TITUS
Armenian NT (Zohrab Bible)
Part No. 39
Previous part

Chapter: 11  
(Ժ՜Ա)


Section: 32  
Verse: 1   Link to gnt   Եւ յորժամ մերձ եղեն յերուսաղէմ ի բեթփագէ եւ ի բեթանիա մօտ ի լեառն ձիթենեաց, առաքէ երկուս յաշակերտաց անտի.

Verse: 2   Link to gnt   
Եւ ասէ ցնոսա. երթայք դուք ի գեղդ՝ որ ընդդէմ ձեր կայ. եւ նոյն ժամայն իբրեւ մտանէք ի նա, գտանիցէք յաւանակ մի կապեալ, յորոյ վերայ ոչ ոք ի մարդկանէ նստաւ. լուծէք զնա՝ եւ ածէք։

Verse: 3   Link to gnt   
Եւ եթէ ոք ասասցէ զձեզ՝ թէ զի լուծանէք զյաւանակդ, ասասջիք՝ թէ տեառն իւրում պիտոյ է, եւ վաղվաղակի առաքեսցէ զնա այսր։

Verse: 4   Link to gnt   
Չոքան՝ եւ գտին զյաւանակն կապեալ առ դուրս արտաքոյ ի փողոցի անդ, եւ լուծին զնա։

Verse: 5   Link to gnt   
Եւ ոմանք յորոց անդն կային, ասեն ցնոսա. զի լուծանէք զյաւանակդ։

Verse: 6   Link to gnt   
Եւ նոքա՝ ասեն ցնոսա որպէս ասացն Յիսուս. եւ թոյլ ետուն նոցա։

Verse: 7   Link to gnt   
Ածեն զյաւանակն առ Յիսուս. եւ արկանեն ի վերայ նորա զհանդերձս, եւ նստաւ ի վերայ նորայ։

Verse: 8   Link to gnt   
Եւ բազումք զհանդերձս իւրեանց տարածանէին ի վերայ ճանապարհին։ եւ այլք ոստս ի ծառոց հատանէին՝ եւ արկանաէին զճանապարհաւն։

Verse: 9   Link to gnt   
Եւ առաջին՝ եւ զկնի երթային, աղաղակէին եւ ասէին. ովսաննա բարձրելոյն։

Verse: 10   Link to gnt   
Օրհնեալ որ գասդ յանուն տեառն. օրհնեալ թագաւորութիւնդ եկեալ հօր մերոյ դաւթի. խաղաղութիւն յերկինս՝ եւ փառք ի բարձունս։

Verse: 11   Link to gnt   
Եւ եմուտ Յիսուս յերուսաղէմ, ի տաճարն, եւ հայեցաւ շուրջ զամենեքումբք. եւ զի էր երեկոյացեալ ժամն, ել ի բեթանիա երկոտասանիւքն հանդերձ։

Section: 33  
Passage: 7-2 
Verse: 12   Link to gnt   
Եւ ի վաղիւ անդր մինչ դեռ ելանէին ի բեթանիայ՝ քաղցեաւ։

Verse: 13   Link to gnt   
եւ ետես թզենի մի ի բացուստ տերեւալից. եւ եկն թէ գտանիցէ ինչ ի նմա. եւ իբրեւ եկն ի նմա ոչինչ եգիտ՝ բայց միայն տերեւ. զի ոչ իսկ էր ժամանակ թզոյ։

Verse: 14   Link to gnt   
Պատասախանի ետ՝ եւ ասէ ցնա. մի եւս ոք՝ յաւիտեան ի քէն պտուղ կերիցէ։ եւ լսէին աշակերտքն նորա։

Verse: 15   Link to gnt   
Գան ի խերուսաղէմ. եւ մտեալ ի տաճարն՝ սկսաւ հանել զվաճառականսն եւ զգնօղս՝ որ էին ի տաճարին. եւ զսեղանս հատավաճարացն ցրուեաց, եւ զաթոռս աղաւնեվաճառացն կործանեաց.

Verse: 16   Link to gnt   
Եւ ոչ թողոյր՝ եթէ ոք անօթ ինչ անցուցանիցէ ընդ տաճարն։

Verse: 17   Link to gnt   
Ուսուցանէր զնոսա եւ ասէր. գրեալ է, թէ տունդ իմ տուն աղօթից կոչեսցի ամենայն հեթանոսաց, եւ դուք արարէք զդա այրս աւազակաց։

Verse: 18   Link to gnt   
Լուան քահանայապետքն եւ դպիրք, եւ խնդրէին թէ որպէս կորուսցեն զնա, բայց երկնչէին ի նմանէ. զի ամենայն ժողովուրդն զարմացեալ էր ընդ ուսումն նորա։

Verse: 19   Link to gnt   
Եւ իբրեւ երեկոյ լինէր՝ արտաքոյ քան զքաղաքն ելանէին։

Verse: 20   Link to gnt   
Եւ մինչ դեռ այգուցն առ նովաւ անցանէին, տեսին զթզենին ցամաքեալ յարմատոց։

Verse: 21   Link to gnt   
Յիշեաց պետրոս՝ եւ ասէ ցնա. ռաբբի՝ ահաւասիկ թզենին զոր անիծեր՝ ցամաքեցաւ։

Verse: 22   Link to gnt   
Պատասխանի ետ Յիսուս եւ ասէ ցնոսա. եթէ ունիցիք զհաւատսն Աստուծոյ,

Verse: 23   Link to gnt   
Ամէն ասեմ ձեզ, որոք ասիցէ լերինս այսմիկ՝ բարձիր եւ անկիր ի ծով, եւ ոչ երկմտիցէ ի սրտի իւրում, այլ հաւատայցէ թէ զոր ասէն լինի, եղիցի նմա զոր ինչ եւ ասիցէ։

Verse: 24   Link to gnt   
Վասն այսորիկ ասեմ ձեզ. զամենայն ինչ վասն որոյ աղօթս արարեալ խնդրիցէք, եւ հաւատայցէք թէ առնուք, եղիցի ձեզ։

Section: 34  
Verse: 25   Link to gnt   
Եւ յորժամ յաղօթս կայցէք, թողուցուք եթէ ունիցիք ինչ զումեքէ. զի եւ հայրն ձեր որ յերկինս է, թողցէ ձեզ զյանցանս ձեր։

Verse: 26   Link to gnt   


Section: 35  
Passage: 7-3 
Verse: 27   Link to gnt   
Գան միւսանգամ ի յերուսաղէմ. եւ մինչ դեռ ի տաճարի անդ զգնայր, գան առ նա քահանայապետքն եւ դպիրք եւ ծերք,

Verse: 28   Link to gnt   
եւ ասեն ցնա. որով իշխանութեամբ առնես զայդ, եւ ով ետ քեզ զիշխանութիւնդ զայդ։

Verse: 29   Link to gnt   
Պատասխանի ետ Յիսուս՝ եւ ասէ ցնոսա. Հարցից եւ ես զձեզ բան մի, տուք ինձ պատասխանի. եւ ես ասացից ձեզ՝ որով իշխանութեամբ առնեմ զայս։

Verse: 30   Link to gnt   
Մկրտութիւն յովհաննու յերկնից էր՝ թէ ի մարդկանէ, տուք ինձ պատասխանի։

Verse: 31   Link to gnt   
Խորհէին ընդ միմեանս՝ եւ ասէին. եթէ ասեմք եթէ յերկնից, ասէ ցմեզ՝ իսկ ընդէր ոչ հաւատացէք նմա։

Verse: 32   Link to gnt   
Այլ եթէ ասեմք՝ ի մարդկանէ, երկնչիմք ի ժողովրդենէն. զի ամենեքին գիտէին զյովհաննէս՝ թէ մարգարէ էր։

Verse: 33   Link to gnt   
Պատասխանի ետուն եւ ասեն ցՅիսուս, չգիտեմք. Եւ Յիսուս ետ նոցա պատասխանի՝ եւ ասէ. եւ ոչ ես ասեմ ձեզ՝ որով իշխանութեամբ առնեմ զայս։



Next part



This text is part of the TITUS edition of Armenian NT (Zohrab Bible).

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.