TITUS
Tetraevangelium (redactio athonensis)
Part No. 89
Previous part

Chapter: 21 


Verse: 1  Link to ntkpl   ამისა შემდგომად კუალად გამოუცხადა თავი თჳსი იესუ მოწაფეთა თჳსთა ზღუასა მას ზედა ტიბერიისასა. ხოლო გამოუცხადა ესრეთ:

Verse: 1V    ამისსა K.


Verse: 2  Link to ntkpl   იყვნეს ზოგად სიმონ-პეტრე და თომა, რომელსა ერქუა მარჩბივ, და ნათანაელ, რომელი იყო კანაჲთ გალილეაჲსაჲთ, და ძენი ზებედესნი და სხუანი მოწაფეთაგანნი ორნი.


Verse: 3  Link to ntkpl   ჰრქუა მათ სიმონ-პეტრე: წარვიდე სათხევლობად. -- ჰრქუეს მას: მოვიდეთ ჩუენცა შენ თანა. -- განვიდეს და შევიდეს ნავსა. და მას ღამესა არარაჲ იპყრეს.

Verse: 3V    -პეტრჱ Q. წარვიდეთ HIK.


Verse: 4  Link to ntkpl   და ვითარცა განთენდებოდა, დგა იესუ კიდესა ზედა, და არა უწყოდეს მოწაფეთა, ვითარმედ უფალი არს.


Verse: 5  Link to ntkpl   ჰრქუა მათ იესუ: ყრმანო, საჭმელი ნუ გაქუს რაჲა? -- მიუგეს და ჰრქუეს მას: არა.

Verse: 5V    მას -- QK.


Verse: 6  Link to ntkpl   ხოლო თავადმან ჰრქუა მათ: სდევით ბადე ეგე მარჯუენით კერძო ნავისა მაგის და ჰპოოთ. -- ხოლო მათ სდვეს ბადე იგი და ვერღარა ეძლო გამოთრევად სიმრავლისა მისგან თევზთაჲსა.

Verse: 6V    მარჯუჱნით HI.


Verse: 7  Link to ntkpl   ჰრქუა პეტრეს მოწაფემან მან, რომელი უყუარდა იესუს, ვითარმედ: უფალი არს. -- ხოლო სიმონ-პეტრეს ვითარცა ესმა, ვითარმედ უფალი არს, მოირტყა შესამოსელი თჳსი, რამეთუ შიშუელი იყო, და შთაიგდო თავი თჳსი ზღუად.

Verse: 7V    შიშუჱლი HI.


Verse: 8  Link to ntkpl   ხოლო სხუანი მოწაფენი ნავითა მოვიდეს, რამეთუ არა შორს იყვნეს ქუეყანისაგან, არამედ ორას წყრთა ოდენ, და გამოითრევდეს ბადესა მას თევზითა სავსესა.

Verse: 8V    მოვიდოდეს K.


Verse: 9  Link to ntkpl   და ვითარცა გამოჴდეს ქუეყანად, იხილეს ნაკუერცხალი მდებარჱ და თევზი მას ზედა და პური.

Verse: 9V    ნაკუჱრცხალი HIK.


Verse: 10  Link to ntkpl   ჰრქუა მათ იესუ: მოიღეთ თევზთა მათგანი, რომელ იპყართ.

Verse: 10V    და ჰრქუა K.


Verse: 11  Link to ntkpl   აღვიდა სიმონ-პეტრეცა და გამოითრევდა ბადესა მას ქუეყანად, სავსესა დიდ-დიდითა თევზითა, რომელი იყო ასერგასისდასამ. ესოდენ იყო, და არა განსთქდა ბადე იგი.

Verse: 11V    განსქდა Q.


Verse: 12  Link to ntkpl   ჰრქუა მათ იესუ: მოვედით და ისადილენით! -- და არავინ იკადრა მოწაფეთაგანმან კითხვად მისა, ვითარმედ: შენ ვინ ხარ? -- იცოდეს ყოველთა, რამეთუ უფალი არს.

Verse: 12V    მისსა K.


Verse: 13  Link to ntkpl   მოვიდა იესუ და მოიღო პური იგი და მისცა მათ, და თევზი იგი ეგრეთვე.


Verse: 14  Link to ntkpl   ესე სამგზის გამოეცხადა იესუ მოწაფეთა თჳსთა, აღ-რაჲ-დგა მკიდრეთით.

