Page of ms. J: A31v ბრძანებაჲ სიტყჳსა უფლისაჲ ისრაჱლისა მიმართ ჴელითა ანგელოზისა მისისაჲთა; დაისხენ<ი>თ ესე გულთა თქუენთა.
შეგიყუარენ თქუენ, იტყჳს უფალი, და სთქუათ; რაჲთა შემიყუარენ ჩუენ, არა ძმაჲ იყოა ესავ იაკობისი, იტყჳს უფალი, და შევიყუარე იაკობი.
ხოლო ესავი მოვიძულე და განვაწესენ საზღვარნი მისნი განსარყუნელად, და სამკჳდრებელი მისი მისაცემელად ოჴრებისა.
რამეთუ თქუას; იდუმეაჲ დაქცეულ არს და მოვიქცეთ, და აღვაშჱნოთ მოოჴრებული იგი. ამას იტყჳს უფალი ყოვლისა-მპყრობელი, იგინი აშჱნებდენ, და მე დავარღუევდე, <და> ეწოდოს მათ საზღვარი უშჯულოებისაჲ, და ერი რომელსა ზედა განწყობილ არს უფალი ვიდრე უკუნისამდე.
და თუალთა თქუენთა იხილონ, და თქუენ სთქუათ, განდიდნა უფალი ზედა უფროჲს საზღვართა ისრაჱლისათა. Page of ms. J: A32r
ძემან ადიდის მამაჲ,/ და მონამან უფალი თჳსი, და უკუეთუ მამაჲ ვარი მე, სადა არს დიდებაჲ ჩემი. და უკუეთუ უფალი ვარი მე, სადა არს შიში ჩემი, იტყჳს უფალი ყოვლისა-მპყრობელი. აწ თქუენ მღდელნი ეგე, რომელნი განაქარვებთ სახ<ე>ლსა ჩემსა, და სთქუთ, რაჲთა განვაქარვებთ სახ<ე>ლსა შენსა.
რამეთუ მოგაქუს საკურთხეველსა ჩემსა, და შემოსწირავთ პურთა შეგინებულთა, და სთქუათ; რაჲთა შევაგინათ იგი. ამისთჳს რამეთუ სთქუთ; ტაბლაჲ უფლისაჲ შეურაცხი არს, და მას ზედა დაგებული იგი შეურაცხ-ჰყავთ.
უკუეთუ შემოსწიროთ საკურთხეველსა ჩემსა ბრმაჲ, არა ბოროტ, და უკუეთუ შემოსწიროთ მკელობელი გინა სნეული, არა ბოროტ, მო-ღა-ჰგუარე იგი მთავარსა შენსა, უკუეთუ მიიღოს, გინა თუ თუალ გახუნეს შენ, იტყჳს უფალი ყოვლისა-მპყრობელი.
და აწ ევედრენით წინაშე პირსა ღმრთისა თქუენისასა, და ლხინება ყოს თქუენთჳს, ჴელითა თქუენითა იქმნა ესე, უკუეთუ თუალ გახუნე თქუენგანსა, იტყჳს უფალი ყოვლისა-მპყრობელი.
რამეთუ თქუენ შორისცა დაეჴშნენ კარნი, და არა აღანთოთ საკურთხეველსა ჩემსა ცუდად, არა არს ნებაჲ ჩემი თქუენ შორის, იტყჳს უფალი ყოვლისა-მპყრობელი, და მსხუერპლი არა შევიწირო ჴელთაგან თქუენთა.
რამეთუ მზისა აღმოსავალითგან ვიდრე დასავალადმდე დიდებულ არს სახელი ჩემი წარმართთა შორის, და ყოველსა ადგილსა საკუმეველი მოერთუმის სახელსა ჩემსა, და მსხუერპლი წმიდაჲ, რამეთუ დიდ არს სახელი ჩემი წარმართთა შორის, იტყჳს უფალი ყოვლისა-მპყრობელი.
ხოლო თქუენ შეაგინებთ მას, რამეთუ სთქუთ თქუენ, ტაბლაჲ უფლისაჲ შეგინებულ არს, და ზედა დაგებული მისი შეურაცხ არს საზრდელი მას ზედა.
და სთქუთ; ესე ძჳრის-ხილვისა/გან Page of ms. J: A32v არს, და განანქრიეთ იგი, იტყჳს უფალი/ ყოვლისა-მპყრობელი, და შემოგაქუნდა ჩემდა ნატაცები და მკელობელი და ხაშმი, და შემოსწირევდით მსხუერპლად. არა შევიწირო იგი ჴელთაგან თქუენთა, იტყჳს უფალი ყოვლისა-მპყრობელი.
და წყეულ იყავნ კაცი იგი, რომელსა ძალ ედვას, და ედგას სამწყსოსა მისსა ვერძი, და აღთქუმაჲ მისი მის ზედა იყოს, და შეწიროს მან განრყუნილი უფლისა. რამეთუ მეუფჱ დიდი ვარი მე, იტყჳს უფალი ყოვლისა-მპყრობელი, და სახელი ჩემი გამოჩინებულ არს წარმართთა შორის.:
