და აღასრულა უფალმან სიტყუაჲ მისი, რომელ თქუა ჩუენ ზედა და მსაჯულთა ჩუენთა ზედა, რომელნი შჯიღეს ისრაჱლსა, და მეფეთა <ზედა> Page of ms. J: B45r ჩუენთა, და მთავართა ზედა/ ჩუენთა, და კაცთა ზედა ისრაჱლისათა და იუდაჲსთა,
მოვლინებად ჩუენ ზედა ძჳრი დიდი, რომელ არა სადა ყოფილ არს ცასა ქუეშჱ, ვითარ იგი ყო იჱრუსალემს შინა, ვითარცა წერილ არს შჯულსა მოსესსა,
რაჲთა ვჭამდეთ ჩუენ კაცი ჴორცთა ძისა თჳსისათა და კაცი ჴორცთა ასულისა თჳსისათა,
და მისცნა იგინი საწუნელად ყოველთა მეუფებათა გარემოთა ჩუენთა საყუედრელად, და უგზოდ შორის ყოველთა ერთა გარემოთა ჩუენთა, სადა განაბნინა იგინი უფალმან მუნ.
და იქმნნეს იგინი ქუემო და არა ზემო, რამეთუ შევსცოდეთ უფალსა ღმერთსა ჩუენსა არა სმენითა ჴმისა მისისაჲთა.
უფალსა ღმერთსა ჩუენსა სიმართლჱ, ხოლო ჩუენ და მამათა ჩუენთა სირცხჳლი პირთა ჩუენთაჲ, ვითარცა ესე დღეს.
ძჳრი, რომელ თქუა უფალმან ჩუენთჳს, მოიწია ყოველი ჩუენ ზედა,
და არა ვევედრენით პირსა უფლისასა, მოქცევად გონებათა გულისა თჳსისა უკეთურისათა,
და განიღჳძა უფალმან ბოროტებად ჩუენ ზედა, რამეთუ მართალ არს უფალი ყოველთა ზედა საქმეთა მისთა, რომელ გუამცნო ჩუენ;
და არა ვისმინეთ ჴმისა მისისაჲ სლვად ბრძანებათა უფლისათა, რომელ მოგუცა ჩუენ წინაშე პირსა ჩუენსა.
და აწ, უფალო ღმერთო ისრაჱლისაო, ვითარცა გამოიყვანე ერი შენი ქუეყანით ეგჳპტით ჴელითა მტკიცითა და სასწაულებითა და ძალითა დიდითა და მკლავითა მაღლითა, და ჰყავ შენდა სახელ ვითარცა დღჱ ესე.
ვცოდეთ, და უღმრთო ვიქმნენით, და უშჯულოჲ ვყავთ, უფალო ღმერთო ჩუენო, ყოველთათჳს სამართალთა შენთა.
გარე-მიიქეცინ გულის-წყრომაჲ შენი ჩუენგან, რამეთუ დავშთით მცირედნი მრავალთაგან შორის წარმართთა, სადა იგი განგუაბნიენ ჩუენ მუნ.
ისმინე, უფალო, ლოცვისა ჩუენისაჲ და თაყუანის-ცემისა ჩუენისაჲ, და განგუარინენ ჩუენ შენთჳს, და მეც ჩუენ მადლი წინაშე პირსა წარმტყუენველთა ჩუენთასა,
რაჲთა გულის-ჴმა-ყოს ყოველმან ქუეყანამან, რამეთუ შენ ხარ უფალი ღმერთი ჩუენი, და სახელი შენი წოდებულ არს ისრაჱლსა ზედა და ნათესავსა მი<ს>სა.
უფალო, გარდამოიხილე ტაძრით წმიდით შენით, და მოგუხედენ ჩუენ, მოყავ, უფალო, ყური შენი, და ისმინე <ჩუენი>;
აღახუენ, უფალო, თუალნი Page of ms. J: B46v შენნი, და იხილე რამეთუ არა მკუდართა მიგცენ დიდებაჲ და/ სამართალი უფალსა, რომელნი არიან ჯოჯოხეთს შინა, რომელთანი მიხუმულ არიან სულნი მათნი გონებათა მათთაგან.
და სული ჭუენიერი სიმდიდრესა ზედა, რომელ ვალნ იღუნალ, და უძლურებითა თუალთა მოკლებულთა, და სულმან მშიერმან მიგცენ შენ დიდებაჲ და სამართალი უფალსა.
რამეთუ არა სამართალთა ზედა მამათა ჩუენთასა და მეფეთა ჩუენთასა ჩუენ განვჰფენთ წყალობასა ჩუენსა წინაშე პირსა შენსა, უფალო ღმერთო ჩუენო;
რამეთუ მოიღე გულის-წყრომაჲ და რისხვაჲ შენი ჩუენ ზედა, ვითარცა სთქუ ჴელითა მომათა შენთა წინაწარმეტყუელთაჲთა.
ესრე თქუა უფალმან; მოიდრიკენ<ი>თ ბეჭნი თქუენნი, და ჰმსახურეთ მეფესა ბაბილონისასა, და დაეშჱნენით ქუეყანასა ზედა, რომელ მივეც მამათა თქუენთა.
და თუ არა ისმინოთ ჴმაჲ უფლისაჲ მსახურებად მეფესა ბაბილონისასა,
მოკლება ვყო ქალაქთა <გან> იუდაჲსთა და გარემო იჱრუსალემსა, ჴმაჲ შუებისაჲ <და> ჴმაჲ სიხარულისაჲ, ჴმაჲ სიძისაჲ <და> ჴმაჲ სძლისაჲ, და იყოს ყოველი ქუეყანაჲ უგზო უმკჳდროებისაგან.
დ<ა> არა ვისმინეთ ჴმისა შენისაჲ მსახურებად მეფესა ბაბილონისასა, და დაამტკიცენ სიტყუანი შენნი, რომელ სთქუენ ჴელითა მონათა შენთა წინაწარმეტყუელთაჲთა, გამოხუმად ძუალნი მეფეთა ჩუენთანი და ძუალნი მამათა ჩუენთანი ადგილით მათით.
და აჰა ესერა განბნეულ არიან იგინი სიცხესა ქუეშჱ დღისასა და ნეფხვასა ღამისასა, რამეთუ მიისრნეს იგინი სალმობითა, სიყმილითა, და მახჳლითა და ტყუეობითა.
და დასდევ სახლი იგი, რომელსა ზედა წოდებულ იყო სახელი შენი მუნ, ოჴრად, ვითარცა ესე დღეს, უკეთურებისათჳს სახლისა ისრაჱლისა და სახლისა იუდაჲსისა.
და <ჰ>ყავ ჩუენთჳს, უფალო ღმერთო ჩემო, ყოვლითა ყუდროებითა შენითა, <და მოწყალებითა შენითა> დიდითა.
ვითარცა სთქუ ჴელითა მონისა შენისა მოსესითა დღესა მას, რომელსა უბრძანე შენ მას, დაწერად შჯულისა შენისა წინაშე ძეთა ისრაჱლისათა, და სთქუ;
არა თუ ისმინოთ ჴმისა ჩემისაჲ, ნუ უკუე სადა ორხაჲ ეგე დიდი და მრავალი უკუნ-იქცენ შორად/ Page of ms. J: B46r წარმართთა შორის, სადა განვაბნიენ იგინი მუნ,
რამეთუ უწყი ვითარმედ არა ისმინონ ჩემი, რამეთუ ერი ქედ-ფიცხელი არს, და მოიქცენ გულითა მათითა ქუეყანასა მას ტყუეობისა მათისასა,
და გულის-ჴმა-ყონ, რამეთუ მე ვარ უფალი ღმერთი მათი, და ვსცე მათ გული გონიერი და ყურნი მორჩილნი,
და მაქებდენ მე ქუეყანასა მას ტყუეობისასა, და მოიჴსენონ სახელი ჩემი,
და მოიქცენ ქედ-ფიცხელობისაგან მათისა და უკეთურთაგან საქმეთა მათთა, რამეთუ მოიჴსენონ გზისა მამათა მათთაჲსაჲ, რომელნი ცოდვიდეს წინაშე უფლისა.
და მოვაქცინე იგინი ქუეყანასა მას, რომლისათჳს ვეფუცე მამათა მათთა აბრაჰამს, ისაკს და იაკობს; და ეუფლნენ მას, და განვამრავლნე იგინი, და არღარა შემცირდენ.
და დავამტკიცო მათ თანა აღთქუმაჲ საუკუნოჲ, რაჲთა ვიყო მე მათა ღმრთად, და იგინი იყვნენ ჩემდა ერად; და არღარა შევარყიო მერმე ერი ჩემი ისრაჱლი ქუეყანით მისით, რომელ მივეც მას.;