Verse: 14V    აღ-რაჲ-დგა ] აღდგა რაჲ K.


Verse: 15  Link to ntkpl   და ოდეს ისადილნეს, ჰრქუა სიმონ-პეტრეს იესუ: სიმონ იონაჲსო, გიყუარ მეა უფროჲს ამათსა? -- ჰრქუა მას პეტრე: ჰე, უფალო, შენ უწყი, რამეთუ მიყუარ შენ. -- ჰრქუა მას იესუ: აძოვენ კრავნი ჩემნი!

Verse: 15V    პეტრჱ Q; ჰჱ K; აძოენ HIK.


Verse: 16  Link to ntkpl   ჰრქუა მათ მერმეცა მეორედ: სიმონ იონაჲსო, გიყუარ მეა? -- ჰრქუა მას პეტრე: ჰე, უფალო, შენ იცი, რამეთუ მიყუარ შენ. -- ჰრქუა მას იესუ: დამწყსენ ცხოვარნი ჩემნი!

Verse: 16V    ჰჱ QK.


Verse: 17  Link to ntkpl   კუალად ჰრქუა მას იესუ მესამედ: სიმონ იონაჲსო, გიყუარ მეა? -- შეწუხნა პეტრე, რამეთუ ჰრქუა მას მესამედ: გიყუარ მეა? -- და ჰრქუა მას: უფალო, შენ ყოველი უწყი და ყოველი იცი, რამეთუ მიყუარ შენ. -- ჰრქუა მას იესუ: დამწყსენ ცხოვარნი ჩემნი!

Verse: 17V    ჰრქუა (4) ] ქ̃ა K; მე (2) HIK.


Verse: 18  Link to ntkpl   ამენ, ამენ გეტყჳ შენ: ოდეს იყავ ჭაბუკ, შეირტყი თავით თჳსით და ხჳდოდი, ვიდრეცა გნებავნ. ხოლო რაჟამს დაჰბერდე, განიპყრნე ჴელნი შენნი, და სხუამან შეგარტყას შენ და წარგიყვანოს, ვიდრეცა შენ არა გინდეს.


Verse: 19  Link to ntkpl   ხოლო ესე თქუა და აუწყებდა, რომლითა სიკუდილითა ადიდოს ღმერთი. და ვითარცა ესე თქუა, ჰრქუა მას: შემომიდეგ მე!


Verse: 20  Link to ntkpl   მოიქცა პეტრე და იხილა მოწაფჱ იგი, რომელი უყუარდა იესუს, მისდევდა რაჲ, რომელი-იგი მიეყრდნა სერობასა მას მკერდსა მისსა, და ჰრქუა მას: უფალო, ვინ არს, რომელი მიგცემს შენ?

Verse: 20V    მოწაფე HIK.


Verse: 21  Link to ntkpl   ესე ვითარცა იხილა პეტრე, ჰრქუა იესუს: უფალო, ხოლო ესე რაჲ?


Verse: 22  Link to ntkpl   ჰრქუა მას იესუ: უკუეთუ მინდეს ყოფაჲ მაგისი, ვიდრემდე მოვიდე, შენდა რაჲ? შენ მე შემომიდეგ!

Verse: 22V    უკუჱთუ H


Verse: 23  Link to ntkpl   და განჴდა სიტყუაჲ ესე ძმათა შორის, ვითარმედ: მოწაფჱ იგი არა მოკუდეს. -- და არა ჰრქუა მას იესუ, ვითარმედ: არა მოკუდეს, არამედ: უკუეთუ მინდეს მაგისი ყოფაჲ ვიდრე მოსლვად ჩემდამდე, შენდა რაჲ?

Verse: 23V    ჩემდამდენ Q.


Verse: 24  Link to ntkpl   ესე არს მოწაფჱ იგი, რომელი წამებს ამათთჳს და რომელმან დაწერა ესე, და უწყით, რამეთუ ჭეშმარიტ არს წამებაჲ მისი.

Verse: 24V    მოწაფე HIK.


Verse: 25  Link to ntkpl   და არიან სხუანიცა მრავალ, რომელ ქმნნა იესუ, რომელნი თუმცა დაიწერებოდეს თითოეულად, არცაღა ვჰგონებ, ვითარცა სოფელმან ამან დაიტია აღწერილი წიგნები.


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.