TITUS
Vetus Testamentum iberice: codd. Oshki & Jerusalem
Part No. 273
Previous part

Chapter: 24  
Verse: 1   Link to mcat Link to sept   აჰა ესერა უფალი განჰრყუნის სოფელსა, და მოაოჴროს იგი და გამოაცხადოს პირი ქუეყანისაჲ, და მიმოსთესნეს მკჳდრნი მისნი მას ზედა.

Verse: 2   Link to mcat Link to sept   და იყოს ერი იგი ვითარცა მღდელი, და მონაჲ იგი ვითარცა უფალი, და მჴევალი ვითარცა დედოფალი, და იყოს განმსყიდელი იგი ვითარცა მომსყიდელი, და მვასხებელი იგი ვითარცა მავასხებელი, და თანა-მდები იგი ვითარცა მიმცემელი.

Verse: 3   Link to mcat Link to sept   განხრწნით განიხრწნეს ქუეყანაჲ, და ტყუენვით წარიტყუენოს ქუეყანაჲ, რამეთუ პირი უფლისაჲ იტყოდა ამას.

Verse: 4   Link to mcat Link to sept   იგლოვდა ქუეყანაჲ, და განიხრწნა სოფელი. იგლოვდეს მაღალნი ქუეყანისანი.

Verse: 5   Link to mcat Link to sept   ხოლო ქუეყანამან უშჯულოებაჲ ქმნა მკჳდრთა მისთაგან, რამეთუ გარდაჰჴდეს შჯულსა, და ცვალნეს ბრძანებანი, და განაქარვეს აღთქუმაჲ საუკუნოჲ./ Page of ms. J: A55v 

Verse: 6   Link to mcat Link to sept   ამისთჳს წყევაჲ შეშჭამდეს ქუეყანასა, რამეთუ ცოდეს მკჳდრთა ქუეყანისათა, ამისთჳს გლახაკ იყვნენ მკჳდრნი ქუეყანისანი, და დაშთენ კაცნი მცირედნი.

Verse: 7   Link to mcat Link to sept   იგლოვდეს ღჳნოჲ და იგლოვდეს ვენაჴი, სულთ-ითქუმიდენ ყოველნი მოხარულნი გულითა.

Verse: 8   Link to mcat Link to sept   დაცხრომილ არს სიხარული ბობღანთაჲ: დაცხრომილ არს სილაღე და სიმდი<დ>რე უღმრთოთაჲ, დაცხრომილ არს ჴმაჲ ქნარისაჲ.

Verse: 9   Link to mcat Link to sept   ჰრცხუენა და არა სუეს ღჳნოჲ. მწარე იყო თაფლუჭი რომელნი სუმიდეს.

Verse: 10   Link to mcat Link to sept   მოოჴრდეს ყოველნი ქალაქნი, დაეჴშას სახლები, რაჲთა არა ვინ შევიდეს,

Verse: 11   Link to mcat Link to sept   ვალალაებდინ ღჳნისათჳს ყოველსა ადგილსა. დაცხრომილ არს სიხარული ქუეყანისაჲ,

Verse: 12   Link to mcat Link to sept   დაშთენ ქალაქნი ოჴრად, და სახლები დატევებული წარწყმდეს.

Verse: 13   Link to mcat Link to sept   ესე ყოველი იყოს ქუეყანასა ზედა წარმართთა შორის, ვითარცა იგი ვინ მოჰკუფხლავნ ზეთის-ხილსა, ეგრეთ მოკუფხლნენ იგინი, დაღათუ დასცხრეს სასთულებელი:

Verse: 14   Link to mcat Link to sept   ესენი ჴმითა ღაღადებნ, ხოლო რომელნი დაშთომილ იყვნენ ქუეყანასა ზედა იხარებდენ ერთბამად, რამეთუ დიდებითა უფლისაჲთა შეძრწუნდენ წყალნი ზღჳსანი.

Verse: 15   Link to mcat Link to sept   ამისთჳს დიდებაჲ უფლისაჲ იყოს ჭალაკთა ზედა, და სახელი უფლისაჲ ღმრთისაჲ ისრაჱლისაჲ დიდებულ იყოს.

Verse: 16   Link to mcat Link to sept   უფალო ღმერთო ისრაჱლისაო კიდითგან ქუეყანისაჲთ ნიშები გუესმა, სასოებაჲ უღმრთოჲსაჲ, და თქუან: ვაჲ შეურაცხის-მყოფელთა, რომელნი შეურაცხ-ჰყოფენ შჯულსა.

Verse: 17   Link to mcat Link to sept   შიში და ჯურღმული და საფრჴე თქუენ ზედა, რომელნი დამკჳდრებულ ხართ ქუეყანასა ზედა.

Verse: 18   Link to mcat Link to sept   და იყოს რომელი ივლტოდის შიშისაგან, შთავარდეს მღჳმესა, და რომელი გამოვიდეს მღჳმისაგან, შეიპყრას საბრჴითა, რამეთუ სარკუმელნი ზეცით განეხუნენ, და შეიძრნენ საფუძველნი ქუეყანისანი.

Verse: 19   Link to mcat Link to sept   მისდრკეს, შეძრწუნებით შეძრწუნდეს ქუეყანაჲ. და Page of ms. J: A56r  დასულებით/ დასულბეს ქუეყანაჲ.

Verse: 20   Link to mcat Link to sept   ვითარცა მთრვალი და შესულებული, და შეიძრას ვითარცა ხილის-საცავი: კარავი ქუეყან<ის>აჲ დაეცეს და შე-ვერ-უძლოს აღდგომად, რამეთუ განძლიერდა მას ზედა უშჯულოებაჲ.

Verse: 21   Link to mcat Link to sept   და მოავლინოს ღმერთმან სამკაულსა ზედა ცისასა ჴელი მისი მას დღესა შინა <და> მეფეთა ზედა ქუეყანისათა.

Verse: 22   Link to mcat Link to sept   და შეკრიბოს კრებულები მათი საპყრობილესა, და დაჰჴშას კარები, მრავლითგან ნათესავით მოხედვაჲ იყოს მათი.

Verse: 23   Link to mcat Link to sept   და დაითრგუნნენ ალიზნი, და დაეცეს ზღუდე, რამეთუ მეუფებდეს უფალი სიონს, იჱრუსალემს და წინაშე მოხუცებულთა იდიდოს.

Next part


This text is part of the TITUS edition of Vetus Testamentum iberice: codd. Oshki & Jerusalem.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.