TITUS
Biblia Udica, Versio Nizhensis: Vetus Testamentum
Part No. 180
Previous part

Chapter: 50 

50-ǯi ω͑vel mä͑ġ
50-ci Ǐvel mə̌ğ



Asafi ω͑vel mä͑ġ.
Asafi Ǐvel mə̌ğ.


Verse: 1    Mone, Bitova Bašarbala Buxaʒ́uġon, Q̣ONƷ́UĠON Iz äyitä upseynaḳ azuḳxone ḳale,
   Mone, Bitova Başarbala Buxačuğon, Q'ONČUĞON İz əyitə upseynak' azuk'xone k'ale,
    Dünyäni sa belxun ṭe soġo bel ciriḳ ḳä azuḳ bunesa ḳalpi girebsa.
    Dünyəni sa belxun t'e soğo bel śirik' k'ə azuk' bunesa k'alpi girebsa.

Verse: 2    Sionaxune * Šoṭin yaynaḳ Iz išiġ sakala kalaluġa aḳesṭa,
   Sionaxune * Şot'in yaynak' İz işiğ sakala kalaluğa ak'est'a,
    Izi gözälluġaxun ene šuḳḳalasṭa nu bakala Sionaxun!
    İzi gözəlluğaxun ene şuk'k'alast'a nu bakala Sionaxun!

Verse: 3    Enesa beš Buxaʒ́ux, ama šip čurpseynaḳ tene eysa!
   Enesa beş Buxačux, ama şip çurpseynak' tene eysa!
    Boḳosṗi ciḳala arux ḳinäḳ,
    Bok'osp'i śik'ala arux k'inək',
    E͑qeci tufan ḳinäḳe eysa!
    Üqeśi tufan k'inək'e eysa!

Verse: 4    Iz azuḳa divanbale Šoṭin,
   İz azuk'a divanbale Şot'in,
    Göyurxo q̇a oćalal šahid bakseynaḳe ḳale.
    Göyurxo q'a oç̌alal şahid bakseynak'e k'ale.

Verse: 5    "Girbanan Bez yaq̇en taġalṭoġo bitova,
   "Girbanan Bez yaq'en tağalt'oğo bitova,
    Q̣urban śampi Zaxun iräziluġ ġaćeciṭoġo Bez ṭo͑ġo͑l ečanan" nexe.
    Q'urban šampi Zaxun irəziluğ ğaç̌eśit'oğo Bez t'ǒğǒl eçanan" nexe.

Verse: 6    Mone, göyurxoval Buxaʒ́ux Ič divanbal bakala äšlä šahidluġ balorox,
   Mone, göyurxoval Buxačux İç divanbal bakala əşlə şahidluğ balorox,
    Šoṭay düzgünluġa bayanbaloroxe baksa!
    Şot'ay düzgünluğa bayanbaloroxe baksa!

Verse: 7    "Ibaka, ay Bez azuḳ, Zuz äyite!
   "İbaka, ay Bez azuk', Zuz əyite!
    Mone, vi taxsərkär baksuna ćoyel č̣evḳalo bakoz, ay Israilluyox,
    Mone, vi taxsırkər baksuna ç̌oyel c'evk'alo bakoz, ay İsrailluyox,
    Šoṭo görä ki, Buxaʒ́uxzu, vi Buxaʒ́ux Zuzu.
    Şot'o görə ki, Buxačuxzu, vi Buxačux Zuzu.

Verse: 8    Ef taxsərxo q̇urban ešṭunxosṭa tez aḳal,
   Ef taxsırxo q'urban eşt'unxost'a tez ak'al,
    Boḳospsuni q̇urbanxon Za iräzibsaxun tez äyite häysä Zu.
    Bok'ospsuni q'urbanxon Za irəzibsaxun tez əyite həysə Zu.

Verse: 9    Ef aġəlxo bakala öküzxoxun,
   Ef ağılxo bakala öküzxoxun,
    Sürünä bakala kečiġoxun tez äyite.
    Sürünə bakala keçiğoxun tez əyite.

Verse: 10    Axəri č̣äläye bakala bito heyvanxo Izi Bakalṭaynaḳ,
   Axıri c'ələye bakala bito heyvanxo İzi Bakalt'aynak',
    Hazarxon buruxmoġo bakala sürüyox Iz exṭiyäre Bakalṭaynaḳ mo hiḳḳale!
    Hazarxon buruxmoğo bakala sürüyox İz ext'iyəre Bakalt'aynak' mo hik'k'ale!

Verse: 11    Buruxmoġo bakala bito q̇ušurxoz soġo-soġo čalxsa,
   Buruxmoğo bakala bito q'uşurxoz soğo-soğo çalxsa,
    Čöle bakala heyvanxoy bitone Bez kiin oq̇a.
    Çöle bakala heyvanxoy bitone Bez kiin oq'a.

Verse: 12    Zu busa bakayiz va pi ḳä booz?
   Zu busa bakayiz va pi k'ə booz?
    Dünyäl, dünyäne bakaloroxal Bezi baksunen va heṭu görä uḳaz?
    Dünyəl, dünyəne bakaloroxal Bezi baksunen va het'u görə uk'az?

Verse: 13    Zu nä öküzi yeq̇ ukalo tezu,
   Zu nə öküzi yeq' ukalo tezu,
    Nääl kečin ṗi u͑ġä͑lo."
    Nəəl keçin p'i ǔğə̌lo."

Verse: 14    Buxaʒ́uġo šükürbsun bakale vi Šoṭaynaḳ ečala q̇urban,
   Buxačuğo şükürbsun bakale vi Şot'aynak' eçala q'urban,
    Vi niyätṗi tadi äyiti loxol čurpsuna aḳesṭa Ala Arciṭu!
    Vi niyətp'i tadi əyiti loxol çurpsuna ak'est'a Ala Arśit'u!

Verse: 15    "Vi ṭar ġine Za ḳalpa, Zuval va čarḳesṭoz,
   "Vi t'ar ğine Za k'alpa, Zuval va çark'est'oz,
    Metär, Bez c̣iya alabalo bakalnu hun."
    Metər, Bez s'iya alabalo bakalnu hun."

Verse: 16    Buxaʒ́uġon pisṭoġo metär uḳale:
   Buxačuğon pist'oğo metər uk'ale:
    "Hun mani ćoyenen Bez ḳanunxoxun äyitṗes baksa?
    "Hun mani ç̌oyenen Bez k'anunxoxun əyitp'es baksa?
    Bezi azuḳaxun ġaćeci iräziluġa hetären vi muzel ečes baksa?
    Bezi azuk'axun ğaç̌eśi irəziluğa hetəren vi muzel eçes baksa?

Verse: 17    Bezi tadi näsyätxo nifrätenbsa hun,
   Bezi tadi nəsyətxo nifrətenbsa hun,
    Bezi piyorox vi sa u͑mu͑ġoxun baci ṭe soġo u͑mu͑ġoxun č̣enesa.
    Bezi piyorox vi sa ǔmǔğoxun baśi t'e soğo ǔmǔğoxun c'enesa.

Verse: 18    Sa oġri aḳala bakayin gärenbaksa šoṭo,
   Sa oğri ak'ala bakayin gərenbaksa şot'o,
    Yaq̇nuxun č̣eriṭoġoxun dosṭluġenbsa.
    Yaq'nuxun c'erit'oğoxun dost'luğenbsa.

Verse: 19    Vi źomoxun šäre barsṭa,
   Vi ǰomoxun şəre barst'a,
    Muzexun äfči äyitmuxe č̣eysa.
    Muzexun əfçi əyitmuxe c'eysa.

Verse: 20    Vi vičey ćoyelen čure äfčidän hun,
   Vi viçey ç̌oyelen çure əfçidən hun,
    Sa nanay tapanexun č̣eri doġma vičey loxol šären bosṭa!
    Sa nanay tapanexun c'eri doğma viçey loxol şəren bost'a!

Verse: 21    Hun me äšurxo biq̇aṭan
   Hun me əşurxo biq'at'an
    Bezi šiṗ čurpsunaxun ṭetären q̇amišaki ki, Zuval vallariḳzu.
    Bezi şip' çurpsunaxun t'etəren q'amişaki ki, Zuval vallarik'zu.
    Ama tää! Mone, vi hetär baksuna ćoyel č̣evḳoz,
    Ama təə! Mone, vi hetər baksuna ç̌oyel c'evk'oz,
    Vi taxsərxo bitova č̣epi ciḳoz!
    Vi taxsırxo bitova c'epi śik'oz!

Verse: 22    Mone, bito me piṭoġo ef eyex efanan, ay Buxaʒ́uġo eyexun č̣evḳiyorox!
   Mone, bito me pit'oğo ef eyex efanan, ay Buxačuğo eyexun c'evk'iyorox!
    Tene, vä͑x ḳoṭor-ḳoṭor booz,
    Tene, və̌x k'ot'or-k'ot'or booz,
    Šuḳḳalen vä͑x bez kiyexun haq̇esal tene bakal.
    Şuk'k'alen və̌x bez kiyexun haq'esal tene bakal.

Verse: 23    Buxaʒ́uġo šükürbsune efi Za čalxsuna aḳesṭala q̇urban,
   Buxačuğo şükürbsune efi Za çalxsuna ak'est'ala q'urban,
    Düz yaq̇en taġalṭin Zaxun eġala čarḳesuna aḳale!"
    Düz yaq'en tağalt'in Zaxun eğala çark'esuna ak'ale!"



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.