TITUS
Armenian NT (Zohrab Bible)
Part No. 84
Previous part

Chapter: 16  
(Ժ՜Զ)


Verse: 1   Link to gnt   Զայս խօսեցայ ընդ ձեզ՝ զի մի գայթագղեսջիք։

Verse: 2   Link to gnt   Ի ժողովրդոց իւրեանց հանցեն զձեզ։ Այլ եկեսցէ ժամանակ՝ զի ամենայն որ սպանանիցէ զձեզ, համարիցի պաշտօն մատուցանել Աստուծոյ։

Verse: 3   Link to gnt   Եւ զայն արասցեն ընդ ձեզ. քանզի ոչ ծանեան զհայր՝ եւ ոչ զիս։

Verse: 4   Link to gnt   Այլ եւ զայս խօսեցայ ընդ ձեզ, զի յորժամ եկեսցէ ժամանակ՝ յիշեցէք՝ թէ ես ասացի ձեզ։

Verse: 5   Link to gnt   Զայս ի սկզբանէ՝ ոչ ասացի ձեզ, քանզի ընդ ձեզ էի։ Բայց արդ երթամ ես առ առաքիչն իմ. եւ ոչ ոք ի ձէնջ հարցանէ ցիս, թէ յով երթաս։

Verse: 6   Link to gnt   Այլ զի զայս խօսեցայ ընդ ձեզ, տրտմութիւն ելից զսիրտս ձեր։

Verse: 7   Link to gnt   Այլ ես զճշմարիտն ասեմ ձեզ. լաւ է ձեզ եթէ ես երթամ. զի եթէ ես ոչ երթայց՝ մխիթարիչն ոչ եկեսցէ առ ձեզ. ապա եթէ երթամ, առաքեցից զնա առ ձեզ։

Verse: 8   Link to gnt   Եւ նա՝ եկեալ, յանդիմանեսցէ զաշխարհ, վասն մեղաց, եւ վասն արդարութեան, եւ վասն դատաստանի։

Verse: 9   Link to gnt   Վասն մեղաց՝ զի ոչ հաւատան յիս։

Verse: 10   Link to gnt   Վասն արդարութեան՝ զի առ հայր իմ երթամ, եւ ոչ եւս տեսանէք զիս։

Verse: 11   Link to gnt   Վասն դատաստանի՝ զի իշխան աշխարհիս այսորիկ դատապարտեալ է։

Verse: 12   Link to gnt   Եւս բազում ինչ ունիմ ասել ձեզ, այլ ոչ կարէք հանդարտել այժմիկ։

Verse: 13   Link to gnt   Յորժամ եկեսցէ նա հոգին ճշմարտութեան, առաջնորդեսցէ ձեզ ամենայն ճշմարտութեամբ. զի ոչ եթէ յանձնէ ինչ խօսիցի, այլ զոր լսիցէ խօսեսցի, եւ զգալոցն պատմեսցէ ձեզ։

Verse: 14   Link to gnt   Նա զիս փառաւորեսցէ, զի յիմմէ անտի առնուցու՝ եւ պատմեսցէ ձեզ։

Verse: 15   Link to gnt   Զամենայն ինչ զոր ունի հայր՝ իմ է. վասն այնորիկ ասացի ձեզ, թէ յիմմէ անտի առնու՝ եւ պատմէ ձեզ։

Verse: 16   Link to gnt   Փոքր մի, եւ ոչ եւս տեսանիցէք զիս. եւ ապա սակաւիկ մի, եւ տեսանիցէք զիս. եւ ես երթամ առ հայր։

Verse: 17   Link to gnt   Ասէին ոմանք յաշակերտաց անտի ցմիմեանս. զինչ է այս զոր ասէս ցմեզ, թէ փոքր մի՝ եւ ոչ տեսանէք զիս, եւ դարձեալ սակաւիկ մի՝ տեսանիցէք զիս. եւ եթէ ես առ հայր իմ երթամ։

Verse: 18   Link to gnt   Եւ ասէին, զինչ իցէ այն փոքր մեւս եւսն, չգիտեմք զինչ խօսի։

