TITUS
Armenian NT (Zohrab Bible)
Part No. 46
Previous part

Chapter: 2 
(Բ՜)


Section: 1 
Verse: 1   Link to gnt   Եւ եղեւ ընդ աւուրսն ընդ այնոսիկ ել հրաման յԱւգոստոս կայսերէ՝ աշխարհագիր առնել ընդ ամենայն տիեզերս։

Verse: 2   Link to gnt   Այս՝ առաջին աշխարհագիր եղեւ ի դատաւորութեան Ասորւոց՝ Կիւրէնեայ։

Verse: 3   Link to gnt   Եւ երթային ամենեքեան մտանել յաշխարհագիր յիւրաքանչիւր քաղաքի։

Verse: 4   Link to gnt   Ել Յովսէփ ի Գալիլեէ ի քաղաքէ Նազարեթէ ի Հրէաստան, ի քաղաք Դաւթի, որ կոչի Բեթղահէմ. վասն լինելոյ նորա ի տանէ եւ յազգէ Դաւթի,

Verse: 5   Link to gnt   Մտանել յաշխարհագիր Մարեմաւ հանդերձ զոր խօսեցեալն էր նմա, եւ էր յղի։

Verse: 6   Link to gnt   Եւ եղեւ ի հասանելն նոցա անդր, լցան աւուրք ծնանելոյ նորա։

Verse: 7   Link to gnt   Եւ ծնաւ զորդին իւր զանդրանիկ, եւ պատեաց ի խանձարուրս, եւ եդ զնա ի մսուր. զի ոչ գոյր նոցա տեղի յիջավանին։

Section: 2 
Verse: 8   Link to gnt   Եւ հովիւք էին ի տեղւոջն յայնմիկ բացօթեագք որ պահէին զպահպանութիւնս գիշերոյ հօտից իւրեանց։

Verse: 9   Link to gnt   Եւ հրեշտակ տեառն երեւեցաւ նոցա, եւ փառք տեառն ծագեցին առ նոսա. եւ երկեան՝ երկեւղ մեծ։

Verse: 10   Link to gnt   Եւ ասէ ցնոսա հրեշտակն. մի երկնչիք, զի ահաւասիկ աւետարանեմ ձեզ ուրախութիւն մեծ, որ եղիցի ամենայն ժողովրդեանն.

Verse: 11   Link to gnt   Զի ծնաւ ձեզ այսօր փրկիչ, որ է օծեալ տէր. ի քաղաքի Դաւթի։

Verse: 12   Link to gnt   Եւ այս նշանակ ձեզ. գտանիցէք մանուկ պատեալ ի խանձարուրս, եւ եդեալ ի մսուր։

Verse: 13   Link to gnt   Եւ յանկարծակի եղեւ ընդ հրեշտակին ընդ այնմիկ բազմութիւն զօրաց երկնաւորաց, որ օրհնէին զԱստուած՝ եւ ասէին։

Verse: 14   Link to gnt   Փառք ի բարձունս Աստուծոյ, եւ յերկիր խաղաղութիւն, ի մարդիկ հաճութիւն։

Verse: 15   Link to gnt   Եւ եղեւ իբրեւ վերացան ի նոցանէ հրեշտակքն յերկինս, ասեն ցմիմեանս հովիւքն. եկայք երթիցուք մինչեւ ցԲեթղահէմ, եւ տեսցուք զինչ է բանս այս որ եղեւ. զոր տէր եցոյց մեզ։

Verse: 16   Link to gnt   Եւ եկին փութանակի, եւ գտին զՄարիամ եւ զՅովսէփ, եւ զմանուկն եդեալ ի մսուր։

Verse: 17   Link to gnt   Եւ ծանեան վասն բանին՝ որ ասացաւ նոցա զմանկանէն։

Verse: 18   Link to gnt   Եւ ամենեքին որ լսէին՝ զարմանային վասն բանիցն՝ զոր խօսեցան ընդ նոսա հովիւքն։

Verse: 19   Link to gnt   Եւ Մարիամ զամենայն զբանս զայսոսիկ պահէր, եւ խելամուտ լինէր ի սրտի իւրում։

Verse: 20   Link to gnt   Եւ դարձան հովիւքն՝ փառաւոր առնէին եւ օրհնէին զԱստուած, վասն ամենայնի զոր լուան եւ տեսին, որպէս պատմեցաւ նոցա։

Verse: 21   Link to gnt   Եւ իբրեւ լցան աւուրք ութ թլփատել զնա, եւ կոչեցաւ, անուն նորա Յիսուս. որ կոչեցեալ էր ի հրեշտակէն, մինչչեւ յղացեալ էր զնա յորովայնի։

Verse: 22   Link to gnt   Եւ իբրեւ լցան աւուրք սրբութեան նոցա ըստ օրինացն Մովսիսի, ածին զնա յԵրուսաղէմ յանդիման առնել Տեառն։

Verse: 23   Link to gnt   Որպէս եւ գրեալ է յօրէնս տեառն, թէ ամենայն արու որ բանայ զարգանդ՝ սուրբ տեառն կոչեսցի։

Verse: 24   Link to gnt   Եւ տալ պատարագս՝ ըստ ասացելոյն յօրէնս տեառն, զոյգս տատրակաց, կամ երկուս ձագս աղաւնեաց։

Section: 3 
Verse: 25   Link to gnt   Եւ ահա՝ էր այր մի յԵրուսաղէմ, որոյ անուն էր Սիմէովն. եւ էր այրն արդար եւ երկիւղած, եւ ակն ունէր մխիթարութեանն Իսրաէլի, եւ հոգի սուրբ էր ի նմա։

Verse: 26   Link to gnt   Եւ էր նորա հրաման առեալ ի հոգւոյն սրբոյ՝ մի տեսանել զմահ, մինչեւ տեսցէ զօծեալն տեառն։

Verse: 27   Link to gnt   Եւ եկն հոգւովն ի տաճարն։ Եւ իբրեւ ածին ծնօղքն զմանուկն Յիսուս, առնել նոցա ըստ սովորութեան օրինացն ի վերայ նորա.

