TITUS
Armenian NT (Zohrab Bible)
Part No. 42
Previous part

Chapter: 14  
(Ժ՜Դ)


Passage: 7-7 
Verse: 1   Link to gnt   Եւ էր զատիկն եւ բաղարջակերք յետ երկուց աւուրց։ խնդրէին քանահայապետքն եւ դպիրք՝ եթէ զիարդ զնա նենգաւ կալեալ սպանանիցեն։

Verse: 2   Link to gnt   Բայց ասէին՝ թէ մի՝ ի տօնի աստ, զի մի խռովութիւն լինիցի ժողովրդեանն։

Section: 44  
Verse: 3   Link to gnt   Եւ մինչ էր ի բեթանաիա ի տան սիմովնի բորոտի բազմեալ, եկն կին մի որ ունէր շիշ իւղոյ նարդեան ազնուի մեծագնոյ, եւ բեկեալ զշիշն՝ եհեղ ի վերայ գլխոյ նորա։

Verse: 4   Link to gnt   Եւ աշակերտքն՝ զչարէին եւ ասէին. ընդէր է կորուստ իւղոյդ այդորիկ։

Verse: 5   Link to gnt   Մարթ էր զայդ եւղ վաճառել՝ եւ աւելի քան երեք հարեւր դահեկանի, եւ տալ աղքատաց։ եւ զայրանային նմա յոյժ։

Verse: 6   Link to gnt   Եւ Յիսուս՝ ասէ ցնոսա. թոյլ տուք դմա. զի աշխատ առնէք, զի գործ մի՝ բարի գործեաց դա յիս։

Verse: 7   Link to gnt   Յամենայն ժամ աղքատս ընդ ձեզ ունիք, եւ յորժամ կամիք՝ կարօղ էք առնել նոցա բարիս. այլ զիս՝ ոչ յամենայն ժամ ընդ ձեզ ունիք։

Verse: 8   Link to gnt   Դա՝ զոր ունէրդ, արար. յառաջագոյն խնգեաց զմարմին իմ ի նշան պատանաց։

Verse: 9   Link to gnt   Ամէն ասեմ ձեզ. ուր եւ քարոզեսցի աւետարանս այս ընդ ամենայն աշխարհ, եւ զոր արար դա՝ խօսեսցի վասն յիշատակի դորին։

Verse: 10   Link to gnt   Եւ յուդա սկարիովտացի մի յերկոտասանից անտի, գնաց առ քահանայապետսն՝ զի մատնեսցէ զնա նոցա։

Verse: 11   Link to gnt   Նոքա իբրեւ լուան խնդացին, եւ խոստացան նմա տալ արծաթ, եւ խնդրէր՝ թէ զիարդ պարապով մատնեսցէ զնա։

Section: 45  
Verse: 12   Link to gnt   Եւ յառաջնում աւուր բաղարջակերացն՝ յորժամ զզատիկն զենուին, ասեն ցնա աշակերտքն. ուր կամիս՝ երթիցուք պատրաստեցուք, զի կերիցես զզատիկն.

Verse: 13   Link to gnt   Եւ առաքէ երկուս յաշակերտաց անտի՝ եւ ասէ ցնոսա. երթայք ի քաղաքն, եւ իբրեւ մտանիցէք ի քաղաքն՝ պատահեսցէ ձեզ այր մի, որ սափոր ջրոյ յուս ունիցի, երթայք զհետ նորա։

Verse: 14   Link to gnt   Եւ յոր տուն մտանիցէ, ասասջիք ցտանուտէրն. վարդապետ ասէ՝ ուր են իջավանքն, ուր աշակերտօքն ուտիցեմ զզատիկն.

