Page of ms. J: A13v სიტყუაჲ, რომელი იხილა ამბაკუმ წინაწარმეტყუელმან.
ვიდრემდე უფალო ვღაღადებდე, და არა ისმენ, ვჴმობ შენდამი დაჭირვებული, და არა მიჴსნი.
რაჲსათჳს მიჩუენენ მე შრომანი და სალმობანი ხილვად უბადრუკებასა და უღმრთოებასა; წინაშე ჩემსა იქმნა საშჯელი, და მსაჯული იგი მიიღებს ქრთამსა.
ამისთჳს განქარვებულ არს შჯული, და არა გამოვალს სრულიად სამართალი, რამეთუ უღმრთოჲ ჰმძლავრობს მართალსა. ამისთჳს გამოვალს საშჯელი გულარძნილი.
იხილეთ შეურაცხის-მყოფელთა მაგათ, და მიხედეთ; და გიკჳრდინ საკჳრველი, და განირყუნენით, რამეთუ საქმესა ვიქმ მე დღეთა თქუენთა, რომელი არა გრწმენეს, უკუეთუ ვინ მე გითხრობდეს თქუენ.
რამეთუ მე ესერა აღვადგინნა ქალდეველნი, ნათესავი მწარჱ და მოსწრაფჱ, რომელი ვალს სივრცესა ქუეყანისასა დამკჳდრებად საყოფელთა არა თჳსთა.
საშინელ და წარჩინებულ არს, მის განვე საშჯელი მისი იყოს, და სიტყუაჲ მისი მის განვე გამოვიდეს.
და ხლდებოდიან უფროჲს ვეფხისა ცხენნი მისნი, და უმალეს უფროჲს მგელთა არაბიაჲსათა, და აღემჴედრნენ მჴედარნი მისნი, და მოიმართონ შორით, და ფრინვიდენ ვითარცა ორბნი გულს-მოდგინედ ჭამად.
აღსასრული უღმრთოთა ზედა მოიწიოს წინა-აღმდგომნი Page of ms. J: A14r პირთა მათთა წინაშე,/ და შეკრიბოს ვითარცა მქჳშაჲ ნატყუენავი.
და იგი მეფეთა შორის იშუებდეს, და მძლავრნი სამღერელ მისა, და იგი ყოველსა ძნელოვანსა ემღერდეს, და მოსდვას მიწაჲ, და დაიპყრას იგი.
მაშინ გარდაიქციოს სული, და განვლოს, და ულხინოს მას ძალი ღმრთისა ჩემისაჲ.
არა შენ უფალი ღმერთი ხარა პირველითგან წმიდაჲ ჩემი, და არა მოვწყდეთ. უფალო საშჯელად განაწესე იგი; და დამბადა მე მხილებად სწავლისა მისისა.
წმიდა არს თუალი შენი არა ხილვად ბოროტისა, და მიხედვად სალმობასა ვერ უძლო. რაჲსათჳს ხედავ შეურაცხის-მყოფელთა და დაიდუმებ შთათქმასა მართლისასა უღმრთოჲსაგან უმცირჱსისა მისისა.
და ჰყოფ კაცთა ვითარცა თევზთა ზღჳსათა, და ვითარცა ქუე-წარმავალთა, რომელთა არა აქუნ წინამძღუარი.
აღსასრულად სამჭედურითა აღმოიტაცა, და მოიზიდა იგი სათხევლითა, და შეიკრიბა იგი სათრომელსა თჳსსა.
ამისთჳს მხიარულ იყოს, და უხაროდის გულსა მისსა, ამისთჳს დაწყჳდოს სათრომელითა თჳსითა, <და აკუმიოს სათხეველითა თჳსითა>, რამეთუ მათ შინა განაპოხა ნაწილი თჳსი, და საჭმელნი მისნი რჩეულნი.
ამისთჳს უთხინეს სათხეველნი მისნი, და მარადის მოწყუ<ე>დად წარმართთა არა ერიდების.:
