TITUS
Tetraevangelium (redactio athonensis)
Part No. 86
Previous part

Chapter: 18 


Verse: 1  Link to ntkpl   ესე თქუა იესუ და გამოვიდა მოწფითურთ თჳსით წიაღ ჴევსა მას ნაძოვანსა, სადაცა-იგი იყო მტილი, რომელსა შევიდა თავადი და მოწაფენი მისნი.

Verse: 1V    მოწაფითურთ Q; მწ̃ფითურთ K.


Verse: 2  Link to ntkpl   იცოდა იუდაცა, მიმცემელმან მისმან, ადგილი იგი, რამეთუ მრავალგზის შესრულ იყო მუნ იესუ მოწფითურთ თჳსით.

Verse: 2V    მოწაფით̃რთ HK.


Verse: 3  Link to ntkpl   ხოლო იუდა წარიყვანა ერი და მღდელთმოძღუართა და ფარისეველთაგან მსახურნი და მოვიდა მუნ სანთლებითა და ლამპრებითა და საჭურველითა.


Verse: 4  Link to ntkpl   ხოლო იესუ იცოდა ყოველი იგი მომავალი მის ზედა, გამოვიდა და ჰრქუა მათ: ვის ეძიებთ?


Verse: 5  Link to ntkpl   მიუგეს და ჰრქუეს მას: იესუს ნაზარეველსა. -- ჰრქუა მათ იესუ: მე ვარ. -- დგა იუდაცა, მიმცემელი იგი მისი, მათ თანა.


Verse: 6  Link to ntkpl   და ვითარცა ჰრქუა მათ: მე ვარ, -- გარეუკუნიქცეს და დაეცნეს ქუეყანასა.


Verse: 7  Link to ntkpl   მერმე კუალად ჰკითხა მათ: ვის ეძიებთ? -- და მათ ჰრქუეს მას: იესუს ნაზარეველსა.


Verse: 8  Link to ntkpl   ჰრქუა მათ იესუ: გარქუ თქუენ, ვითარმედ: მე ვარ. უკუეთუ მე მეძიებთ, უტევენით ესენი, წარვიდენ,


Verse: 9  Link to ntkpl   რაჲთა აღესრულოს სიტყუაჲ იგი, რომელი თქუა, ვითარმედ: რომელნი მომცენ მე, არა წარვწყმიდე მათგანი არცა ერთი.


Verse: 10  Link to ntkpl   ხოლო სიმონ-პეტრეს აქუნდა მახჳლი, აღმოიჴადა იგი და სცა მონასა მღდელთმოძღურისასა და წარჰკუეთა ყური მისი მარჯუენე. ხოლო იყო სახელი მონისაჲ მის მალქოზ.

Verse: 10V    წარჰკუჱთა HI; მალხოზ K.


Verse: 11  Link to ntkpl   ჰრქუა იესუ პეტრეს: დადევ მახჳლი ქარქაშსა! სასუმელი, რომელი მომცა მე მამამან, არა შევსუაა იგი?


Verse: 12  Link to ntkpl   ხოლო კრებულმან მან და ათასისთავმან და მსახურთა მათ ჰურიათამან შეიპყრეს იესუ და შეკრეს იგი.

Verse: 12V    ასისთავმან K.


Verse: 13  Link to ntkpl   და მიიყვანეს იგი პირველად ანნაჲსა, რამეთუ იყო სიმამრი კაიაფაჲსი, რომელი იყო მღდელთმოძღუარი მის წელიწდისაჲ.

Verse: 13V    ანნაჲსსა QK; რამეთუ ] რომელი K.


Verse: 14  Link to ntkpl   ხოლო ესე კაიაფა იყო, რომელმან აზრახა ჰურიათა, ვითარმედ: უმჯობეს არს კაცისა ერთისა სიკუდილი ერისათჳს.


Verse: 15  Link to ntkpl   მისდევდა იესუს სიმონ-პეტრე და სხუაჲ იგი მოწაფჱ. ხოლო მოწაფჱ იგი ერთი მეცნიერ იყო მღდელთმოძღურისა და შევიდა იესუჲს თანა ეზოსა მღდელთმოძღურისასა.

