Page of ms. P: _ Page of ms. L: 533V ჭეშმარიტსა ვიტყუი ქრისტეს მიერ და არა ვტყუი თანამოწამებითა ღმრთისაჲთა,
რამეთუ მწუხარება არს ჩემდა დიდი და მოუკლებელი სალმობაჲ გულისა ჩემისაჲ;
ვილოცევდ შეჩუენებულს-ყოფად თავსა ჩემსა ქრისტესგან, ძმათათუის და ნათესავთა ჩემთა ჴორციელად,
რომელმან-იგი არიან ისრაიტელ, რომელთაჲ იყო შვილებაჲ და დიდებაჲ, აღთქმანი და შჯულისდებანი და მსახურებანი და ხარებანი;
რომელთანი Page of ms. L: 534R იყვნეს მამანი, რომელთაგან ქრისტე ჴორციელად გამოჩნდა, რომელ-იგი არს ღმერთი ყოველთა ზედა, კურთხეულ უკუნისამდე, ამენ.
Page of ms. L: _ Page of ms. P: 358R უკუეთუმცა უნდა ღმერთსა ჩუენებად რისხვაჲ მისი, რომელი დაუთმენიეს მრავლითა სულგრძელებითა ჭურთა მათ ზედა რისხვისათა, განმზადებულთა წარსაწყმედელად,
და რაჲთა აჩუენოს სიმდიდრჱ იგი დიდებისა მისისაჲ ჭურთა მათ ზედა წყალობისათა, რომელნი-იგი წინაჲსწარ განმზადნა სადიდებელად,
რომელთაცა-ესე გჳწოდა ჩუენ არა ხოლო ჰურიათაგანთა, არამედ წარმართთაგანთაცა?
ვითარცა-იგი ოსეს ეტყჳს: უწოდი არა ერსა ჩემსა ერად ჩემდა და არა საყუარელსა ჩემსა საყუარელად ჩემდა.
და იყოს ადგილსა მას, სადა-იგი ერქუას მათ, ვითარმედ: არა ერი ჩემი; მუნ ეწოდოს მათ შვილ ღმრთის ცხოველის.
ხოლო ესაია ღაღადებს ისრაჱლისათჳს: დაღათუ იყოს რიცხჳ იგი ძეთა მათ ისრაჱლისათაჲ ვითარცა ქჳშაჲ ზღჳსაჲ, ნეშტი ოდენ ცხონდეს;
ხოლო სიტყუაჲ აღმასრულებელი და შემოკლებული სიმართლით, რამეთუ სიტყუაჲ შემოკლებული ყოს უფალმან ქუეყანასა ზედა.
ვითარცა-იგი წინაჲსწარ თქუა ესაია: არა თუმცა უფალმან ყოვლისა მპყრობელმან დამიტევნა Page of ms. P: 358V ჩუენ ნათესავი, ვითარცა სოდომელნიმცა შევიქმნენით და გომორელთამცა მივემსგავსენით.
აწ უკუე რაჲმე ვთქუათ? წარმართნი, რომელნი არა ეძიებდეს სიმართლესა, ეწინეს სიმართლესა სარწმუნოებისაგან.
ისრაჱლი შეუდგა შჯულსა მას სიმართლისასა [და შჯულსა მას სიმრავლისასა] ვერ მიეწივა.
რაჲსათჳს? რამეთუ არა სარწმუნოებისაგან, არამედ საქმისაგან შჯულისა, რამეთუ შეპკოლდეს ლოდსა მას შეპკოლებისასა.
ვითარცა წერილ არს: აჰა, ესერა, დავსდებ სიონს შინა ლოდსა დაპკოლებისასა და კლდესა საცთურებისასა, და ყოველსა რომელსა ჰრწმენეს იგი, არასადა ჰრცხუენეს.