Verse: 15   Link to gnt   Եւ նա ցուցցէ ձեզ վերնատուն մի մեծ՝ զարդարեալ. անդ պատրաստեսջիք մեզ։

Verse: 16   Link to gnt   Եւ գնացին պատրաստել աշակերտքն նորա. եկին ի քաղաքն եւ գտին որպէս ասացն նոցա. եւ պատրաստեցին զզատիկն։

Verse: 17   Link to gnt   Եւ իբրեւ երեկոյ եղեւ՝ գայ երկոտասանիւքն հանդերձ։

Section: 46  
Verse: 18   Link to gnt   Եւ իբրեւ բազմեցան՝ եւ դեռ ուտէին, ասէ Յիսուս. ամէն ասեմ ձեզ՝ զի մի ոմն ի ձէնջ՝ մատնելոց է զիս, որ ուտէ իսկ ընդ իս։

Verse: 19   Link to gnt   Եւ նոքա սկսան տրտմել՝ եւ ասել մի ըստ միոջէ. մի թէ ես իցեմ. եւ մեւսն՝ միթէ՝ ես իցեմ։

Verse: 20   Link to gnt   Նա պատասխանի ետ՝ եւ ասէ ցնոսա. մի յերկոտասանից այտի, որ մխեաց ընդ իս ի սկաւառակդ։

Verse: 21   Link to gnt   Այլ որդի մարդոյ երթայ՝ որպէս եւ գրեալ է վասն նորա. բայց վայ իցէ մարդոյն այնմիկ՝ յոյր ձեռս որդին մարդոյ մատնեսցի։ լաւ էր նմա եթէ չէր իսկ ծնեալ մարդն այն։

Verse: 22   Link to gnt   Եւ մինչ դեռ ուտէին, առեալ Յիսուս հաց՝ օրհնեաց եւ եբեկ՝ ետ նոցա՝ եւ ասէ. առէք՝ այդ է մարմին իմ։

Verse: 23   Link to gnt   Եւ առեալ բաժակ՝ գոհացաւ ետ նոցա, եւ արբին ի նմանէ ամենեքեան։

Verse: 24   Link to gnt   Եւ ասէ ցնոսա. այս է արիւն իմ նորոյ ուխտի, որ փոխանակ բազմաց հեղու։

Verse: 25   Link to gnt   Ամէն ասեմ ձեզ, թէ ոչ եւս յաւելից ըմպել ի բերոյ որթոյ, մինչեւ ցօրն ցայն՝ յորժամ արբից զնա նոր յարքայութեան Աստուծոյ։

Verse: 26   Link to gnt   Եւ գոհացեալ՝ ելին ի լեառն ձիթենեաց։

Passage:  
Verse: 27   Link to gnt   Եւ ասէ ցնոսա Յիսուս. ամենեքին գայթագղելոց էք յինէն յայսմ գիշերի. զի գրեալ է, թէ հարից զհովիւն՝ եւ զոչխարքն ցրուեսցին։

Verse: 28   Link to gnt   Այլ յետ յարութեան իմոյ՝ յառաջագոյն երթայց քան զձեզ ի գալիլեա։

Verse: 29   Link to gnt   Պատասխանի ետ պետրոս՝ եւ ասէ ցնա. թէպէտ եւ ամենեքեան գայթագղեսցին, այլ ես՝ ոչ։

Verse: 30   Link to gnt   Եւ ասէ ցնա Յիսուս. ամէն ասեմ քեզ. թէ դու իսկ՝ յայսմ գիշերի մինչչեւ հաւու խօսեալ իցէ՝ երիցս ուրասցես զիս։

Verse: 31   Link to gnt   Իսկ պետրոս առաւել եւս պնդէր եւ ասէր. եթէ մեռանել եւս հասանիցէ ընդ քեզ, զքեզ ոչ ուրացայց։ Նոյնպէս եւ ամենեքեան ասէին։

Verse: 32   Link to gnt   Գան ի գեղն՝ որում անուն էր՝ գեսեմանի. եւ ասէ ցաշակերտսն. նստարուք աստ՝ մինչեւ ես յաղօթս կացից։

Verse: 33   Link to gnt   Եւ առնու ընդ իւր զպետրոս եւ զյակովբոս եւ զյովհաննէս, եւ սկսաւ տխրել՝ եւ հոգալ։

Verse: 34   Link to gnt   Յայնժամ ասէ ցնոսա. տրտում է անձն իմ մինչեւ ի մահ, մնացէք աստ՝ եւ արթուն կացէք։

Verse: 35   Link to gnt   Եւ մատուցեալ սակաւիկ մի յառաջ, անկաւ ի վերայ երեսաց իւրոց յերկիր. եւ կայր յաղօթս, զի եթէ հնար ինչ է՝ անցցէ ի նմանէ ժամն։

