TITUS
Armenian NT (Zohrab Bible)
Part No. 80
Previous part

Chapter: 12  
(Ժ՜Բ)


Verse: 1   Link to gnt   Իսկ Յիսուս վեց աւուրբ յառաջ քան զզատիկն եկ ի Բեթանիա, իւր էր Ղազար մեռեալն. զոր յարոյց ի մեռելոց։

Verse: 2   Link to gnt   Եւ արարին անդ նմա ընթրիս. եւ ի սպասու կայր Մարթա, եւ Ղազար մի էր ի բազմելոց ընդ նմա։

Section: 24  
Verse: 3   Link to gnt   Իսկ Մարեմայ առեալ լիտր մի իւղոյ նարդեան ազնուի մեծագնոյ. օծ զոտսն Յիսուսի, եւ հերով իւրով մաքրէր զոտս նորա. եւ տունն լի եղեւ ի հոտոյ իւղոյն։

Section: 25  
Verse: 4   Link to gnt   Ասէ մի ոմն յաշակերտաց անտի՝ Յուդա Իսկարիովտացի, որ մատնելոց էր զնա.

Verse: 5   Link to gnt   Ընդէր ոչ եւղդ այդ վաճառեցաւ երեք արեւր դենարի, եւ տուաւ աղքատաց։

Verse: 6   Link to gnt   Զայս ասաց՝ ոչ զի զաղքատաց ինչ փոյթ էր նմա. այլ զի գող էր, եւ զարկղն ինքն ունէր, եւ եւ որ ինչ անկանէրն նա կրէր։

Verse: 7   Link to gnt   Ասէ Յիսուս. թոյլ տուք դմա, զի յօրն պատանաց իմոց պահեսցէ զայդ։

Verse: 8   Link to gnt   Զաղքատս յամենայն ժամ ընդ ձեզ ունիք. զիս ոչ հանապազ ընդ ձեզ ունիք։

Verse: 9   Link to gnt   Իբրեւ գիտաց ժողովուրդ բազում ի Հրէիցն թէ անդ է՝ եկին. ոչ միայն վասն Յիսուսի, այլ զի եւ զՂազար տեսցեն՝ զոր յարոյցն ի մեռելոց։

Verse: 10   Link to gnt   Խորհուրդ արարին քահանայապետքն՝ զի եւ զՂազար սպանցեն.

Verse: 11   Link to gnt   Քանզի բազումք ի Հրէից երթային եւ հաւատային ի Յիսուս։

Passage: 7-1 
Verse: 12   Link to gnt   Ի վաղիւ անդր ժողովուրդ բազում որ եկեալ էր ի տօնն, իբրեւ լուան եթէ գայ Յիսուս յԵրուսաղէմ,

Verse: 13   Link to gnt   Առին ոստս արմաւենեաց՝ եւ ելին ընդ առաջ նորա. աղաղակէին եւ ասէին. աւսաննա օրհնեալ որ գասդ յանուն տեառն՝ թագաւորդ Իսրայէլի։

Section: 26  
Verse: 14   Link to gnt   Եւ գտեալ Յիսուսի էշ մի, նստաւ ի վերայ նորա. որպէս եւ գրեալ է։

Verse: 15   Link to gnt   Մի երկնչիր դուստր Սիովնի, ահաւասիկ թագաւոր քո գայ նստեալ ի վերայ յաւանակի իշոյ։

Verse: 16   Link to gnt   Եւ զայն ինչ՝ ոչ գիտացին աշակերտքն նորա զառաջինն. այլ յորժամ փառաւորեցաւ Յիսուս, յայնժամ յիշեցին եթէ այն էր որ գրեալն էր վասն նորա. եւ զայն արարին նմա։

Verse: 17   Link to gnt   Եւ ժողովուրդն վկայէր՝ որ էր ընդ նմա, եթէ զՂազար կոչեաց եւեթ ի գերեզմանէն, եւ յարոյց զնա ի մեռելոց։

Verse: 18   Link to gnt   Եւ վասն այնորիկ ընդ առաջ եղեւ նմա ժողովուրդն, զի լուան եթէ զայն նշանս արարեալ էր նորա։

Verse: 19   Link to gnt   Իսկ Փարիսեցիքն ասէին ընդ միմեանս. տեսանէք՝ զի ոչինչ օգտիք. ահաւասիկ աշխարհ ամենայն զկնի նորա գնաց։

Section: 27  
Verse: 20   Link to gnt   Էին անդ ոմանք եւ հեթանոսք յելելոցն անդր, զի երկիր պագանիցեն ի տօնին.

Verse: 21   Link to gnt   Նոքա մատեան առ Փիլիպպոս՝ որ ի Բեթսայիդայ Գալիլեացւոցն էր, աղաչէին զնա եւ ասէին. տէր՝ կամիմք զՅիսուս տեսանել։

Verse: 22   Link to gnt   Գայ Փիլիպպոս եւ ասէ ցԱնդրէաս։ Անդրէաս եւ Փիլիպպոս ասեն ցՅիսուս։

Verse: 23   Link to gnt   Եւ Յիսուս պատասխանի ետ նոցա՝ եւ ասէ. եհաս ժամ զի փառաւորեսցի որդի մարդոյ։

Section: 28  
Passage: 7-2 
Verse: 24   Link to gnt   Ամէն ամէն ասեմ ձեզ. եթէ ոչ հատն ցորենոյ անկեալ յերկիր մեռանիցի.

