse: 5    Axəri zu nanaxun bakaṭan ene günaxkärzuy,
   Axıri zu nanaxun bakat'an ene günaxkərzuy,
    Hälä nanay tapane bakaṭan bez günax zaxuney.
    Hələ nanay tapane bakat'an bez günax zaxuney.

Verse: 6    Ama Hun düzgünluġen qä͑ve͑sa amdarasṭa,
   Ama Hun düzgünluğen qə̌věsa amdarast'a,
    Vi müdrikluġaxun bez üḳeyal laxa Hun.
    Vi müdrikluğaxun bez ük'eyal laxa Hun.

Verse: 7    Za issoṗen * pakba, zuval pak bakaz,
   Za issop'en * pakba, zuval pak bakaz,
    Za oc̣ḳa, lap ə͑źaxunal mac̣i bakaz.
    Za os'k'a, lap ı̌ǰaxunal mas'i bakaz.

Verse: 8    Za mu͑qṭa, bez ćoya axśumda,
   Za mǔqt'a, bez ç̌oya axšumda,
    Barta Vi xä͑xä͑pi üḳ qayeceq̇an.
    Barta Vi xə̌xə̌pi ük' qayeśeq'an.

Verse: 9    Bez günaxxo baġəšlayinša,
   Bez günaxxo bağışlayinşa,
    Bito bez taxsərxo oc̣ḳa taša.
    Bito bez taxsırxo os'k'a taşa.

Verse: 10    Ay Buxaʒ́ux, za tämiz üḳ tada,
   Ay Buxačux, za təmiz ük' tada,
    Za täzäläyinša, barta Vi yaq̇en taġaz.
    Za təzələyinşa, barta Vi yaq'en tağaz.

Verse: 11    Za Vaxun ä͑xilmaba,
   Za Vaxun ə̌xilmaba,
    Vi tadi ω͑vel Urufa zaxun ma exṭa.
    Vi tadi Ǐvel Urufa zaxun ma ext'a.

Verse: 12    Vaxun eġala čarḳesuni mu͑qluġa za qayda,
   Vaxun eğala çark'esuni mǔqluğa za qayda,
    Za Vi äyiten taġala ba.
    Za Vi əyiten tağala ba.

Verse: 13    Ṭe vädä Vi äyitäxun č̣eġalṭoġo Vi yaq̇en taysuna zomboz,
   T'e vədə Vi əyitəxun c'eğalt'oğo Vi yaq'en taysuna zomboz,
    Günaxkärxoval Vač qaybakalṭun.
    Günaxkərxoval Vaç qaybakalt'un.

Verse: 14    Ay Buxaʒ́ux, ay za čarḳesṭes bakala Buxaʒ́ux,
   Ay Buxačux, ay za çark'est'es bakala Buxačux,
    Bez kiyel bakala ṗiya oc̣ḳa,
    Bez kiyel bakala p'iya os'k'a,
    Barta bez muzen Vi düzgünluġaxunq̇an äyitṗi.
    Barta bez muzen Vi düzgünluğaxunq'an əyitp'i.

Verse: 15    Bez muza qaypa, ay Q̣onʒ́ux,
   Bez muza qaypa, ay Q'ončux,
    Barta bez źomoxun Vaynaḳ tärifq̇an bari.
    Barta bez ǰomoxun Vaynak' tərifq'an bari.

Verse: 16    Vi zaxun čureġalo q̇urban ešṭun bakiyniy, ezčoy,
   Vi zaxun çureğalo q'urban eşt'un bakiyniy, ezçoy,
    Ama boḳospsuni q̇urbanen iräzibala šey tene Va!
    Ama bok'ospsuni q'urbanen irəzibala şey tene Va!

Verse: 17    Va čalxsun, Vi čureġalṭoġo bsun - mone äsil q̇urban!
   Va çalxsun, Vi çureğalt'oğo bsun - mone əsil q'urban!
    Moṭo q̇amišaki q̇abulbalṭu Hun Vaxun ä͑xiltenbon, ay Buxaʒ́ux.
    Mot'o q'amişaki q'abulbalt'u Hun Vaxun ə̌xiltenbon, ay Buxačux.

Verse: 18    Vi üḳ boḳospsuna aḳesṭi Sioneynaḳ * šaaṭluġ ba,
   Vi ük' bok'ospsuna ak'est'i Sioneynak' * şaat'luğ ba,
    Yerusalimi härrämine bakala q̇alina täzädän biq̇a.
    Yerusalimi hərrəmine bakala q'alina təzədən biq'a.

Verse: 19    Ṭe vädä bütüm me ečala q̇urbanxon Va iräzibale,
   T'e vədə bütüm me eçala q'urbanxon Va irəzibale,
    Dirisṭ boḳospseynaḳ śameġala q̇urbanxo Vi piyes šaaṭ aḳeġale,
    Dirist' bok'ospseynak' šameğala q'urbanxo Vi piyes şaat' ak'eğale,
    Ṭe vädä Vi q̇urban ečala gala araḳxoval ečalṭun.
    T'e vədə Vi q'urban eçala gala arak'xoval eçalt'un.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.