TITUS
Tetraevangelium (redactio mcxetica defectiva)
Part No. 24
Previous part

Chapter: 24 
Verse: 1  Link to ntkpl   და გამოვიდა იესო ტაძრისა მისგან და წარვიდოდა. და მოუჴდეს მას მოწაფენი მისნი, და უჩუენებდეს შენებულსა მას ტაძრისასა.

Verse: 2  Link to ntkpl   ხოლო იესო ჰრქუა მათ: არა ჰხედავთა ამას ყოველსა? ამინ გეტყჳ თქუენ: არა დაშთეს აქა ქვა ქვასა ზედა, რომელი არა დაირღუეს.

Verse: 3  Link to ntkpl   და ვითარცა დაჯდა იგი მთასა მას ზეთისხილთასა, მოუჴდეს მას მოწაფენი თჳსაგან და ეტყოდეს: მითხარ ჩუენ, ოდეს იყოს ესე და რა არს სასწაული იგი შენისა მის მოსლვისა და აღსასრული ამის სოფლისა?

Verse: 4  Link to ntkpl   მიუგო იესო და ჰრქუა მათ: ეკრძალენით, ნუ ვინმე გაცთუნნეს თქუენ,

Verse: 5  Link to ntkpl   რამეთუ მრავალნი მოვიდოდიან სახელითა ჩემითა და იტყოდიან, ვითარმედ: მე ვარ ქრისტე, -- და მრავალთა აცთუნებდენ.

Verse: 6  Link to ntkpl   და გესმოდიან ბრძოლანი და ჰამბავნი ბრძოლათანი, იხილეთ და ნუ შესძრწუნდებით, რამეთუ ჯერ-არს ესე ყოველი ყოფად, არამედ არღა არს აღსასრული.

Verse: 7  Link to ntkpl   რამეთუ აღდგეს ნათესავი ნათესავსა ზედა, და მეუფება მეუფებასა ზედა, და იყვნენ სიყმილნი და სრვანი და ძრვანი ადგილად-ადგილად.

Verse: 8  Link to ntkpl   ხოლო ესე ყოველი დასაბამი სალმობათა არს.

Verse: 9  Link to ntkpl   მაშინ მიგცნენ თქუენ ჭირსა და მოგწყჳდნენ თქუენ, და იყვნეთ თქუენ მოძუებულ ყოველთაგან წარმართთა სახელისა ჩემისათჳს.

Verse: 10  Link to ntkpl   და მაშინ დაბრკოლდებოდიან მრავალნი და ურთიერთას შინაგანსცემდენ და სძულობდენ ურთიერთას.

Verse: 11  Link to ntkpl   და მრავალნი ცრუწინაწარმეტყუელნი აღდგენ და აცთუნებდენ მრავალთა.

Verse: 12  Link to ntkpl   და განმრავლებითა უშჯულოებისათა განჴმეს სიყვარული მრავალთა.

Verse: 13  Link to ntkpl   ხოლო რომელმან დაითმინოს სრულიად, იგი ცხონდეს.

Verse: 14  Link to ntkpl   და იქადაგოს სახარება ესე სასუფეველისა ყოველსა სოფელსა საწამებელად ყოველთა წარმართთა და მაშინ მოიწიოს აღსასრული.

Verse: 15  Link to ntkpl   რაჟამს იხილოთ საძაგელი იგი მოოჴრებისა, თქმული დანიელ წინაწარმეტყუელისა მიერ, მდგომარე ადგილსა წმიდასა, რომელი აღმოიკითხვიდეს, გულისხმა-ყავნ.

Verse: 16  Link to ntkpl   მაშინ რომელნი ჰურიასტანს იყვნენ, ივლტოდედ მთად.

Verse: 17  Link to ntkpl   და რომელი ერდოსა ზედა იყოს, ნუ გარდამოვალნ აღებად რაჲსამე სახლისაგან თჳსისა.

