ესრეთ მიჩუენა მე უფალმან ღმერთმან, და აჰა ესერა ნაშობი მკალთაჲ მომავალი ცისკრისაჲ, და აჰა ესერა ბუზჳ ისგუგ მეფჱ.
და იყოს ოდეს მოასრულოს მოჭამად თივაჲ ქუეყანისაჲ, და ვთქუ; უფალო უფალო, ლხინება ყავ; ვინ აღადგინოს იაკობი, რამეთუ შემცირებულ არს.
შეინანე უფალო ამას ზედა. და ესე არა იყოს, იტყჳს უფალი.
ესრჱთ მიჩუენა მე უფალმან უფალმან; და აჰა ესერა მოუწოდა საშჯელსა ცეცხლითა უფალმან ღმერთმან, და შეჭამნა Page of ms. J: B10v უფსკრულნი მრავალნი, და შეჭამა ნაწილი./
და ვთქუ; უფალო უფალო დააცხრვე, აწ ვინ აღადგინოს იაკობი, რამეთუ შემცირებულ არს.
შეინანე უფალო ამისთჳს. და ესე არა იყოს, იტყჳს უფალი უფალი.
ესრჱთ მიჩუენა მე უფალმან, და აჰა ესერა მდგომარჱ ზღუდეთა ზედა ანდამანტიონისათა, და ჴელსა მისსა ადამაჲ.
და მრქუა მე უფალმან; რასა ხედავ შენ, ამოს. და ვარქუ, ადამასა. და თქუა უფალმან; აჰა ესერა მე დავასვე ადამაჲ შორის ერისა ისრაჱლისა, არღარა შევსძინო თანა-წარსლვად მისა.
და განირყუნ<ნ>ენ ბომონნი იგი სიცილისანი და საკერპონი ისრაჱლისანი მოოჴრდენ და აღვდგე სახლსა ზედა იერობოამისსა მახჳლითა.
და განავლინნა ამასია მღდელმან ბეთელისამან იერობოამისა მეფისა ისრაჱლისა და ჰრქუა მას, ერის-კრებასა ჰყოფს შენ ზედა ამოს შორის სახლსა ისრაჱლისასა. ვერ შემძლებელ არს ქუეყანაჲ დათმენად ყოველთა სიტყუათა მისთა.
რამეთუ ამას იტყჳს ამოს, მახჳლითა/ აღესრულოს იერობოამ, ხოლო ისრაჱლი ტყუედ წარიყვანოს ქუეყანით თჳსით.
და ჰრქუა ამასია ამოსს, მხილველო ვიდოდე განეშორე ამიერ, და წარვედ ქუეყანად იუდაჲსა, და მუნ აიძულებდ, და მუნ წინაწარმეტყუელებდ.
ხოლო ბეთელსა არღარა სწინაწარმეტყუელებდე, რამეთუ სიწმიდე მეფისაჲ არს, და სახლი მეფისაჲ არს.
მიუგო ამოს და ჰრქუა ამასიას, არა ვიყავ მე წინაწარმეტყუელ, არცა ძჱ წინაწარმეტყუელისაჲ, არამედ მწყემსი ვიყავ, და ვსხეპდ ლეღუსულელსა.
და გამომიყვანა მე უფალმან ცხოვართაგან, და მრქუა მე უფალმან; მივედ და წინაწარმეტყუელებდ ერსა ზედა ჩემსა ისრაჱლსა.
და აწ ისმინე სიტყუაჲ უფლისაჲ. შენ მეტყჳ; ნუ სწინაწარმეტყუელებ ისრაჱლსა ზედა, და ნუ ერის-კრებასა ჰყოფ სახლსა ზედა იაკობისსა.
ამის/თჳს Page of ms. J: B11r ამას იტყჳს უფალი, ცოლი შენი ქალაქსა შინა ისიძვიდეს, და ძენი/ შენნი და ასულნი <შენნი> მახჳლითა დაეცნენ, და ქუეყანაჲ შენი საბლითა განიზომოს, და შენ ქუეყანასა არა წმიდასა აღესრულო, ხოლო ისრაჱლი ტყუედ წარიყვანოს ქუეყანით მისით.:
