)
)
Q̣ONƷ́UĠON Moiseya ämirbi ḳinäḳ göyin, mumuśaḳi saal tünd ć̣oć̣a irängen ṭuriġon ə͑vel gala q̇ulluġbseynaḳ be͑yinśxoynaḳ q̇a Aaroneynaḳ ə͑vel paltarxoṭun e͑bi.
Samǯi be͑yinśi döšlinä q̇əzəlaxun, göyin, mumuśaḳi, tünd ć̣oć̣a irängen ṭuriġon saal näziḳ kätani parčinaxunṭun düzbi.
Moṭaynaḳ q̇əzəla ṭapi ṭä͑ṗä͑ḳṗi šoṭoġoxun ṭuriṭun ḳac̣ṗi. Oša ṭe ṭuriġoxun q̇a göyin, mumuśaḳi saal tünd ć̣oć̣a irängen bakala ṭuriġon näziḳ kätani parčin loxol naxəšxoṭun č̣evḳi.
Oša ṭe döšlin ṗä͑ ṭo͑ġä sun-sunaxun ġaćbseynaḳ ä͑mnäbelxun taġala ṗä͑ dänä parčaṭun düzbi.
Šoṭay loxol bakala q̇əzəli, göyin, mumuśaḳi saal tünd ć̣oć̣a irängen ṭuriġon q̇a näziḳ kätani parčinen ä͑leci q̇ayinš šoṭoxun saney. Q̣ONƷ́UĠON Moiseya ämirbi ḳinäḳäl baneki.
Šoṭoġon oniksi źe͑yurxoval q̇əzəli čärčüvoġoy boš laxi šoṭoġoy loxol Israili ġarmoġoy c̣iyurxo pečat düzbaṭan ṭaṗḳala ḳinäḳ ṭapi camṭunpi.
Oša šoṭoġo döšlin ä͑mnäbelxun taġala parčoġoy loxol osṭaarṭunbi ki, morox israilluġo eyex efseynaḳ bakala źe͑yurxoq̇an baki. Q̣ONƷ́UĠON Moiseya ämirbi ḳinäḳäl baneki.
Suruḳ ǯuyal döšli ḳinäḳ q̇əzəli, göyin, mumuśaḳi, tünd ć̣oć̣a irängen ṭuriġon saal näziḳ kätani parčinen düzbi iz loxol naxəšxoṭun laxi.
Suruḳ ǯu ṗä͑q̇at parčinen, biṗdönbäläney: iz boxoyluġ q̇a gengluġ sa ǯiney. *
Iz loox biṗ ǯörgä toyexlu źe͑yurxoṭun ṭaḳṗi: samǯi ǯörginä rubin, topaz, izumrud;
ṗä͑mǯi ǯörginä birüzä, göyin rubin saal almaz;
xibimǯi ǯörginä giacinṭ, agaṭ saal ameṭisṭ;
biṗimǯi ǯörginä isä beril, oniks saal yasṗis. Me źe͑yurxo q̇əzəli čärčüvoġone laxecey.
Šorox Israili ġarmoġoy saya görä ṗac̣c̣e dänäney. P̣ac̣c̣e tayfin här sunṭay c̣i me źe͑yurxoy loxol pečat ḳinäḳ ṭaṗeceney.
Suruḳ ǯuyeynaḳ tämiz q̇əzəlaxun kändür ḳinäḳ ä͑leci zinǯirxoṭun düzbi.
Q̣əzəlaxun ṗä͑ dänä čärčüvä saal ṗä͑ dänä halq̇aṭun düzbi. Oša me halq̇oġo suruḳ ǯuye ṗä͑ ṭo͑ġä͑xun \ biq̇esṭi
ṭe ṗä͑ q̇əzəli zinǯirä suruḳ ǯuye ṗä͑ halq̇inaxun lavṭunḳi.
Zinǯirxoy ṭe soġo bulurxo isä suruḳ ǯuye ä͑mnäbel bakala parčin be͑śin täräf bakala čärčüvoġoxunṭun osṭaarbi.
Saal ṗä͑ dänä q̇əzəli halq̇aṭun düzbi, šoṭoġoval suruḳ ǯuye ṗä͑ ṭo͑ġäxun samǯi be͑yinśi döšliyäxun sagala bonaxun biq̇esṭundi.
Q̣eräz ṗä͑ q̇əzəli halq̇al düzṭunbi, šoṭoġo samǯi be͑yinśi döšlin ä͑mnäbelxun taġala parčin be͑śin täräf, oq̇a, döšlin q̇ayinšaxun ġaćeġala galaṭun osṭaarbi.
