ისმინათ სიტყუაჲ უფლისაჲ ესე, რომელი მომაქუს თქუენ ზედა გოდებაჲ, სახლო ისრაჱლისაო.
დაეცა; არღარა შესძინოს აღდგომად ქალწულმან ასულმან ისრაჱლისამან. შესცოდა ქუეყანასა მისსა, არა ვინ არს ორმელმან აღადგინოს იგი.
რამეთუ ამას იტყჳს უფალი უფალი; ქალაქსა მას, რომლისაგან გამოვიდოდეს ათასნი, დაშთენ ასნი ოდენ, და რომლისაგან გამოვიდოდეს ასნი, დაშთენ ათნი სახლსა ისრაჱლისასა.
რამეთუ ამას ეტყჳს უფალი სახლსა ისრაჱლისასა, გამომიძიეთ მე და სცხონდეთ.
და ნუ ეძიებთ ბეთელსა, და გალგალად ნუ განხუალთ, და ჯურღმულსა მას ფიცისასა ნუ წიაღ-ხუალთ, რამეთუ გალგალაჲ წარტყუე<ნ>ვით წარიტყუენოს, და ბეთელი იქმნეს ვითარცა არა ყოფილი.
გამოიძიეთ უფალი და ცხონდით, რაჲთა არა აღატყდეს ვითარცა ცეცხლი სახლი იოსებისი, და შეჭამოს იგი, და არა ვინ იყოს დამშრეტელ სახლსა ზედა ისრაჱლისასა.
რომელი იქმს სიმაღლედ საშჯელსა, და სიმართლჱ ქუეყანასა ზედა დაემტკიცა.
რომელი იქმს ყოველსა, და გარდასცვალებს, და გარდააქცევს განთიად აჩრდილსა სიკუდილისასა, და დღჱ ღამედ დააბნელოს, რომელი მოუწესს წყალთა ზღჳსათა, და მიჰფინის იგი პირსა ზედა ქუეყანისასა, უფალ არს სახელი მისი.
რომელი განუყოფს შემუსრვასა ძალსა ზედა, და უბადრუკებაჲ ძნელოვანსა ზედა მოაწიის.
მოიძულეს ბჭეთა ზედა მამხილებელი, და სიტყუაჲ წმიდაჲ მოიძაგეს. Page of ms. J: B9r
ამისთჳს/ რამეთუ დაჰქენჯნიდეს გლახაკსა, და ძღუენსა რჩეულსა მიიღებდით მათ გან; სახლებსა თლილსა იშჱნებდით, და არა დაიმკჳდროთ მათ შინა, ვენაჴი გულის-სათქუმელი დაასხთ, და არა სუათ ღჳნოჲ მისგან.
რამეთუ ვცან მრავალი უღმრთოებაჲ თქუენი, და ძლიერ არიან ცოდვანი თქუენნი. დასთრგუნავთ მართალსა, და მოიღებთ ნაცვალსა, და გლახაკთა ბჭეთაგან განაშორებთ.
ამისთჳს რომელმან გულის-ჴმა-ყოს მას ჟამსა შინა, დადუმნას, რამეთუ ჟამი ბოროტი არს.
გამოიძიეთ კეთილი და ნუ ბოროტი, რაჲთა სცხოვნდეთ, და იყოს ესრჱთ თქუენდა უფალი ღმერთი ყოვლისა-მპყრობელი, ვითარცა ეგე სთქუთ.
მოვიძულეთ ბოროტი, და შევიყუარეთ კეთილი, და კუალად მოაგეთ ბჭეთა ზედა სამართალი, რაჲთა შეიწყალოს უფალმან ღმერთმან ყოვლისა-მპყრობელმან ნეშტი იგი იოსებისი .
ამისთჳს ამას იტყჳს უფალი ღმერთი ყოვლისა-მპყრობელი. ყოველთა უბანთა ტყებაჲ და ყოველთა გზათა ითქუმოდის ვაჲ ვაჲ; მოუწდიან ქუეყანის-მოქმედსა გლოვად და ტყებად, და მეცნიერთა გოდებად.
და ყოველთა გზათა ტყება<ჲ>, რამეთუ განვლო შორის შენსა, თქუა უფალმან.
ვაჲ რომელთა გული-უთქუამს დღისა მისთჳს უფლისა, რაჲსათჳს ესე თქუენდა დღჱ უფლისაჲ; და ესე არს ბნელ, და არა ნათელ.
ვითარცა იგი სახედ ივლტინ კაცი პირისაგან ლომისა, და ემთხჳის მას დათჳ, და შევარდის იგი სახლსა, და შეადგნის ჴელნი მისნი კედელსა, და სცის მას გუელმან.
არა მე ბნელ არსა დღჱ იგი უფლისაჲ, და არა არს ნათელი მას შინა, და წყუდიად<ი>, და არა აქუს მას ნითელი.
მოვიძულენ განმიშორებიან დღესასწაულნი თქუენნი, და არა ვიყნასო კრებათა შინა თქუენთა.
დაღათუ მომართუმიდეთ მე მრგულიად-დასაწუველთა, Page of ms. J: B9v და მსხუერპლთა თქუენთა./ არა შევიწირო, და ცხორებისა მის თქუენისა გამოჩინებასა არა მივხედო.
განმაშორენ ჩემგან ოხრანი გალობათა შენთანი, და ფსალმუნი საგალობელთა შენთაჲ არა ვისმინო.
წარმოეცეს ვითარცა წყალი საშჯელი, და სიმართლჱ ვითარცა მდინარჱ წიაღ-უვალი.
ნუ საკლველებსა და მ<ს>ხუერპლებსა შემოსწირევდით ჩემდა ორმეოც წელ უდაბნოსა ზედა, სახლო ისრაჱლისაო.
და აღიღეთ კარავი იგი მოლოქისი, და ვარსკულავი ღმრთისა თქუენისა რემფაჲსი ხატნი იგი, რომელნი ჰქმნენით თავისა თქუენისა.
და მიგჴადნე თქუენ მიერ კერძო დამასკესა, იტყჳს უფალი; ღმერთი ყოვლისა-მპყრობელი სახელი მისი.:
