TITUS
Tetraevangelium (redactio mcxetica defectiva)
Part No. 46
Previous part

Chapter: 3 
Verse: 1  Link to ntkpl   წელსა მეათხუთმეტესა ტიბერის კეისრისასა, მთავრობასა პონტიელისა პილატესა ჰურიასტანს და მეოთხედ მთავრობასა გალილეას ჰეროდესსა, ხოლო ფილიპეს, ძმისა მისისა, მეოთხედ მთავრობასა იტჳრეას და ტრაქონელთა სოფელსა და ლჳსანისსა მეოთხედ მთავრობასა აბილინესსა,

Verse: 2  Link to ntkpl   მღდელთმოძღურებასა ანნასსა და კაიაფასსა იყო სიტყუა უფლისაჲ იოანეს მიმართ, ძისა ზაქარიასსა, უდაბნოსა.

Verse: 3  Link to ntkpl   და მოვლიდა ყოველსა მას გარემო სოფლებსა იორდანისასა და ქადაგებდა ნათლის-ცემასა სინანულისასა მისატევებელად ცოდვათა.

Verse: 4  Link to ntkpl   ვითარცა წერილ არს წიგნსა მას სიტყუათა ესაია წინაწარმეტყუელისათა და იტყჳს: ჴმაჲ ღაღადებისა უდაბნოსა: განჰმზადენით გზანი უფლისანი და წრფელ ყვენით ალაგნი მისნი.

Verse: 5  Link to ntkpl   ყოველი ჴევნები აღმოივსოს, და ყოველნი მთანი და ბორცუნი დამდაბლდენ; და იყოს გულარძნილი იგი მართალ და ფიცხელი იგი გზად წრფელად.

Verse: 6  Link to ntkpl   და იხილოს ყოველმან ჴორციელმან მაცხოვარება ღმრთისაჲ.

Verse: 7  Link to ntkpl   და ეტყოდა განმავალსა მას მისა ერსა ნათლის-ღებაღ მისგან: ნაშობნო იქედნეთანო, ვინ გიჩუენა თქუენ სივლტოლა მერმისა მისგან რისხვისა?

Verse: 8  Link to ntkpl   ყავთ უკუე აწ ნაყოფი ღირსი სინანულისა და ნუ ჰგონებთ და იტყჳთ გულთა თქუენთა: მამა გჳვის ჩუენ აბრაჰამი. გეტყჳ თქვენ, რამეთუ ძალ-უც ღმერთსა აღდგინებად ქვათა ამათგან ნაშობად აბრაჰამისა.

Verse: 9  Link to ntkpl   რამეთუ აწვე ცული ძირთა თანა ხეთასა ძეს; ყოველმან ხემან რომელმან არა გამოიღოს ნაყოფი კეთილი, მოეკუეთოს და ცეცეხლსა დაედვას.

Verse: 10  Link to ntkpl   და ჰკითხვიდეს მას ერი იგი და ეტყოდეს: და რაჲმე უკუე ვყოთ?

Verse: 11  Link to ntkpl   მიუგო და ჰრქუა მათ: რომელსა აქუნდეს ორი სამოსელი, მიეცინ რომელსა არა აქუნდეს; და საზრდელიცა ეგრეთვე მსგავსად ყავნ.

Verse: 12  Link to ntkpl   მოვიდეს მისა მეზუერენიცა ნათლის-ღებად და ჰრქუეს მას: მოძღუარ, ჩუენ რამე ვყოთ?

Verse: 13  Link to ntkpl   ხოლო მან ჰრქუა მათ: ნურარას უფროს განწესებულისა თქუენისა იქმთ.

Verse: 14  Link to ntkpl   ჰკითხჳდეს მას მჴედრად განწესებულნიცა იგი და ეტყოდეს: და ჩუენ რამე ვყოთ? და მან ჰრქუა მათ: ნუვის აჭირვებთ, ნუცა ცილსა შესწამებთ და კმა გეყავნ როჭიკი თქუენი.