Verse: 36   Link to gnt   Եւ ասէ. աբբա, հայր ամենայն ինչ՝ քեզ հնարաւոր է, անցո զբաժակս զայս յինէն։ Բայց ոչ որպէս ես կամիմ՝ այլ որպէս դու կամիս։

Verse: 37   Link to gnt   Եւ գայ՝ գտանէ զնոսա զի ննջէին, եւ ասէ ցպետրոս. սիմովն ննջես. ոչ կարացեր ժամ մի արթուն կալ։

Verse: 38   Link to gnt   Արթուն կացէք եւ յաղօթս կացէք, զի մի մտջիք ի փորձութիւն ոգիս յօժար է՝ բայց մարմինս տկար։

Verse: 39   Link to gnt   Եւ դարձեալ՝ չոգաւ եկաց յաղօթս, եւ զնոյն բանս ասաց։

Verse: 40   Link to gnt   Դարձաւ միւսանգամ անդրէն՝ եւ եգիտ զնոսա ի քուն. քանզի էին աչք նոցա ծանրացեալ՝ եւ ոչ գիտէին թէ զինչ պատասխանի տայցեն նմա։

Verse: 41   Link to gnt   Գայ երրորդ անգամ, եւ ասէ ցնոսա. ննջեցէք այսուհետեւ եւ հանդերուք, զի հասեալ է վախճան։ Եկն ժամ, եւ ահա մատնի որդի մարդոյ ի ձեռս մեղաւորաց։

Verse: 42   Link to gnt   Աւն արիք գնասցուք. զի ահաւասիկ՝ մերձեցաւ որ մատնելոցն է զիս։

Verse: 43   Link to gnt   Եւ մինչ դեռ նա զայն խօսէր, գայ յուդա սկարիովտացի՝ մի յերկոտասանից անտի, եւ ընդ նմա ամբոխ սուսերօք եւ բրօք՝ ի քահանայապետիցն եւ ի դպրաց եւ ի ծերոց։

Verse: 44   Link to gnt   Տուեալ էր նշան մատնիչն՝ եւ ասէր. ընդ որում ես համբուրեցից՝ նա է. կալջիք զնա՝ եւ տարջիք զգուշութեամբ։

Verse: 45   Link to gnt   Եւ մատուցեալ վաղվաղակի՝ ասէ ցնա. ռաբբի, ռաբբի. եւ համբուրեաց զնա։

Verse: 46   Link to gnt   Եւ նոքա արկին ի նա ձեռս՝ եւ կալան զնա։

Verse: 47   Link to gnt   Եւ մի ոմն յայնցանէ որ զնովաւն կային՝ ձգեաց սուր, եւ եհար զծառայ քահանայապետին, եւ եհան զունկն նորա։

Verse: 48   Link to gnt   Պատասխանի ետ Յիսուս եւ ասէ ցնոսա. իբրեւ ի վերայ աւազակի ելէք սուսերօք եւ բրօք՝ ունել զիս։

Verse: 49   Link to gnt   Հանապազ առ ձեզ էի՝ եւ ուսուցանէի ի տաճարին, եւ ոչ կալարուք զիս. այլ զի լցցին գիրք մարգարէիցն։

Verse: 50   Link to gnt   Յայնժամ թողին զնա աշակերտքն ամենեքին՝ եւ փախեան։

Verse: 51   Link to gnt   Եւ ոմն երիտասարդ զհետ երթայր նորա՝ արկեալ զիւրեւ կտաւ մի ի մերկուց. ունէին զնա երիտասարդքն։

Verse: 52   Link to gnt   Եւ թողեալ զկտաւն՝ փախեաւ մերկ ի նոցանէ։

Verse: 53   Link to gnt   Եւ տարան զՅիսուս առ քահանայապետն կայիափա. եւ գային ընդ նմա ամենայն քահանայապետքն՝ եւ դպիրք եւ ծերք։

Verse: 54   Link to gnt   Եւ պետրոս երթայր իհեռաստանէ զհետ նորա՝ մինչեւ ի ներքս իսկ ի գաւիթ քահանայապետին. եւ նստէր ընդ սպասաւորսն, եւ ջեռնոյր առ լուսովն։

Verse: 55   Link to gnt   Իսկ քանահայապետքն՝ եւ ամենայն ատեանն՝ խնդրէին հակառակ Յիսուսի վկայութիւն ինչ, զի սպանանիցեն զնա. եւ ոչ գտանէին։