Verse: 15V    მოწაფე (1) HIK; ი̃ჳს K.


Verse: 16  Link to ntkpl   ხოლო პეტრე დგა კარსა თანა გარეშე. განვიდა ერთი იგი მოწაფჱ, რომელი იყო მეცნიერ მღდელთმოძღურისა, და ჰრქუა მეკარესა მას დედაკაცსა და შეიყვანა პეტრე.

Verse: 16V    გარეშჱ Q; მოწაფე HIK.


Verse: 17  Link to ntkpl   ჰრქუა მჴევალმან მან მეკარემან პეტრეს: ნუუკუე შენცა მოწაფეთაგანი ხარ მის კაცისათაჲ? ხოლო პეტერ თქუა: არა ვარ.

Verse: 17V    ნუუკუჱ QHIK.


Verse: 18  Link to ntkpl   დგეს მონანი იგი და მსახურნი მღდელთმოძღურთანი და ნაკუერცხალი აღეგზნა, რამეთუ ყინელი იყო, და ტფებოდეს. დგა მათ თანა პეტრეცა და ტფებოდა.

Verse: 18V    ნაკუჱრცხალი HI.


Verse: 19  Link to ntkpl   ხოლო მღდელთმოძღუარმან მან ჰკითხა იესუს მოწაფეთა მისთათჳს და მოძღურებისა მისისათჳს.


Verse: 20  Link to ntkpl   მიუგო იესუ და ჰრქუა მას: მე განცხადებულად ვეტყოდე სოფელსა და მე მარადის ვასწავებდ შესაკრებელსა და ტაძარსა შინა, სადა-იგი ყოვლადვე ჰურიანი შეკრბიან, ხოლო ფარულად არარას ვეტყოდე.


Verse: 21  Link to ntkpl   რაჲსა მკითხავ მე? ჰკითხე მათ, რომელთა ესმოდა, რასა ვასწავებდ მათ. აჰა, ამათ იციან, რასა-იგი ვეტყოდე მათ.


Verse: 22  Link to ntkpl   და ვითარცა ესე თქუა იესუ, ერთმან მსახურთაგანმან მუნ მდგომარემან სცა ყურიმალსა იესუს და ჰრქუა: ესრეთ სიტყუას-უგება მღდელთმოძღუარსა?


Verse: 23  Link to ntkpl   ჰრქუა მას იესუ: უკუეთუ ბოროტსა ვეტყოდე, წამე ბოროტისათჳს; უკუეთუ კეთილსა, რაჲსათჳს მცემ?

Verse: 23V    ვიტყოდე K; უკუჱთუ H.


Verse: 24  Link to ntkpl   და მიავლინა იგი ანნა კრული კაიაფაჲსა მღდელთმოძღურისა.

Verse: 24V    ანნა QHI; კაიაფაჲსსა K.


Verse: 25  Link to ntkpl   ხოლო სიმონ-პეტრე დგა და ტფებოდა. ჰრქუეს მას მუნ მდგომარეთა მათ: ნუუკუე შენცა მოწაფეთა მისთაგანი ხარ? ხოლო მან უვარ-ყო და თქუა: არა ვარ.

Verse: 25V    ნუუკუჱ QHIK.


Verse: 26  Link to ntkpl   ჰრქუა მას ერთმან მან მონათაგანმან მღდელთმოძღურისამან, -- ნათესავი იყო მისი, რომელსა-იგი პეტრე წარჰკუეთა ყური, -- არა მე გიხილეა მტილსა მას შინა მის თანა?

Verse: 26V    მან -- HIK; პეტრჱ Q; წარჰკუჱთა HI.


Verse: 27  Link to ntkpl   და კუალად უვარ-ყო პეტრე და მეყსეულად ქათამმან იყივლა.


Verse: 28  Link to ntkpl   და მოიყვანეს იესუ კაიაფაჲსით ტაძრად. და იყო განთიად. და იგინი არა შევიდეს ტაძრად, რაჲთა არა შეიგინნენ, არამედ რაჲთა ჭამონ პასექი.

Verse: 28V    კაიაფაისით K.


Verse: 29  Link to ntkpl   გამოვიდა პილატე მათა გარე და ჰრქუა მათ: რასა შესმენასა მოიღებთ კაცისა ამის ზედა?