Verse: 19   Link to gnt   Գիտաց Յիսուս եթէ կամին ցնա հարցանել, եւ ասէ ցնոսա. վասն այդորիկ խնդրէք ընդ միմեանս՝ զի ասացի՝ թէ փոքր մի՝ եւ ոչ տեսանէք զիս, եւ դարձեալ սակաւիկ մեւս եւս տեսանիցէք զիս։

Verse: 20   Link to gnt   Ամէն ամէն ասեմ ձեզ, զի լացջիք եւ ողբասջիք դուք, եւ աշխարհ խնդասցէ. դուք տրտմեսջիք, այլ տրտմութիւն յուրախութիւն եղիցի։

Verse: 21   Link to gnt   Կին յորժամ ծնանիցի՝ տրտմութիւն է նմա, զի հասեալ է ժամ նորա. այլ յորժամ ծնցի զմանուկն, ոչ եւս յիշէ զնեղութիւնն վասն խնդութեանն, զի ծնաւ մարդ յաշխարհ։

Verse: 22   Link to gnt   Եւ դուք այժմ տրտմութիւն ունիք. այլ դարձեալ տեսից զձեզ, եւ ուրախ լիցին սիրտք ձեր. եւ զուրախութիւնն ձեր ոչ ոք հանիցէ ի ձէնջ։

Verse: 23   Link to gnt   Եւ յայնմ աւուր զիս ինչ ոչ հարցանիցէք։ Ամէն ամէն ասեմ ձեզ. զի զոր ինչ խնդրիցէք ի հօրէ իմմէ յանուն իմ. տացէ ձեզ։

Verse: 24   Link to gnt   Մինչեւ ցայժմ ոչինչ խնդրեցէք յանուն իմ. խնդրեցէք եւ առնուցուք. զի ուրախութիւնն ձեր լցեալ եղիցի։

Verse: 25   Link to gnt   Զայս առակօք խօսեցայ ընդ ձեզ. եկեսցէ ժամանակ, յորժամ ոչ եւս առակօք խօսեցայց ընդ ձեզ. այլ յայտնապէս զհօրէ պատմեցից ձեզ։

Verse: 26   Link to gnt   Յայնմ աւուր խնդրեսջիք յանուն իմ, եւ ոչ ասեմ ձեզ՝ եթէ ես հարցից զհայր վասն ձեր.

Verse: 27   Link to gnt   Զի ինքն իսկ հայր սիրէ զձեզ, զի դուք զիս սիրիցէք, եւ հաւատացէք եթէ ես յԱստուծոյ ելի։

Verse: 28   Link to gnt   Ելի ի հօրէ՝ եւ եկի յաշխարհ. դարձեալ թողում զաշխարհ, եւ երթամ առ հայր։

Verse: 29   Link to gnt   Ասեն ցնա աշակերտքն. ահա՝ արդ յայտնութեամբ խօսիս. եւ առակ եւ ոչ մի ինչ ասես։

Verse: 30   Link to gnt   Այժմիկ գիտեմք՝ եթէ գիտես զամենայն. եւ ոչինչ պիտոյ է՝ եթէ ոք հարցանիցէ զքեզ. յայսմիկ հաւատամք եթէ յԱստուծոյ ելեր։

Verse: 31   Link to gnt   Պատասխանի ետ նոցա Յիսուս՝ եւ ասէ. այժմ հաւատայք։

Verse: 32   Link to gnt   Ահա եկեսցէ ժամ, եւ եկեալ իսկ է. զի ցրուեսջիք յիւրաքանչիւր տեղիս, եւ զիս միայն թողուցուք. եւ չեմ միայն, զի հայր ընդ իս է։

Verse: 33   Link to gnt   Զայս խօսեցայ ընդ ձեզ՝ զի ընդ իս խաղաղութիւն ունիցիք. յաշխարհի աստ՝ նեղութիւն ունիցիք, այլ քաջալերեցարուք զի ես յաղթեցի աշխարհի։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.