რომელი იყო პირველითგან, რომელი გუესმა და ვიხილეთ თუალითა ჩუენითა, რომელი ვიხილეთ და ჴელნი ჩუენნი ჰმსახურებდეს სიტყუასა მას ცხორებისასა.
და ცხორებაჲ იგი გამოცხადნა და რომელი-იგი ვიხილეთ, გიწამებთ თქუენ ცხორებასა მას საუკუნესა, რომელი იყო მამისა თანა და გამოგჳჩნდა ჩუენ;
და რომელი ვიხილეთ, ვწამებთ და გითხრობთ თქუენ, რაჲთა თქუენცა ზიარებაჲ გაქუნდეს ჩუენ თანა და ზიარებაჲ ჩუენი მამისა თანა და ძისა მისისა იესუ ქრისტჱსსა.
და ამას მივსწერ თქუენდა, რაჲთა სიხარული იგი ჩუენი იყოს სავსე.
და ესე არს აღთქუმაჲ, რომელი გუესმა მისგან და გითხრობ თქუენ, რამეთუ უფალი ნათელ არს, და ბნელი მის თანა არა არს არცა ერთ.
უკუეთუ ვთქუათ, ვითარმედ ზიარებაჲ გუაქუს მის თანა და ჩუენ ბნელსა შინა ვიდოდით, ვტყუვით და არა ვჰყოფთ ჭეშმარიტებასა.
უკუეთუ ნათელსა შინა ვიდოდით, ვითარცა-იგი ნათელსა შინა არს, ზიარებაჲ გუაქუს ურთიერთას. და სისხლი იგი იესუჲს, ძისა მისისაჲ, განგუწმედს ჩუენ ყოვლისაგან ცოდვისა.