Verse: 18  Link to ntkpl   და რომელი ველსა გარე იყოს, ნუ უკუნიქცევინ აღებად სამოსლისა თჳსისა.

Verse: 19  Link to ntkpl   ხოლო ვაჲ მიდგომილთა და რომელნი აწოებდენ მათ დღეთა შინა!

Verse: 20  Link to ntkpl   არამედ ილოცევდით, რაჲთა არა იყოს სივლტოლა თქუენი ზამთარსა შინა, გინა შაბათთა.

Verse: 21  Link to ntkpl   რამეთუ იყოს მაშინ ჭირი დიდი, რომელი არა იყოს დასაბამითგან სოფლისათა, ვიდრე აქამდე, არცაღა ყოფად არს.

Verse: 22  Link to ntkpl   და უკუეთუმცა არა შემოკლდეს დღენი იგი, არამცა განერა ყოეელი ჴორციელი, ხოლო რჩეულთა მათთჳს შემოკლდენ დღენი იგი.

Verse: 23  Link to ntkpl   მაშინ უკუეთუ ვინმე გრქუას თქვენ: აჰა, აქა არს ქრისტე, -- გინა თუ: იქი, -- ნუ გრწამნ.

Verse: 24  Link to ntkpl   რამეთუ აღდგენ ქრისემტყუარნი და ცრუწინაწარმეტყუელნი და ჰყოფდენ სასწაულებსა დიდ-დიდსა და ნიშებსა, ვიდრე ცთუნებადმდე, უკეთუმცა ვერ შეუძლეს, რჩეულთა მათცა.

Verse: 25  Link to ntkpl   აჰა, ესერა, წინაჲსწარ გარქუ თქუენ.

Verse: 26  Link to ntkpl   უკეთუ გრქუან თქუენ: აჰა, უდაბნოსა არს, -- ნუ განხუალთ; -- აჰა, ესერა, საუნჯეთა შინა არს, -- ნუ გრწამნ.

Verse: 27  Link to ntkpl   რამეთუ ვითარცა ელვა რაჲ გამობრწყინდის მზისა აღმოსავალით და ჩანნ ვიდრე დასავალადმდე, ეგრეთ იყოს მოსლვა ძისა კაცისა.

Verse: 28  Link to ntkpl   რამეთუ სადაცა იყოს მძორი, მუნცა შეკრბეს ორბები.

Verse: 29  Link to ntkpl   ხოლო მეყსეულად შემდგომად ჭირისა მის მათ დღეთასა მზე დაბნელდეს, და მთოვარემან არა გამოსცეს ნათელი თჳსი, და ვარსკულავნი დამოცჳვენ ზეცით, და ძალნი ცათანი შეიძრნენ.

Verse: 30  Link to ntkpl   და მაშინ გამოჩნდეს სასწაული ძისა კაცისა ცათა შინა, და მაშინ იტყებდენ ყოველნი ტომნი ქუეყანისანი და იხილონ ძე კაცისა, მომავალი ღრუბელთა ზედა ცისათა, ძალითა ღა დიდებითა მრავლითა.

Verse: 31  Link to ntkpl   და წარავლინნეს ანგელოზნი თჳსნი საყჳრითა ჴმითა დიდისათა და შეკრიბნეს რჩეულნი მისნი ოთხთაგან ქართა კიდითგან ცათა ვიდრე კიდედმდე მათა.

Verse: 32  Link to ntkpl   ხოლო ლეღჳსაგან ისწავეთ იგავი: ვითარცა-იგი რაჟამს რტონი მისნი დაჩჩჳან და ფურცელი გამოვალნ, უწყოდეთ, რამეთუ ახლოს არს ზაფხული.

Verse: 33  Link to ntkpl   ეგრეცა თქუენ ოდეს იხილოთ ესე ყოველი, უწყოდეთ, რამეთუ ახლოს არს, კართა ზედა.

