TITUS
Rg-Veda: Rg-Veda-Samhita
Part No. 969
Previous part

Hymn: 132_(958) 
Verse: 1 
Halfverse: a    ई॑जा॒नमिद्द्यौर्गू॒र्ताव॑सुरीजा॒नम्भूमि॑र॒भि प्र॑भू॒षणि॑ ।
   ई॑जा॒नमिद्द्यौर्गू॒र्ताव॑सुर्
   ईजा॒नम् इत् द्यौः गू॒र्ताव॑सुः
   ईजा॒नम् इद् दि॒यौर् गू॒र्ताव॑सुर्

Halfverse: b    ईजा॒नम्भूमि॑र॒भि प्र॑भू॒षणि॑ ।
   ई॑जा॒नम् भूमिः अ॒भि प्र॑भू॒षणि ।
   ई॑जा॒नम् भूमि॑र् अ॒भि प्र॑भू॒षणि ।

Halfverse: c    ई॑जा॒नं दे॒वाव॒श्विना॑व॒भि सु॒म्नैर॑वर्धताम् ।।
   ई॑जा॒नं दे॒वाव॒श्विना॑व्
   ईजा॒नम् दे॒वौ अ॒श्विनौ
   ईजा॒नं दे॒वाव् अ॒श्विना॑व्

Halfverse: d    अ॒भि सु॒म्नैर॑वर्धताम् ।।
   अ॒भि सु॒म्नैः अ॑वर्धताम् ।।
   अ॒भि सु॒म्नैर् अवर्धताम् ।।


Verse: 2 
Halfverse: a    ता वा॑म्मित्रावरुणा धार॒यत्क्षि॑ती सुषु॒म्नेषि॑त॒त्वता॑ यजामसि ।
   ता वा॑म्मित्रावरुणा धार॒यत्क्षि॑ती
   ता वा॑म् मित्रावरुणा धार॒यत्क्षि॑ती
   ता वा॑म् मित्रावरुणा धार॒यत्क्षि॑ती

Halfverse: b    सुषु॒म्नेषि॑त॒त्वता॑ यजामसि ।
   सु॑षु॒म्ना इ॑षित॒त्वता यजामसि ।
   सु॑षु॒म्ना इ॑षित॒त्वता यजामसि ।

Halfverse: c    यु॒वोः क्रा॒णाय॑ स॒ख्यैर॒भि ष्या॑म र॒क्षसः॑ ।।
   यु॒वोः क्रा॒णाय॑ स॒ख्यैर्
   यु॒वोः क्रा॒णाय स॒ख्यैः
   यु॒वोः क्रा॒णाय सखि॒यैर्

Halfverse: d    अ॒भि ष्या॑म र॒क्षसः॑ ।।
   अ॒भि स्या॑म र॒क्षसः ।।
   अ॒भि षि॑याम र॒क्षसः ।।


Verse: 3 
Halfverse: a    अधा॑ चि॒न्नु यद्दिधि॑षामहे वाम॒भि प्रि॒यं रेक्णः॒ पत्य॑मानाः ।
   अधा॑ चि॒न्नु यद्दिधि॑षामहे वाम्
   अध+ चित् नु यत् दिधि॑षामहे वाम्
   अधा चिन् नु यद् दिधि॑षामहे वाम्

Halfverse: b    अ॒भि प्रि॒यं रेक्णः॒ पत्य॑मानाः ।
   अ॒भि प्रि॒यम् रेक्णः पत्य॑मानाः ।
   अ॒भि प्रि॒यं रेक॑णः पत्य॑मानाः ।

Halfverse: c    द॒द्वाँ वा॒ यत्पुष्य॑ति॒ रेक्णः॒ सम्वा॑र॒न्नकि॑रस्य म॒घानि॑ ।।
   द॒द्वाँ वा॒ यत्पुष्य॑ति॒ रेक्णः
   द॒द्वान् वा यत् पुष्य॑ति रेक्णः
   द॒द्वाँ वा यत् पुष्य॑ति रेक्णः

Halfverse: d    सम्वा॑र॒न्नकि॑रस्य म॒घानि॑ ।।
   सम् उ आरन् नकिः अस्य म॒घानि ।।
   सम् ऊ आरन् नकि॑र् अस्य म॒घानि ।।


Verse: 4 
Halfverse: a    अ॒साव॒न्यो अ॑सुर सूयत॒ द्यौस्त्वं विश्वे॑षां वरुणासि॒ राजा॑ ।
   अ॒साव॒न्यो अ॑सुर सूयत॒ द्यौस्
   अ॒सौ अ॒न्यः अ॑सुर सूयत द्यौः
   अ॒साव् अ॒न्यो अ॑सुर सूयत द्यौस्

Halfverse: b    त्वं विश्वे॑षां वरुणासि॒ राजा॑ ।
   त्वम् विश्वे॑षाम् वरुण असि राजा ।
   तु॒वं विश्वे॑षां वरुणासि राजा ।