Verse: 25   Link to gnt   Ինքն միայն կայ. ապա թէ մեռանիցի, բազում արդիւնս առնէ։ Որ սիրէ զանձն իւր՝ արձակէ զնա. եւ որ ատեայ զանձն իւր յաշխարհիս յայսմիկ, ի կեանսն յաւիտենականս պահեսցէ զնա։

Verse: 26   Link to gnt   Եթէ ոք զիս պաշտիցէ, զկնի իմ եկեսցէ. եւ ուր եսն եմ, անդ եւ պաշտօնեայն իմ եղիցի։ Եթէ ոք զիս պաշտիցէ, պատուեսցէ զնա հայրն իմ։

Passage: 7-3 
Verse: 27   Link to gnt   Բայց այժմ անձն իմ խռովեալ է, եւ զինչ ասացից՝ եթէ հայր ապրեցո զիս ի ժամանակէ աստի յայսմանէ. այլ վասն այնորիկ եկի ի ժամս յայս։

Verse: 28   Link to gnt   Հայր՝ փառաւորեա զորդի քո։ Եկն բարբառ յերկնից. եւ փառաւոր արարի, եւ դարձեալ փառաւոր արարից։

Verse: 29   Link to gnt   Եւ ժողովուրդն որ կայր եւ լսէր. ասէին որոտումն լինել։ Կէսքն ասէին, հրեշտակ խօսեցաւ ընդ նմա։

Verse: 30   Link to gnt   Պատասխանի ետ Յիսուս՝ եւ ասէ. ոչ վասն իմ ինչ եկն բարբառս այս, այլ վասն ձեր։

Verse: 31   Link to gnt   Այժմիկ դատաստան է աշխարհիս այսորիկ. այժմիկ իշխան աշխարհիս այսորիկ ընկեսցի արտաքս։

Verse: 32   Link to gnt   Եւ ես՝ յորժամ բարձրացայց յերկրէ, զամենեսին ձգեցից առ իս։

Verse: 33   Link to gnt   Զայս ասէր, նշանակեալ թէ որով մահու մեռանելոց իցէ։

Verse: 34   Link to gnt   Պատասխանի ետ նմա ժողովուրդն. մեք լուաք յօրինաց՝ եթէ Քրիստոսն յաւիտեան կայ, եւ դու զիարդ ասես՝ թէ պարտ է բարձրանալ որդւոյ մարդոյ. ով է այն որդին մարդոյ։

Verse: 35   Link to gnt   Ասէ ցնոսա Յիսուս. փոքր մեւս ժամանակ լոյս ընդ ձեզ է. գնացէք մինչդեռ զլոյսն ունիք, զի մի խաւար ձեզ հասցէ. զի որ գնայ ի խաւարի, ոչ գիտէ յո երթայ։

Verse: 36   Link to gnt   Մինչդեռ զլոյսն ընդ ձեզ ունիք՝ հաւատացէք ի լոյսն զի որդիք լուսոյ եղիջիք։ Զայս խօսեցաւ Յիսուս, եւ չոգաւ՝ թաքեաւ ի նոցանէ։

Verse: 37   Link to gnt   Եւ այնչափ նշանս արարեալ էր առաջի նոցա. եւ նոքա ոչ հաւատային ի նա.

Verse: 38   Link to gnt   Զի լցցի բանն Եղայայ մարգարէի՝ զոր ասացն. Տէր ո հաւատաց ի լուր մեր, եւ բազուկ տ(եառ)ն ում յայտնեցաւ։

Verse: 39   Link to gnt   Վասն այնորիկ ոչ կարէին հաւատալ, զի միւսանգամ ասէ Եսայի.

Verse: 40   Link to gnt   Թէ կուրացոյց զաչս նոցա, եւ ափշեցոյց զսիրտս նոցա. զի մի տեսցեն աչօք, եւ իմասցին սրտիւք, եւ դարձցին՝ եւ բժշկեցից զնոսա։

Verse: 41   Link to gnt   Զայս ասաց Եսայի՝ զի ետես զփառսն նորա, եւ խօսեցաւ վասն նորա։

Verse: 42   Link to gnt   Բայց սակայն եւ յիշխանաց անտի բազումք հաւատացին ի նա. այլ վասն Փարիսեցւոցն ոչ յայտնէին, զի մի ի ժողովրդենէն ելանիցեն։

Verse: 43   Link to gnt   Քանզի սիրեցին զփառս մարդկան, առաւել քան զփառս Աստուծոյ։

Passage: 7-4 
Verse: 44   Link to gnt   Եւ Յիսուս աղաղակէր եւ ասէր. որ հաւատայ յիս. ոչ հաւատայ յիս, այլ յայն որ առաքեացն զիս։

Verse: 45   Link to gnt   Եւ որ տեսանէ զիս, զայն տեսանէ որ առաքեացն զիս։

Section: 29  
Verse: 46   Link to gnt   Ես լոյս յաշխարհ եկի. զի ամենայն որ հաւատայ յիս ի խաւարի մի մնասցէ։

Verse: 47   Link to gnt   Եւ եթէ ոք լուիցէ բանից իմոց՝ եւ ոչ պահեսցէ, ես ոչ դատիմ զնա. քանզի ոչ եկի թէ դատեցայց զաշխարհ, այլ զի փրկեցից զաշխարհ։

Verse: 48   Link to gnt   Որ անարգէ զիս. եւ ոչ ընդունի զբանս իմ. գոյ որ դատի զնա. բանն զոր ես խօսեցայ՝ նա դատի զնա յաւուրն յետնում։

Verse: 49   Link to gnt   Զի ես յանձնէ իմմէ ոչ խօսեցայ. այլ որ առաքեացն զիս հայր, նա ետ ինձ պատուէր՝ զինչ ասացից եւ զինչ խօսեցայց։

Verse: 50   Link to gnt   Եւ գիտեմ եթէ պատուէրն այն կեանք են յաւիտենականք։ Արդ՝ զոր եսն խօսիմ, որպէս ասաց ինձ հայրն, այնպէս խօսիմ։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.