TITUS
Rg-Veda: Rg-Veda-Samhita
Part No. 967
Previous part

Hymn: 130_(956) 
Verse: 1 
Halfverse: a    यो य॒ज्ञो वि॒श्वत॒स्तन्तु॑भिस्त॒त एक॑शतं देवक॒र्मेभि॒राय॑तः ।
   यो य॒ज्ञो वि॒श्वत॒स्तन्तु॑भिस्त॒त
   यः य॒ज्ञः वि॒श्वतः तन्तु॑भिः त॒तः
   यो य॒ज्ञो ? वि॒श्वत॑स् तन्तु॑भिस् त॒त

Halfverse: b    एक॑शतं देवक॒र्मेभि॒राय॑तः ।
   एक॑शतम् देवक॒र्मेभिः आय॑तः ।
   एक॑शतं देवक॒र्मेभि॑र् आय॑तः ।

Halfverse: c    इ॒मे व॑यन्ति पि॒तरो॒ य आ॑य॒युः प्र व॒याप॑ व॒येत्या॑सते त॒ते ।।
   इ॒मे व॑यन्ति पि॒तरो॒ य आ॑य॒युः
   इ॒मे व॑यन्ति पि॒तरः ये आ॑य॒युः
   इ॒मे व॑यन्ति पि॒तरो य आ॑य॒युः

Halfverse: d    प्र व॒याप॑ व॒येत्या॑सते त॒ते ।।
   प्र व॑य अप वय इति आसते त॒ते ।।
   प्र व॒याप व॒येति आसते त॒ते ।।


Verse: 2 
Halfverse: a    पुमाँ॑ एनं तनुत॒ उत्कृ॑णत्ति॒ पुमा॒न्वि त॑त्ने॒ अधि॒ नाके॑ अ॒स्मिन् ।
   पुमाँ॑ एनं तनुत॒ उत्कृ॑णत्ति
   पुमा॑न् एनम् तनुते उत् कृणत्ति
   पुमाँ एनं तनुत उत् कृणत्ति

Halfverse: b    पुमा॒न्वि त॑त्ने॒ अधि॒ नाके॑ अ॒स्मिन् ।
   पुमा॑न् वि त॑त्ने अधि नाके अ॒स्मिन् ।
   पुमा॑न् वि त॑त्ने अधि नाके अ॒स्मिन् ।

Halfverse: c    इ॒मे म॒यूखा॒ उप॑ सेदुरू॒ सदः॒ सामा॑नि चक्रु॒स्तस॑रा॒ण्योत॑वे ।।
   इ॒मे म॒यूखा॒ उप॑ सेदुरू॒ सदः
   इ॒मे म॒यूखाः उप सेदुः उ+ सदः
   इ॒मे म॒यूखा उप सेदुर् ऊ सदः

Halfverse: d    सामा॑नि चक्रु॒स्तस॑रा॒ण्योत॑वे ।।
   सामा॑नि चक्रुः तस॑राणि ओत॑वे ।।
   सामा॑नि चक्रुस् तस॑राणि ओत॑वे ।।


Verse: 3 
Halfverse: a    कासी॑त्प्र॒मा प्र॑ति॒मा किं नि॒दान॒माज्यं॒ किमा॑सीत्परि॒धिः क आ॑सीत् ।
   कासी॑त्प्र॒मा प्र॑ति॒मा किं नि॒दान॑म्
   का आ॑सीत् प्र॒मा प्र॑ति॒मा किम् नि॒दान॑म्
   कासी॑त् प्र॒मा प्र॑ति॒मा किं नि॒दान॑म्

Halfverse: b    आज्यं॒ किमा॑सीत्परि॒धिः क आ॑सीत् ।
   आज्य॑म् किम् आसीत् परि॒धिः कः आ॑सीत् ।
   आज्यं किम् आसीत् परि॒धिः क आ॑सीत् ।

Halfverse: c    छन्दः॒ किमा॑सी॒त्प्रउगं॒ किमु॒क्थं यद्दे॒वा दे॒वमय॑जन्त॒ विश्वे॑ ।।
   छन्दः॒ किमा॑सी॒त्प्रउगं॒ किमु॒क्थं
   छन्दः किम् आसीत् प्रउग॑म् किम् उ॒क्थम्
   छन्दः किम् आसीत् प्रउगं किम् उ॒क्थं

Halfverse: d    यद्दे॒वा दे॒वमय॑जन्त॒ विश्वे॑ ।।
   यत् दे॒वाः दे॒वम् अय॑जन्त विश्वे ।।
   यद् दे॒वा दे॒वम् अय॑जन्त विश्वे ।।


Verse: 4 
Halfverse: a    अ॒ग्नेर्गा॑य॒त्र्य॑भवत्स॒युग्वो॒ष्णिह॑या सवि॒ता सम्ब॑भूव ।
   अ॒ग्नेर्गा॑य॒त्र्य॑भवत्स॒युग्वा
   अ॒ग्नेः गा॑य॒त्री अ॑भवत् स॒युग्वा
   अ॒ग्नेर् गाय॒त्री अ॑भवत् स॒युग्वा

Halfverse: b     ॑उ॒ष्णिह॑या सवि॒ता सम्ब॑भूव ।
   उ॒ष्णिह॑या सवि॒ता सम् बभूव ।
   उ॒ष्णिह॑या सवि॒ता सम् बभूव ।

