იხილეთ, რაბამი სიყუარული მომცა ჩუენ მამამან, რაჲთა შვილ ღმრთისა ვიწოდნეთ. ამისთჳს სოფელმან არა გჳცნოს ჩუენ, რამეთუ არცა იგი იცნეს.
საყუარელნო, აწ შვილნი ღმრთისანი ვართ და არღა გამოჩინებულ არს, რაჲ ყოფად არს. ესე ვიცით, რამეთუ რაჟამს გამოცხადნეს, მსგავს მისა ვიყუნეთ, რამეთუ ვიხილეთ იგი, ვითარცა-იგი არს.
და ყოველსა, რომელსა აქუნდეს სასოვებაჲ ესე მისა მიმართ, განიწმიდოს თავი თჳსი, ვითარცა-იგი წმიდა არს.
ყოველმან, რომელმან ქმნეს ცოდვაჲ, მან უშჩულოებაჲცა ქმნეს და ცოდვაჲ იგი არს უშჩულოებაჲ.
და იცით, რამეთუ იგი გამოჩნდა, რაჲთა ცოდვანი ჩუენნი აჴოცნეს და ცოდვაჲ მის თანა არა არს.
ყოველი რომელი მის თანა ეგოს, მან არა ცოდოს; ყოველი რომელი ცოდვიდეს, მას არა უხილავს იგი, არცა იცის იგი.
ძმანო, ნუმცა ვინ გაცთუნებს თქუენ. რომელმან ქმნეს სიმართლჱ, იგი მართალ არს.
რომელმან ქმნეს ცოდვაჲ, იგი ეშმაკისაგანი არს, რამეთუ დასაბამითგან ეშმაკი ცოდავს. ამისთჳს გამოცხადნა ძჱ ღმრთისაჲ, რაჲთა დაარღჳნეს საქმენი ეშმაკისანი.
ყოველი რომელი შობილ არს ღმრთისაგან, მან ცოდვაჲ არა ქმნეს ...