Verse: 56   Link to gnt   Զի բազում սուտ վկայութիւն վկայէին զնմանէ, եւ նման միմեանց՝ ոչ էին վկայութիւնքն։

Verse: 57   Link to gnt   Այլք՝ յարուցեալ վկայէին սուտ զնմանէ, եւ ասէին։

Verse: 58   Link to gnt   Թէ մեք լուաք ի դմանէ զի ասէր. ես քակեցից զտաճարդ զայդ ձեռագործ, եւ զերիս աւուրս շինեցից այլ առանց ձեռագործի։

Verse: 59   Link to gnt   Սակայն եւ այնպէս՝ չէր նման վկայութիւնն նոցա։

Verse: 60   Link to gnt   Ապա յարուցեալ քահանայապետն՝ ի մէջ՝ հարցանէր զՅիսուս եւ ասէր, ոչ ինչ տաս պատասխանի, զինչ դոքա զքէն վկայեն։

Verse: 61   Link to gnt   Եւ նա՝ լուռ եւ եթ կայր՝ եւ չտայր ինչ պատասխանի։ Դարձեալ քահանայապետն հարցանէր զնա կրկին անգամ եւ ասէր. դու ես Քրիստոս որդի Աստուծոյ օրհնելոյն։

Verse: 62   Link to gnt   Պատասխանի ետ Յիսուս՝ եւ ասէ ցնա. դու ասացեր թէ ես եմ։ բայց տեսանիցէք զորդի մարդոյ նստեալ ընդ աջմէ զօրութեան, եւ եկեալ ընդ ամպս երկնից։

Verse: 63   Link to gnt   Եւ քահանայապետն պատառեաց վաղվաղակի զպատմուճանս իւր՝ եւ ասէ։ Զինչ եւս պիտոյ են մեզ վկայք,

Verse: 64   Link to gnt   Ահա լուայք ամենեքին զհայհոյութիւն ի բերանոյ դորա. զիարդ թուի ձեզ։ Եւ ամենեքեան դատապարտեցին զնա՝ թէ մահապարտ է։

Verse: 65   Link to gnt   Եւ ոմանք՝ սկսան թքանել ընդ երեսս նորա։ ձորձ զգլխով արկանել՝ կռփել եւ ասել, մարգարեաց մեզ Քրիստոսդ՝ ով է այն որ եհարն զքեզ։ եւ սպասաւորքն ապտակս հանէին նմա։

Verse: 66   Link to gnt   Եւ պետրոս մինչ դեռ էր ի խոնարհ ի գաւթին,գայ աղախին մի քահանայապետին,

Verse: 67   Link to gnt   եւ տեսանէ զնա զի ջեռնոյր. հայեցաւ ընդ նա՝ եւ ասէ. եւ դու ընդ Յիսուսի նազովրեցւոյ էիր։

Section: 47 
Verse: 68   Link to gnt   Նա՝ ուրացաւ եւ ասէ. ոչ ճանաչեմ. եւ ոչ գիտեմ զինչ դուդ ասես։ Եւ իբրեւ ել յարտաքին գաւիթն, եւ հաւ խօսեցաւ։

Verse: 69   Link to gnt   Դարձեալ ետես զնա աղախինն, եւ սկսաւ ասել ցայնորիկ որ շուրջ կային, թէ եւ սա ի նոցանէ է։

Verse: 70   Link to gnt   Եւ նա դարձեալ ուրացաւ։։ Եւ յետ սակաւ միոյ՝ դարձեալ որ շուրջն կային ասեն ցպետրոս. արդարեւ եւ դու ի նոցանէ ես. քանզի գալիլեացի ես, եւ խօսքդ իսկ քո նման են։

Verse: 71   Link to gnt   Եւ սկսաւ նզովել՝ երդնուլ եւ ասել, թէ ոչ գիտեմ զայրն՝ զորմէ դուքդ ասէք։

Verse: 72   Link to gnt   Եւ նոյն ժամոյն կրկին հաւ խօսեցաւ։ Եւ յիշեաց պետրոս զբանն՝ զոր ասաց ցնա Յիսուս. թէ չեւ իցէ հաւու երիցս խօսեալ զի դու երիցս ուրասցես զիս եւ սկսաւ լալ։



Next part


This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.