Halfverse: c    अ॑नु॒ष्टुभा॒ सोम॑ उ॒क्थैर्मह॑स्वा॒न्बृह॒स्पते॑र्बृह॒ती वाच॑मावत् ।।
   अ॑नु॒ष्टुभा॒ सोम॑ उ॒क्थैर्मह॑स्वान्
   अनु॒ष्टुभा सोमः उ॒क्थैः मह॑स्वान्
   अनु॒ष्टुभा सोम उ॒क्थैर् मह॑स्वान्

Halfverse: d    बृह॒स्पते॑र्बृह॒ती वाच॑मावत् ।।
   बृह॒स्पतेः बृह॒ती वाच॑म् आवत् ।।
   बृह॒स्पते॑र् बृह॒ती वाच॑म् आवत् ।।


Verse: 5 
Halfverse: a    वि॒राण्मि॒त्रावरु॑णयोरभि॒श्रीरिन्द्र॑स्य त्रि॒ष्टुबि॒ह भा॒गो अह्नः॑ ।
   वि॒राण्मि॒त्रावरु॑णयोरभि॒श्रीर्
   वि॒राट् मि॒त्रावरु॑णयोः अभि॒श्रीः
   वि॒राण् मि॒त्रावरु॑णयोर् अभि॒श्रीर्

Halfverse: b    इन्द्र॑स्य त्रि॒ष्टुबि॒ह भा॒गो अह्नः॑ ।
   इन्द्र॑स्य त्रि॒ष्टुप् इ॒ह भा॒गः अह्नः ।
   इन्द्र॑स्य त्रि॒ष्टुब् इ॒ह भा॒गो अह्नः ।

Halfverse: c    विश्वा॑न्दे॒वाञ्जग॒त्या वि॑वेश॒ तेन॑ चाकॢप्र॒ ऋष॑यो मनु॒ष्याः॑ ।।
   विश्वा॑न्दे॒वाञ्जग॒त्या वि॑वेश
   विश्वा॑न् दे॒वान् जग॑ती आ वि॑वेश
   विश्वा॑न् दे॒वाञ् जग॑ती आ वि॑वेश

Halfverse: d    तेन॑ चाकॢप्र॒ ऋष॑यो मनु॒ष्याः॑ ।।
   तेन चाकॢप्रे ऋष॑यः मनु॒ष्याः ।।
   तेन चाकॢप्र ऋष॑यो मनु॒ष्याः ।।


Verse: 6 
Halfverse: a    चा॑कॢ॒प्रे तेन॒ ऋष॑यो मनु॒ष्या॑ य॒ज्ञे जा॒ते पि॒तरो॑ नः पुरा॒णे ।
   चा॑कॢ॒प्रे तेन॒ ऋष॑यो मनु॒ष्या
   चाकॢ॒प्रे तेन ऋष॑यः मनु॒ष्याः
   चाकॢ॒प्रे तेन ऋष॑यो मनु॒ष्या

Halfverse: b    य॒ज्ञे जा॒ते पि॒तरो॑ नः पुरा॒णे ।
   य॒ज्ञे जा॒ते पि॒तरः नः पुरा॒णे ।
   य॒ज्ञे जा॒ते पि॒तरो नः पुरा॒णे ।

Halfverse: c    पश्य॑न्मन्ये॒ मन॑सा॒ चक्ष॑सा॒ तान्य इ॒मं य॒ज्ञमय॑जन्त॒ पूर्वे॑ ।।
   पश्य॑न्मन्ये॒ मन॑सा॒ चक्ष॑सा॒ तान्
   पश्य॑न् मन्ये मन॑सा चक्ष॑सा तान्
   पश्य॑न् मन्ये मन॑सा चक्ष॑सा तान्

Halfverse: d    य इ॒मं य॒ज्ञमय॑जन्त॒ पूर्वे॑ ।।
   ये इ॒मम् य॒ज्ञम् अय॑जन्त पूर्वे ।।
   य इ॒मं य॒ज्ञम् अय॑जन्त पूर्वे ।।


Verse: 7 
Halfverse: a    स॒हस्तो॑माः स॒हछ॑न्दस आ॒वृतः॑ स॒हप्र॑मा॒ ऋष॑यः स॒प्त दैव्याः॑ ।
   स॒हस्तो॑माः स॒हछ॑न्दस आ॒वृतः
   स॒हस्तो॑माः स॒हछ॑न्दसः आ॒वृतः
   स॒हस्तो॑माः स॒हछ॑न्दस आ॒वृतः

Halfverse: b    स॒हप्र॑मा॒ ऋष॑यः स॒प्त दैव्याः॑ ।
   स॒हप्र॑माः ऋष॑यः स॒प्त दैव्याः ।
   स॒हप्र॑मा ऋष॑यः स॒प्त दैवि॑याः ।

Halfverse: c    पूर्वे॑षा॒म्पन्था॑मनु॒दृश्य॒ धीरा॑ अ॒न्वाले॑भिरे र॒थ्यो॒ न र॒श्मीन् ।।
   पूर्वे॑षा॒म्पन्था॑मनु॒दृश्य॒ धीरा
   पूर्वे॑षाम् पन्था॑म् अनु॒दृश्य धीराः
   पूर्वे॑षाम् पन्था॑म् अनु॒दृश्य धीरा

Halfverse: d    अ॒न्वाले॑भिरे र॒थ्यो॒ न र॒श्मीन् ।।
   अ॒न्वाले॑भिरे र॒थ्यः न र॒श्मीन् ।।
   अ॒न्वाले॑भिरे र॒थियो न र॒श्मीन् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.