Verse: 34  Link to ntkpl   ამინ გეტყჳ თქუენ: არა წარჴდეს ნათესავი ესე, ვიდრემდე ესე ყოველი იქმნეს.

Verse: 35  Link to ntkpl   ცანი და ქუეყანა წარჴდენ, ხოლო სიტყუანი ჩემნი არა წარჴდენ.

Verse: 36  Link to ntkpl   ხოლო დღისა მისთჳს და ჟამისა არავინ იცის, არცა ანგელოზთა ცისათა, გარნა მამამან ჩემმან მხოლომან.

Verse: 37  Link to ntkpl   ვითარცა-იგი დღეთა მათ ნოვესთა, ეგრეთ იყოს მოსლვა ძისა კაცისა.

Verse: 38  Link to ntkpl   რამეთუ ვითარცა-იგი იყვნეს დღეთა მათ შინა პირველ წყლით-რღუნისა: ჭამდეს და სუმიდეს, იქორწინებდეს და განჰქორწინებდეს მუნ დღედმდე, ვიდრე შევიდა ნოვე კიდობნად.

Verse: 39  Link to ntkpl   და ვერ ცნეს, ვიდრემდე მოიწია წყლით-რღუნა იგი და წარიღო ყოველი. ესრეთ იყოს მოსლვაცა ძისა კაცისა.

Verse: 40  Link to ntkpl   მაშინ ორნი იყვნენ ველსა გარე: ერთი წარიყვანოს, და ერთი დაეტეოს.

Verse: 41  Link to ntkpl   ორნი ფქვიდენ ფქვილსა: ერთი წარიტაცოს, და ერთი დაეტეოს.

Verse: 42  Link to ntkpl   იღჳძებდით უკუე, რამეთუ არა იცით, რომელსა ჟამსა უფალი თქუენი მოვიდეს.

Verse: 43  Link to ntkpl   ხოლო ესემცა იცით: უკუეთუმცა უწყოდა სახლისა უფალმან, რომელსა საჴუმილავსა მპარავი მოსლვად არს, იღჳძებდამცა და არა უტევა დათხრად სახლისა თჳსისა.

Verse: 44  Link to ntkpl   ამისთჳს თქუენცა იყვენით განმზადებულ, რამეთუ რომელსა ჟამსა არა ჰგონებდეთ, ძე კაცისა მოვიდეს.

Verse: 45  Link to ntkpl   ვინმე არს სარწმუნო იგი მონა და ბრძენი, რომელი დაადგინოს უფალმან თჳსმან მონათა თჳსთა ზედა მიცემად საზრდელი მათი ჟამსა თჳსსა.

Verse: 46  Link to ntkpl   ხოლო ნეტარ არს მონისა მის, რომლისა მოვიდეს უფალი მისი და პოოს იგი ესრეთ მოქმედი.

Verse: 47  Link to ntkpl   ამინ გეტყჳ თქუენ, ვითარმედ ყოველთა ზედა მონაგებთა მისთა დაადგინოს იგი.

Verse: 48  Link to ntkpl   ხოლო უკეთუ თქუას ბოროტმან მან მონამან გულსა თჳსსა: ჰყოვნის უფალი ჩემი მოსლვად,

Verse: 49  Link to ntkpl   და იწყოს გუემად მისთანათა მათ მონათა, და ჭამდეს და სუმიდეს მომთრვალეთა თანა,

Verse: 50  Link to ntkpl   მოვიდეს უფალი იგი მონისა მის დღესა, რომელსა არა მოელოდის, და ჟამსა, რომელი არა უწყოდის.

Verse: 51  Link to ntkpl   და ორგან განკუეთოს იგი და ნაწილი მისი დადვას ორგულთა თანა. მუნ იყოს ტირილი და ღრჭენა კბილთა.

Next part


This text is part of the TITUS edition of Tetraevangelium (redactio mcxetica defectiva).

Copyright TITUS Project, Frankfurt a/M, 20.11.2023. No parts of this document may be republished in any form without prior permission by the copyright holder.