Page of ms. P: 304R და მოუწოდა იესუ ათორმეტთა მათ მოწაფეთა და მისცა მათ ძალი და ჴელმწიფებაჲ ყოველთა ზედა ეშმაკთა და სენთა განკურნებად.
და წარავლინნა იგინი ქადაგებად სასუფეველსა ღმრთისასა და განკურნებად უძრულთა.
და ჰრქუა მათ: ნურაჲ გაქუნ გზასა ზედა: [ნუცა კუერთხი], ნუცა ვაშკარანი, ნუცა პური, ნუცა ვეცხლი, ნუცა ორი სამოსელი [გაქუნ].
და რომელსა სახლსა შეხჳდეთ. მუნ დაადგერით და მიერ გამოხჳდოდით.
და რაოდენთა არა შეგიწყნარნენ თქუენ, გამო-რაჲ-ხჳდოდით მიერ ქალაქით, მტუერი ფერჴთაგან თქუენთა განიყარეთ საწამებელად მათა.
და გამო-რაჲ-ვიდეს. მიმოვიდოდეს დაბნებსა მას და ქალაქებსა და ახარებდეს და განჰკურნებდეს სნეულთა ყოველთა ადგილთა.
Page of ms. P: 299R და ესმა ჰეროდეს მეოთხედ მთავართა საქმჱ იგი, რომელ[ი] მის მიერ იქმნებოდეს, და განიზრახვიდეს, რამეთუ იტყოდეს ვინმე, ვითარმედ: იოვანე ნათლის-მცემელი აღდგომილ არს მკუდრეთით
ხოლო რომელნიმე იტყოდეს, ჰელია გამოჩნდა, და სხუანი იტყოდეს: წინაწარმეტყუელი ვინმე პირველთაგანი აღდგომილ არს.
ხოლო ჰეროდე თქუა: იოვანეს თავი მე მოვჰკუეთე; ხოლო ესე ვინ არს, რომლისათჳს ესევითარი მესმის, არა ვიცი. და უნდა ხილვაჲ მისი.
და მოიქცეს მოციქულნი და უთხრეს იესუს, რაოდენი ქმნეს. და წარიყვანნა იგინი და განეშორა თჳსაგან ადგილსა ქალაქისასა, რომელსა ჰქჳან ბეთსაიდა.
ხოლო ერმან მან აგრძნა და მისდევდეს მას. და შეიმთხჳნა იგინი და ეტყოდა მათ სასუფეველისათჳს ღმრთისა, და რაოდენთა უნდა განკურნების, განკურნნა.
Page of ms. P: 303V და იყო აღსრულებასა და ამაღლებასა მათ დღეთასა, და თავადმან დაიდვა გულსა თჳსსა მისლვად იერუსალჱმდ.
და წარავლინნა მოციქულნი წინაშე პირსა მისსა; და ვითარცა წარვიდეს, შევიდეს დაბასა ერთსა სამარიტელთასა, ვითარმცა მზა-რაჲმე-უყვეს მას.
და არა შეიწყნარნეს იგინი, რამეთუ მიემართა იერუსალჱმდ.
და ვითარცა იხილეს მოწაფეთა მათ იაკობ და იოვანე, ჰრქუეს იესუს: უფალო, გნებავსა, ვითარმცა ვთქუთ, რაჲთა გარდამოჴდეს ცეცხლი ზეცით და აჴოცნეს იგინი?
მიექცა, შეჰრისხნა მათ და ჰრქუა: არა უწყით, რომლისა სულისანიცა ხართ თქუენ?
რამეთუ ძჱ კაცისაჲ არა მოვიდა სულთა კაცთა წარწმედად, არამედ ცხორებად. და წარვიდეს სხუად დაბად.
და ვითარ მივიდოდეს იგინი, ჰრქუა მას: მიგდევდე შენ, ვიდრეცა ხჳდოდი.
ჰრქუა მას იესუ: მელთა ჴურელი უჩს და მფრინველთა ცისათა სადგური, ხოლო ძესა კაცისასა არა აქუს, სადამცა თავი მიიდრიკა.
და ჰრქუა ერთსა: მომდევდი მე, და მან ჰრქუა: უფალო, მიბრძანე მე პირველად მისლვად და დაფლვად მამისა ჩემისა.
ჰრქუა მას იესუ: მიუტევენ მკუდარნი დაფლვად თჳსთა მკუდართა, ხოლო შენ მივედ და ახარებდ სასუფეველსა ღმრთისასა.
ხოლო ჰრქუა სხუამანცა: მიგდევდე შენ, ვიდრეცა ხჳდოდი; ხოლო პირველად მიბრძანე მისლვად და ჯმნად სახლეულთაგან ჩემთა.
ჰრქუა მას იესუ: არავინ დასდვის ჴელი ერქუანსა და უკუმართ ხედავნ და წარჰმართის სასუფეველსა ღმრთისასა.