Verse: 29V    გარჱ Q.


Verse: 30  Link to ntkpl   მიუგეს და ჰრქუეს მას: უკუეთუმცა არა ბოროტისმოქმედი იყო, არამცა მიგეცით შენ ეგე.


Verse: 31  Link to ntkpl   ჰრქუა მათ პილატე: მიიყვანეთ ეგე თქუენ და შჯულისა თქუენისაებრ განიკითხეთ ეგე! -- ჰრქუეს მას ჰურიათა მათ: ჩუენდა არავისი ჯერ-არს მოკლვაჲ.

Verse: 31V    პილატჱ Q; სჯულისა K.


Verse: 32  Link to ntkpl   რაჲთა აღესრულოს სიტყუაჲ იგი იესუჲსი, რომელ თქუა და აუწყებდა, რომლითა სიკუდილითა ეგულებოდა მოსიკუდიდ,


Verse: 33  Link to ntkpl   კუალად უკუე შევიდა პილატე ტაძრად და შეხადა იესუს და ჰრქუა მას: შენ ხარა მეუფჱ ჰურიათაჲ?

Verse: 33V    უკუჱ HIK; მეუფე HK.


Verse: 34  Link to ntkpl   ჰრქუა მას იესუ: შენ თავით თჳსით იტყჳ მაგას, ანუ სხუათა გითხრეს ჩემთჳს?

Verse: 34V    თჳსით ] შენით Q.


Verse: 35  Link to ntkpl   მიუგო პილატე და ჰრქუა მას: ნუუკუე მე ჰურიაჲ ვარა? ნათესავთა შენთა და მღდელთმოძღუართა მოუცემიხარ შენ ჩემდა. რაჲ გიქმნიეს?

Verse: 35V    ნუუკუჱ QHIK.


Verse: 36  Link to ntkpl   მიუგო იესუ და ჰრქუა მას: მეუფებაჲ ჩემი არა ამის სოფლისაგანი არს. უკუეთუმცა ამის სოფლისაგანი იყო მეუფებაჲ ჩემი, მსახურნიმცა ჩემნი იღუწიდეს ჩემთჳს, რაჲთა არამცა მივეცი ჰურიათა. ხოლო აწ მეუფებაჲ ჩემი არა არს ამიერ სოფლით.

Verse: 36V    სოფისაგანი K; მეუფჱბაჲ (2) I.


Verse: 37  Link to ntkpl   ჰრქუა მას პილატე: უკუეთუ მეუფჱ ხარ შენ? -- ჰრქუა მას იესუ: შენ იტყჳ, რამეთუ მეუფე ვარ მე. მე ამისთჳს შობილ ვარ და ამისთჳს მოვივლინე სოფლად, რაჲთა ვწამო ჭეშმარიტი. ყოველი რომელი ჭეშმარიტებისაგან იყოს, ისმინოს ჴმისა ჩემისაჲ.

Verse: 37V    უკუჱთუ H; მეუფე (1) IK.


Verse: 38  Link to ntkpl   ჰრქუა მას პილატე: რაჲ არს ჭეშმარიტებაჲ? -- და ვითარცა ესე თქუა, კუალად გამოვიდა და ჰრქუა ჰურიათა მათ: მე არცა ერთსა ბრალსა ვჰპოებ ამის თანა.


Verse: 39  Link to ntkpl   ხოლო არს ჩუეულებაჲ თქუენი, რაჲთა ერთი მიგიტეო თქუენ დღესასწაულსა ამას. გნებავსა, რაჲთა მიგიტეო თქუენ მეუფჱ ჰურიათაჲ?

Verse: 39V    ჩუჱულებაჲ HI; დღჱსასწაულსა Q.


Verse: 40  Link to ntkpl   კუალად უკუე ღაღატ-ყვეს ყოველთა და თქუეს: ნუ ეგე, არამედ ბარაბა. -- და იყო ესე ბარაბა ავაზაკი.

Verse: 40V    უკუჱ QHIK; ღაღატ- HIK.



Next part


This text is part of the TITUS edition of Tetraevangelium (redactio athonensis).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.