Halfverse: c    मू॒र्धा रथ॑स्य चाक॒न्नैताव॒तैन॑सान्तक॒ध्रुक् ।।
   मू॒र्धा रथ॑स्य चाकन्
   मू॒र्धा रथ॑स्य चाकन्
   मू॒र्धा रथ॑स्य चाकन्

Halfverse: d    नैताव॒तैन॑सान्तक॒ध्रुक् ।।
   न ए॒ताव॑ता एन॑सा अन्तक॒ध्रुक् ।।
   नैताव॑ता एन॑सा अन्तक॒ध्रुक् ।।


Verse: 5 
Halfverse: a    अ॒स्मिन्स्वे॒तच्छक॑पूत॒ एनो॑ हि॒ते मि॒त्रे निग॑तान्हन्ति वी॒रान् ।
   अ॒स्मिन्स्वे॒तच्छक॑पूत॒ एनो
   अ॒स्मिन् सु ए॒तत् शक॑पूते एनः
   अ॒स्मिन् सु ए॒तच् छक॑पूत एनो

Halfverse: b    हि॒ते मि॒त्रे निग॑तान्हन्ति वी॒रान् ।
   हि॒ते मि॒त्रे निग॑तान् हन्ति वी॒रान् ।
   हि॒ते मि॒त्रे निग॑तान् हन्ति वी॒रान् ।

Halfverse: c    अ॒वोर्वा॒ यद्धात्त॒नूष्ववः॑ प्रि॒यासु॑ य॒ज्ञिया॒स्वर्वा॑ ।।
   अ॒वोर्वा॒ यद्धात्त॒नूष्व्
   अ॒वोः वा यत् धात् त॒नूषु
   अ॒वोर् वा यद् धात् त॒नूषु

Halfverse: d    अवः॑ प्रि॒यासु॑ य॒ज्ञिया॒स्वर्वा॑ ।।
   अवः प्रि॒यासु य॒ज्ञिया॑सु अर्वा ।।
   अवः प्रि॒यासु य॒ज्ञिया॑सु अर्वा ।।


Verse: 6 
Halfverse: a    यु॒वोर्हि मा॒तादि॑तिर्विचेतसा॒ द्यौर्न भूमिः॒ पय॑सा पुपू॒तनि॑ ।
   यु॒वोर्हि मा॒तादि॑तिर्विचेतसा
   यु॒वोः हि मा॒ता अदि॑तिः विचेतसा
   यु॒वोर् हि मा॒ता अदि॑तिर् विचेतसा

Halfverse: b    द्यौर्न भूमिः॒ पय॑सा पुपू॒तनि॑ ।
   द्यौः न भूमिः पय॑सा पुपू॒तनि ।
   दि॒यौर् न भूमिः पय॑सा पुपू॒तनि ।

Halfverse: c    अव॑ प्रि॒या दि॑दिष्टन॒ सूरो॑ निनिक्त र॒श्मिभिः॑ ।।
   अव॑ प्रि॒या दि॑दिष्टन
   अव प्रि॒या दि॑दिष्टन
   अव प्रि॒या दि॑दिष्टन

Halfverse: d    सूरो॑ निनिक्त र॒श्मिभिः॑ ।।
   सूरः निनिक्त र॒श्मिभिः ।।
   सूरो निनिक्त र॒श्मिभिः ।।


Verse: 7 
Halfverse: a    यु॒वं ह्य॑प्न॒राजा॒वसी॑दतं॒ तिष्ठ॒द्रथं॒ न धू॒र्षदं॑ वन॒र्षद॑म् ।
   यु॒वं ह्य॑प्न॒राजा॒वसी॑दतं
   यु॒वम् हि अ॑प्न॒राजौ असी॑दतम्
   यु॒वं हि ? अ॑प्न॒राजा॑व् असी॑दतं

Halfverse: b    तिष्ठ॒द्रथं॒ न धू॒र्षदं॑ वन॒र्षद॑म् ।
   तिष्ठ॑त् रथ॑म् न धू॒र्षद॑म् वन॒र्षद॑म् ।
   तिष्ठ॑द् रथं न धू॒र्षदं वन॒र्षद॑म् ।

Halfverse: c    ता नः॑ कणूक॒यन्ती॑र्नृ॒मेध॑स्तत्रे॒ अंह॑सः सु॒मेध॑स्तत्रे॒ अंह॑सः ।।
   ता नः॑ कणूक॒यन्ती॑र्
   ताः नः कणूक॒यन्तीः
   ता नः कणूक॒यन्ती॑र्

Halfverse: d    नृ॒मेध॑स्तत्रे॒ अंह॑सः
   नृ॒मेधः तत्रे अंह॑सः
   नृ॒मेध॑स् तत्रे अंह॑सः

Halfverse: e    सु॒मेध॑स्तत्रे॒ अंह॑सः ।।
   सु॒मेधः तत्रे अंह॑सः ।।
   सु॒मेध॑स् तत्रे अंह॑सः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.