Suruḳ ǯuye halq̇oġo q̇a döšlin halq̇oġo göyin irängen bakala baġen ṭetärṭun ġaćṗi ki, ǯu döšlin q̇ayinši oq̇aq̇an mandi. Q̣ONƷ́UĠON Moiseya ämirbi ḳinäḳäl baneki
)
)
Samǯi be͑yinśi döšlin oq̇axun bakala paltara göyin irängen parčinaxunṭun e͑bi.
Bə͑yexun bul č̣ovakseynaḳ gaṭun efi. Šoṭay ṭo͑ġu͑rxo nu zəġbakseynaḳ ṭurinen ä͑lṭundi.
Ṭe paltari ätäyi härrämine göyin, mumuśaḳi, tünd ć̣oć̣a irängen ṭuriġon saal näziḳ kätani parčinen mic̣iḳ ä͑lä͑mxoṭun düzbi.
Tämiz q̇əzəlaxun mic̣iḳ zängürxoval düzbi me ä͑lä͑mxoy arane e͑ṭunbi.
Metärluġen, ə͑vel gala q̇ulluġbseynaḳ bakala me paltari ätäyi härrämine ä͑lä͑mxo q̇a zängürxo sunay bać̣anexune ṭaḳecey. Q̣ONƷ́UĠON Moiseya ämirbi ḳinäḳäl baneki.
Aaroneynaḳ q̇a iz ġarmoġoynaḳ näziḳ kätani parčinaxun guratxoṭun e͑bi.
Oša kätani parčinaxun čalmoox, papaq̇xo saal qo͑lo͑ġxo,
göyin, mumuśaḳi saal tünd ć̣oć̣a irängen bakala ṭuriġon q̇a näziḳ kätani parčinaxun q̇ayinšal e͑bi iz loxol naxəšxoṭun laxi. Q̣ONƷ́UĠON Moiseya ämirbi ḳinäḳäl baneki.
Tämiz q̇əzəlaxun ə͑velluġi taǯ bakala sa medalyon düzbi šoṭay loxol "Q̣ONƷ́UĠOYNAḲ ə͑vel baki" cama pečati loxol ṭaṗḳala ḳinäḳ ṭapi camṭunpi.
Oša šoṭo čalminaxun osṭaarbseynaḳ iz loxol göyin baġṭun laxi. Q̣ONƷ́UĠON Moiseya ämirbi ḳinäḳäl baneki.
)
)
Metärluġen, ə͑vel čadəreynaḳ, yäni iräziluġi čadəreynaḳ bakala bütüm äšurxo čareḳi. Q̣ONƷ́UĠON Moiseya hetär ämirbeneysa, israilluġon me äšä ṭetäräl biṭun.
Oša ə͑vel čadəreynaḳ düzbi bütüm šeyurxo Moiseyi be͑śṭun ečeri: pärdoġo, halq̇oġo, čärčüvoġo, sütünxo, sütünxoy laxala ganxo, pešṭuvanxo,
ć̣oć̣a iräng duġeci eġeli ṭolen düzbaki pärdinä, q̇eräz näziḳ ṭolen düzbaki pärdinä, ə͑vel ganu än ə͑vel ganuxun ǯöybala \ pärdinä,
iräziluġi sanduġa saal šoṭay duruṭxo, baġəšlayinšbsuni q̇apaġa,
isṭola saal šoṭay loxol laxala q̇av-q̇aǯaġa, Q̣ONƷ́UĠO häsrbakala śuma,
tämiz q̇əzəlaxun bakala pisosa q̇a iz čiraġxo saal č̣äyinä,
q̇əzəlaxun bakala q̇urban ečala ganu, lä͑ä͑msṭeynaḳ bakala č̣äyinä, adeġala buxura, čadəri baġala ganeynaḳ bakala pärdinä,
misnä q̇urban ečala ganu, šoṭaynaḳ bakala misnä rešoṭḳina, šoṭay duruṭxo saal šoṭay bütüm lazəm bakala šeyurxo, läänä saal šoṭay laxala ganu,
määlin pärdoġo, sütünxo q̇a šoṭoġoy laxala ganxo, määlin baġala ganeynaḳ bakala pärdinä saal šoṭay kändürxo q̇a mixčoġo. Morox bito ə͑vel čadəra, yäni iräziluġi čadəri boš q̇ulluġbseynaḳ bakala šeyurxoney.
ω͑vel gala q̇ulluġbseynaḳ bakala ə͑vel paltarxo - be͑yinś Aaroni saal iz ġarmoġoy be͑yinśluġbseynaḳ e͑beci paltarxoval eṭunčeri.
Q̣ONƷ́UĠON Moiseya hetär ämirbeneysa, israilluġon haṭetäräl beṭuniy.
Moiseyenal moṭoġo bitova iz piyexun č̣ovakesṭi aneḳi ki, šoṭoġon bütümä Q̣ONƷ́UĠON ämirbi ḳinäḳṭun be. Šoṭo göräl Moiseyen me äšurxo bi amdarxo xeyir-bäräkäte tadi.