Verse: 15  Link to ntkpl   და ვითარცა მოელოდა ერი იგი და განიზრახვიდეს ყოველნი გულთა მათთა იოანესთჳს: ნუუკუე იგი არს ქრისტე,

Verse: 16  Link to ntkpl   მიუგო ყოველთა იოანე და ეტყოდა: მე ნათელ-გცემ თქუენ წყლითა; ხოლო მოვალს უძლიერესი ჩემსა, რომლისა არა ვარ ღირს ჴამლთა მისთა ტჳრთვად; მან ნათელ-გცეს თქუენ სულითა წმიდითა და ცეცხლითა,

Verse: 17  Link to ntkpl   რომლისა ნიჩაბი ჴელთა შინა მისთა, განწმიდოს კალო თჳსი და შეკრიბოს იფქლი საუნჯესა თჳსსა, ხოლო ბზე დაწვას ცეცხლითა უშრეტითა,

Verse: 18  Link to ntkpl   და ფრიად სხუასაცა მრავალსა ჰლოცვიდა და ახარებდა ერსა მას.

Verse: 19  Link to ntkpl   ხოლო ჰეროდე ოთხთა სამთავროთა მთავარმან, რამეთუ ამხილებდა მას ჰეროდიასთჳს, ცოლისა ფილიპეს, ძმისა მისისა, და ყოვლისა მისთჳს, რომელი ქმნა ბოროტი ჰეროდე,

Verse: 20  Link to ntkpl   შესძინა ესეცა მას ყოველსა ზედა და შეაყენა იოანე საპყრობილესა.

Verse: 21  Link to ntkpl   და იყო ნათლის-ღებასა მას ყოვლისა ერისასა და იესოცა ნათელ-იღო და ილოცვიდა, და განეხუნეს ცანი.

Verse: 22  Link to ntkpl   და გარდამოჴდა სული წმიდაჲ ჴორციელითა ხილვითა ვითარცა ტრედი მის ზედა, და ჴმა-იყო ზეცით და თქუა: შენ ხარ ძე ჩემი საყუერელი, შენ სათნო-გიყავ.

Verse: 23  Link to ntkpl   და თავადსა იესოს ეწყო ოდენ ყოფად მეოცდაათესა წელსა, რომელი საგონებელ იყო ძედ იოსებისა, (იაკობისა), ელისა,

Verse: 24  Link to ntkpl   მატათანისა, ლევისა, მელქისა, იანესა, იოსებისა.

Verse: 25  Link to ntkpl   მატათისა, ამოსისა, ნაომისა, ელისა, ნაგესა,

Verse: 26  Link to ntkpl   მაათისა, მატათისა, სემისა, იოსებისა, იუდასსა,

Verse: 27  Link to ntkpl   იოანანისა, რესასა, ზორაბაბელისა, სალათიელისა, ნერისა,

Verse: 28  Link to ntkpl   მელქისა, ადდისა, კოსამისა, ელმოდადისა, ერისა,

Verse: 29  Link to ntkpl   იოსისა, ელიეზერისა, იორამისა, მატტათისა, ლევისა.

Verse: 30  Link to ntkpl   სჳმეონისა, იუდასა, იოსებისა, იონანისა, ელიაკიმისა,

Verse: 31  Link to ntkpl   მელვასა, მაჲნანისა, მატათანისა, ნათანისა, დავითისა,

Verse: 32  Link to ntkpl   იესესსა, იობედისა, ბოოსისა, სალმონისა, ნაასონისა,

Verse: 33  Link to ntkpl   ამინადაბისა, არამისა, (იორამისა), ესრომისა, ფარეზისა, იუდასა,

Verse: 34  Link to ntkpl   იაკობისა, ისაკისა, აბრაჰამისა, თარასა, ნაქორისა,

Verse: 35  Link to ntkpl   სერუქისა, რაგავისა, ფალეგისა, ებერისა, სალასა,

Verse: 36  Link to ntkpl   კაინანისა, არფაქსადისა, სემისა, ნოესა, ლამექისა.

Verse: 37  Link to ntkpl   მათუსალასა, ენუქისა, იარედისა, მალელეილისა, კაინანისა,

Verse: 38  Link to ntkpl   ენოსისა, სეითისა, ადამისა და ღმრთისა.

Next part


This text is part of the TITUS edition of Tetraevangelium (redactio mcxetica defectiva).

Copyright TITUS Project, Frankfurt a/M, 20.11.2023. No parts of this document may be republished in any form without prior permission by the copyright holder.