Sa amdaren öküz nääl eġel bašq̇i śamḳayin nääl toydayin, barta ṭe amdaren sa öküzi gala qo öküz, sa eġeli gala biṗ eġel tadi zärälä ödäyinšeq̇an.
Ägär üše oġri sunṭay ḳoya baġaṭan šoṭo biq̇i besṗayṭun, besṗiyo taxsərsuze.
Ama ägär oġrina be͑ġ č̣eriṭuxun ošaṭun besṗesa, besṗiyo taxsərkäre. Oġrinen isä zärälä ḳožin q̇onʒ́uġo müṭläḳ ödäyinšalane. Ama ägär oġrin ödäyinšala hiḳḳal teṭux busa, šoṭo ičuq̇aṭun ḳul ḳinäḳ toydi.
Ägär bašq̇eci heyvan - čuresa öküz, čuresa elem, čuresa eġel-keči - oġrin kiyel dirisṭ bä͑ġä͑yeġayin, oġrinen ṗurumal zärälä ṗä͑q̇at ödäyinšalane.
Ägär šinesa iz beliġo iz oćala otarišbsa č̣evḳaṭan beliġon q̇erṭay oćala nääl ṭulluġa zäräl tadayin, šoṭin iz oćali nääl ṭulluġi än šaaṭ mähsuli hama äväz tadalane.
Ägär šinesa bäč̣üḳṭi aruġon cacluġa č̣ovaki ošal yoqurxo, äkinä nääl q̇oruġa bitova äfčibayin, aruġo bäč̣üḳṭi amdaren zärälä ödäyinšalane.
Ägär sa amdara efseynaḳ tadi gümüš nääl q̇eräz šeymux šoṭay ḳoyaxun bašq̇eġayin, oġriyal bä͑ġä͑yeġayin, oġrinen zärälä ṗä͑q̇at ödäyinšalane.
Ama ägär oġri nu bä͑ġä͑yeġayin, ḳožin q̇onʒ́uġon Buxaʒ́uġo bul ḳoc̣bala gala taci täsṭiġbeq̇an ki, ṭe amdari amanata tene bašq̇e.
Här aći sa šeya - čuresa öküzä, čuresa elema, čuresa eġel-kečinä, čuresa paltara "mo bezine" uḳala ṗä͑ täräfenal ičoġoy bala davalu äšä Buxaʒ́uġo bul ḳoc̣bala gala ečalane. Ṭiya bakala divanbalxon haq̇suz č̣evḳala amdarenal ṭe sunṭu zärälä ṗä͑q̇atq̇an ödäyinši.
Ägär sa amdara efseynaḳ tadeci elem, öküz, eġel-keči nääl q̇eräz sa heyvan oša šuḳḳalen iz piin aḳinuṭ murdarbakayin, yaralayinšakayin nääl \ düšmänxon šoṭo tašayṭun,
barta ṭe amdaren Q̣ONƷ́UĠOY c̣iyen elasṗeq̇an ki, šoṭin q̇erṭay amanata tene galde. Barta heyvani q̇onʒ́uġonal moṭo q̇abulbeq̇an, efala amdaren isä šoṭo lafṭi zärälä maq̇an ödäyinši.
Ama ägär heyvan bašq̇ecenesa, šoṭo efala amdaren heyvani q̇onʒ́uġo lafṭi zärälä ödäyinšeq̇an.
Ägär heyvana ä͑qnä heyvanen carpenesa, šoṭo efala amdaren careci heyvana subut ḳinäḳ iz q̇onʒ́uġoy ṭo͑ġo͑lq̇an ečeri, zäräläl maq̇an ödäyinši.
Ägär sa amdaren borǯ exṭi heyvan šoṭo qaydi qoš tadamin yaralayinšakayin nääl murdarbakayin, barta ṭe amdaren heyvani q̇onʒ́uġo lafṭi zärälä ödäyinšeq̇an.
Ama ägär me äš heyvani q̇onʒ́ux iz ṭo͑o͑x bakala vädinene bakesa, q̇onʒ́uġo lafṭi zäräl nu ödäyinšakalane. Heyvan tänginene tadecesa, q̇onʒ́uġon iz tänginä haq̇alane.
Sa amdaren ärgän sa xuyärä feretṭi šoṭoxun ə͑śaluġbayin, ṭe xuyäri hävginä yaq̇abi šoṭoval ičeynaḳ čuux balane.
Ägär xuyäri bavan šoṭo ṭe amdara išq̇ara tasṭuna nuval iräzi bakayin, ṭe amdaren häläl ärgän xuyäri hävgin toya šoṭay bava ödäyinšalane. *
Ǯadubala čuġo besṗanan. *
Heyvanxoxun ə͑śaluġbalṭuval dirisṭ ma efanan. *
Q̣ONƷ́UĠOXUN bašq̇a q̇eräz buxaʒ́uxxo q̇urban ečala amdar äfčibakalane. *
Q̣ärib amdara nä haq̇suzluġ, nääl zülüm ma banan, axəri vä͑nal Misiri ölkinä q̇äribnan bake.
Süpür čuġo nääl yetimä äzyät ma tadanan. *
Ägär šoṭoġoxun sunṭu äzyät tadaynan šoṭin Za šivanbi xoyinśbale, Zuval müṭläḳ šoṭay xoyinśa ibakoz.
Bezi äǯuġon biq̇i vä͑x q̇ələnǯen besṗesṭoz. Ef čupuxxo süpür, äylux isä yetim mandalṭun.
Efi arane yäšäyinšala, Beziyal azuḳaxun bakala sa käsibä tängä borǯ tadaynan, šoṭoxun fayiz ma čurekinan. *
Ägär šoṭay xälätänän girov exsṭasa, be͑ġ batḳamin šoṭo qayda.
Šoṭaynaḳ ki, ṭe amdari me paltaraxun bašq̇a iz loxolxun buṭḳala hiḳḳal teṭux bu. Axəri xälätä nu qaydaynan, ṭe amdaren basḳaṭan heṭina iz loxolxun buṭḳon? Šoṭin Za šivanbi xoyinśebon, Zuval šoṭay šivana izbakon, šoṭaynaḳ ki, Zu üḳ \ boḳosṗalzu. *
Buxaʒ́uġoy barada pis äyit ma äyitṗanan, ef azuḳi kalaluġbalal ma läänätbanan. *
Ef ambarxoy q̇a ṭoṗiġoy boš bakalṭoġoxun Zaynaḳ bakala paya kam ma banan. \ Ef süfṭin ġarmoġo Za häsrbanan.
Ef beliġoy q̇a eġel-kečin süfṭin baloġoval hametär banan: vu͑ġ ġi šoṭoġo ičoġoy nanoġoxun sagala efanan, muġumǯi ġine isä šoṭoġo Za tadanan.
Vä͑n Za häsrbaki ə͑vel azuḳnan, koṭo göräl ä͑qnä heyvanen čöle carpi heyvani yeq̇a ma ukanan, šoṭo xä͑yoġo tadanan. *
