Page of ms. P: 8R და ვითარცა აღასრულნა იესუ სიტყუანი ესე სასმენელთა მიმართ ერისათა, შევიდა კაფარნაომდ.
და ასისთავისა ვისიმე მონაჲ სნეულ იყო და მიახდა სიკუდიდ, რომელი იყო მისა პატიოსან.
და ვითარცა ესმა იესუჲსი და მიავლინნა მისა მოხუცებულნი ჰურიათანი ვედრებად მისა, რაჲთა მოვიდეს და განკურნოს მონაჲ იგი მისი.
ხოლო რომელნი-იგი მოვიდეს იესუჲსა, ჰლოცვიდეს მას და ეტყოდეს, ვითარმედ: ღირს, რომელი-ესე ჰყო მის თანა,
რამეთუ უყუარს ნათესავი ჩუენი და შესაკრებელი მან აღმიშჱნა ჩუენ.
ხოლო თავადი ვითარ მიახლებულ იყო სახლსა მას, მიავლინა მისა ასისთავმან მან მეგობარნი და ჰრქუა: უფალო, ნუ მოშურები, რამეთუ არა ღირს ვარ, რაჲთა სართულსა სახლისა ჩემისასა შემოხჳდე.
რომლისაგან არცა თავი ჩემი ღირს მიჩს მოსლვად ჩემდა: არამედ სიტყჳთ ხოლო თქუ, და განიკურნოს მონაჲ ესე ჩემი.
რამეთუ მეცა კაცი ვარ ჴელმწიფებასა ქუეშე განწესებულ და მქონან ჩემ ქუეშე ერისა კაცნი; და ვჰრქჳ მას: წარვედ! და წარვიდის; და სხუასა: მოვედ! და მოვიდის; და მონასა ჩემსა: ყავ ესე! და ყვის.
ვითარცა ესმა ესე იესუს, დაუკჳრდა [სარწმუნოებაჲ მისი] და მიექცა ერსა მას, რომელნი მისდევდეს მას, და ჰრქუა მათ: ამენ გეტყჳ თქუენ, არცაღა ისრაჱლისა შორის ვპოვე ესოდენი სარწმუნოებაჲ.
და მიიქცეს რომელნი-იგი მისრულ იყვნეს, და პოვეს მონაჲ იგი მისი განცოცხლებული.
Page of ms. P: _ Page of ms. L: 607V და იყო, ამისა შემდგომად წარვიდოდა ქალაქად, რომელსა ჰრქუიან ნაინ, და თანაუვიდოდეს მოწაფენი მისნი და ერი მრავალი.
და [ვითარცა] მიეახლნეს ბჭეთა ქალაქისათა, აჰა, ესერა, გამოაქუნდა მკუდარი, ძჱ მხოლოდშობილი დედისა თუისისაჲ, და იგი იყო ქურივ; და ერი მრავალი ქალაქისაჲ იყო მის თანა.
და იხილა დედაკაცი Page of ms. L: 608R იგი იესუ და ჰრქუა მას: ნუ სტირ!
და შეახო ცხედარსა მას. ხოლო რომელთა აქუნდა იგი, დადგეს. ჰრქუა მას: ჭაბუკო, შენ გეტყუი, აღდეგ!
და ზე აღდგა იგი და იწყო სიტყუად; და მისცა იგი დედასა თუისსა.
და შიში დაეცა ყოველთა ზედა, ადიდებდეს ღმერთსა და იტყოდეს, ვითარმედ: წინაწარმეტყუელი დიდი აღდგომილ არს ჩუენ შორის, რამეთუ მოხედა უფალმან ერსა თუისსა.