Verse: 28   Link to gnt   Եւ նա՝ առ ընկալաւ զնա ի գիրկս իւր, եւ օրհնեաց զԱստուած, եւ ասէ.

Verse: 29   Link to gnt   Արդ՝ արձակես զծառայս քո տէր ըստ բանի քում ի խաղաղութիւն.

Verse: 30   Link to gnt   Զի տեսին աչք իմ զփրկութիւն քո.

Verse: 31   Link to gnt   Զոր պատրաստեցեր առաջի ամենայն ժողովրդոց։

Verse: 32   Link to gnt   Լոյս ի յայտնութիւն հեթանոսաց, եւ փառս ժողովրդեան քում Իսրայէլի։

Verse: 33   Link to gnt   Եւ էին հայրն եւ մայր նորա զարմացեալ ի վերայ բանիցն, որ խօսէին զնմանէ։

Verse: 34   Link to gnt   Եւ օրհնեաց զնոսա Սիմէովն, եւ ասէ ցՄարիամ մայրն նորա. ահա սա կայ՝ ի գլորումն եւ ի կանգնումն բազմաց ի մէջ Իսրայէլի, եւ ի նշան հակառակութեան.

Verse: 35   Link to gnt   Եւ ընդ քո իսկ անձն անցցէ սուր. զի յայտնեսցին ի բազում սրտից խորհուրդք։

Section: 4 
Verse: 36   Link to gnt   Եւ անդ էր Աննա մարգարէ՝ դուստր Փանուելի յազգէ Ասերայ. սա ինքն անցեալ էր զաւուրբք բազմօք, կեցեալ ընդ առն ամս եւթն ի կուսութենէ իւրմէ։

Verse: 37   Link to gnt   Եւ էր՝ այրի ամաց իբրեւ ութսուն եւ չորից. որ ոչ մեկնէր ի տաճարէն, այլ պահօք եւ աղօթիւք պաշտէր զցայգ եւ զցերեկ։

Verse: 38   Link to gnt   Եւ սա ի նմին ժամու յարուցեալ. գոհանայր զտեառնէ, եւ խօսէր զնմանէ ընդ ամենեսին՝ որ ակն ունէին փրկութեանն Երուսաղէմի։

Verse: 39   Link to gnt   Եւ իբրեւ կատարեցին զամենայն ըստ օրինացն տեառն, դարձան անդրէն ի Գալիլեա ի քաղաքն իւրեանց Նազարեթ։

Verse: 40   Link to gnt   Եւ մանուկն աճէր եւ զօրանայր լի իմաստութեամբ. եւ շնորհք Աստուծոյ էին ի վերայ նորա.

Verse: 41   Link to gnt   Եւ երթային ծնօղքն նորա ամի ամի՝ յԵրուսաղէմ ի տօն զատկին։

Verse: 42   Link to gnt   Եւ իբրեւ եղեն նորա ամք երկոտասան, յելանել նոցա յԵրուսաղէմ ըստ սովորութեան տօնին։

Verse: 43   Link to gnt   Եւ կատարել զաւուրսն՝ եւ դառնալ անդրէն, մնաց Յիսուս մանուկն, յԵրուսաղէմ. եւ ոչ գիտացին ծնօղքն նորա։

Verse: 44   Link to gnt   Կարծէին զնմանէ՝ թէ ընդ ուղեկիցսն իցէ. եկին իբրեւ աւուր միոյ ճանապարհ, եւ խնդրէին զնա ընդ դրացիս եւ ընդ ծանօթս,

Verse: 45   Link to gnt   Եւ իբրեւ ոչ գտին, դարձան անդրէն յԵրուսաղէմ խնդրել զնա։

Verse: 46   Link to gnt   Եւ եղեւ յետ երից աւուրց, գտին զնա ի տաճարին զի նստէր ընդ վարդապետսն, լսէր ի նոցանէ՝ եւ հարցանէր զնոսա. Զարմանային ամենեքեան որ լսէինն ի նմանէ՝ ընդ իմաստութիւնն եւ ընդ պատասխանիս նորա։

Verse: 47   Link to gnt   Եւ իբրեւ տեսին զնա՝ սքանչացան։ Եւ ասէ ցնա մայրն իւր. որդեակ՝ զինչ գործ գործեցեր դու ընդ մեզ. ահաւասիկ հայր քո եւ ես՝ տառապեաք խնդրեաք զքեզ։

Verse: 48   Link to gnt   Եւ ասէ ցնոսա. զի խնդրէիք զիս ոչ գիտէիք եթէ ի տան հօր իմոյ պարտ է ինձ լինել։

Verse: 49   Link to gnt   Եւ նոքա՝ ոչ իմացան զբանն զոր խօսեցաւ ընդ նոսա։

Verse: 50   Link to gnt   Եւ էջ ընդ նոսա, եւ գնաց ի Նազարեթ. եւ էր նոցա հնազանդ, եւ մայրն նորա պահէր զամենայն զբանսն ի սրտի իւրում։

Verse: 51   Link to gnt   Եւ Յիսուս զարգանայր իմաստութեամբ եւ հասակաւ՝ եւ շնորհօք յԱստուծոյ եւ ի մարդկանէ։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.