TITUS
Biblia Mcxetica
Part No. 559
Previous part

Chapter: 32 
ფსალმუნი დავითისი ზედაწარუწერელი ებრაელთა შორის


Verse: 1  Link to psa Link to sept   იხარებდით მართალნი უფლისა მიმართ, და წრფელთა შუენის ქებაჲ.

Verse: 2  Link to psa Link to sept   აუვარებდით უფალსა ბობღნითა და ათძალითა საფსალმუნისათა უგალობდით მას.

Verse: 3  Link to psa Link to sept   აქებდით მას ქებითა ახლითა, კეთილად უგალობდით მას ღაღადებითა.

Verse: 4  Link to psa Link to sept   რამეთუ წრფელ არს სიტყუაჲ უფლისაჲ და ყოველნი საქმენი მისნი სარწმუნოებით არიან;

Verse: 5  Link to psa Link to sept   უყუარს წყალობაჲ და მსჯავრი უფალსა და წყალობითა უფლისაჲთა სავსე არს ქუეყანაჲ.

Verse: 6  Link to psa Link to sept   სიტყჳთა უფლისაჲთა ცანი დაემტკიცნეს და სულითა პირისა მისისათა - ყოველი ძალი მათი.

Verse: 7  Link to psa Link to sept   შეჰკრებს იგი, ვითარცა თხიერთა, წყალთა ზღჳსათა და დაასხამს საუნჯეთა შინა უფსკრულთა.

Verse: 8  Link to psa Link to sept   ეშინოდენ უფლისაჲ ქუეყანასა და მისგან შეიძრნედ ყოველნი დამკჳდრებულნი სოფლისანი.

Verse: 9  Link to psa Link to sept   რამეთუ მან თქუა და იქმნნეს, თავადმან ამცნო და დაებადნეს.

Verse: 10  Link to psa Link to sept   უფალმან განაქარვნის ზრახვანი წარმართთანი და შეურაცხ-ყვნის გულისსიტყუანი ერთანი და შეურაცხ-ყვნეს ზრახვანი მთავართანი;

Verse: 11  Link to psa Link to sept   ხოლო ზრახვა უფლისაჲ უკუნისამდე ჰგიეს და გულისსიტყუანი გულისა მისისანი - თესლითი თესლადმდე.

Verse: 12  Link to psa Link to sept   ნეტარ არს ნათესავი, რომლისა არს უფალი ღმერთი მათი, ერი, რომელ გამოირჩია სამკჳდრებელად თჳსად.

Verse: 13  Link to psa Link to sept   ზეცით მოხედნა უფალმან და იხილნა ყოველნი ძენი კაცთანი;

Verse: 14  Link to psa Link to sept   განმზადებულით სამკჳდრებელით თჳსით მოხედნა ყოველთა ზედა სამკჳდრებულთა ქუეყანისათა,

Verse: 15  Link to psa Link to sept   რომელმან დაჰბადნა მხოლოდ გულნი მათნი, რომელმან გულისჴმა-ყუნის ყოველნი საქმენი მათნი.

Verse: 16  Link to psa Link to sept   არა ცხონდების მეფე მრავლითა ძალითა თჳსითა და გმირი არა განერეს სიმრავლითა ძალისა მისისაჲთა.

Verse: 17  Link to psa Link to sept   ტყუინ ცხენი განრინებად და დიდითა ძალითა თჳსითა არა განერეს.

Verse: 18  Link to psa Link to sept   აჰა, ესერა, თუალნი უფლისანი მოშიშთა მისთა ზედა და რომელნი ესვენ წყალობასა მისსა,

Verse: 19  Link to psa Link to sept   ჴსნად სიკუდილისაგან სულთა მათთა და გამოზრდად მათდა სიყმილსა.

Verse: 20  Link to psa Link to sept   ხოლო სულმან ჩემმან დაუთმენ უფალსა, რამეთუ მწე და მფარველ არს იგი ჩუენდა;

Verse: 21  Link to psa Link to sept   რამეთუ მისა მიმართ იხარებდეს გული ჩუენი და სახელსა წმიდასა მისსა ვესვიდეთ.

Verse: 22  Link to psa Link to sept   იყავნ, უფალო, წყალობაჲ შენი ჩუენ ზედა, ვითარცა ჩუენ გესავთ შენ.

Next part


This text is part of the TITUS edition of Biblia Mcxetica.

Copyright TITUS Project, Frankfurt a/M, 22.3.2021. No parts of this document may be republished in any form without prior permission by the copyright holder.