დაეცა ბელი, და დაიმუსრა დაგონი. და იქმნა გამოქანდაკებულები მათი მჴეცად და პირუტყუად: აღიხუნიან იგინი შეკრულნი, ვითარცა ტჳრთი, რომელმან დააშრვის.
და ვერ ძალ უცნ ტჳრთვად, და ჰმშიინ და დაჰჴსნდის ერთბამად, რომელთა ვერ უძლავს განრინებად ბრძოლისაგან, და იგი თჳთ ტყუედ წარიხუნიან.
ისმინეთ ჩემი სახლმან იაკობისმან, და ყოველმან ნეშტმან ისრაჱლისამან რომელნი გამორჩეულ ხართ დედის მუცლითგან, და სწავლულ სიყრმითგან.
ვიდრე სიბერედმდე მე ვარ, და ვიდრემდე დაჰბერდეთ მევე ვარ. მე თავს-ვიდებ თქუენსა. მე ვყავ, და მე გილხინო, და მე აღგამაღლნე, და გაცხოვნნე თქუენ.
ვის მამსგავსეთ მე. იხილეთ და გამოიკულიეთ ცთომილთა მაგათ,
რომელთა შეჰყვით ოქროჲ პაჲვასიკისაგან, და ვეცხლი უღლითა სასწორისაჲთა აღწონიან, და მოიყიდიან ოქროჲს-მჭედელი, და ქმნიან ჴელით-ქმნულნი, და მოდრკიან, და თაყუანის-სცემედ მათ.
და აღიხუნიან იგინი მჴართა მათთა ზედა და წარვიდიან. უკუეთუ დასხნენ იგინი ადგილობანსვე ისხნენ, და ვერ შეიძრნენ. და უკუეთუ ვინ მე ღაღადებდეს მათა მიმართ, მათ ვერ Page of ms. J: A81r ესმეს, და ბოროტისაგან ვერ განარინნენ იგინი./
მოიჴსენეთ ესე, და სულთ-ითქუემდით, და შეინანეთ ცთომილთა მაგათ, მოიქეცით გულითა,
და მოიჴსენეთ პირველი იგი საუკუნითგანი, რამეთუ მე ვარ ღმერთი, და არა არს სხუაჲ ჩემსა გარეშჱ.
რომელმან მიუთხრი პირველი და უკუანაჲსკნელი, ვიდრე ყოფადმდე მისა ერთბამად აღესრულოს. და ვთქუ ვითარმედ ყოველივე ზრახვაჲ ჩემი ეგოს, და ყოველი რაოდენი მიზრახავს, ვყო.
მოუწოდი მზის-აღმოსავალით მფრინველსა, და ქუეყანით შორიელით რომელთათჳს ვიზრახე, ვიტყოდე, და მოვიყვანე, <. . .> და წარუმართენ გზანი მისნი.
ისმინეთ ჩემი რომელთა წარგიწყმედიეს გული თქუენი, რომელნი შორს ხართ სიმართლისაგან.
მოახლებულ არს სიმართლე ჩემი: და არა განგრძნეს, და მაცხოვარებამან ჩემ-მიერმან არა ყოვნოს. მივეც სიონს შინა მაცხოვარებაჲ ისრაჱლსა სადიდებელად.
