და იქმნა წელსა შინა მეშჳდესა, მეხუთესა თთუესა, ათსა თთჳსასა, მოვიდეს კაცნი მოხუცებულთაგან სახლისა ისრაჱლისათა გამოკითხვად უფლისა და დასხდეს წინაშე პირსა ჩემსა.
და იქმნა სიტყუაჲ უფლისაჲ ჩემდამო მეტყუელი:
ძეო კაცისაო! თქუ მოხუცებულთა მიმართ ისრაჱლისათა და სთქუა მათდამი: ამათ იტყჳს ადონაი უფალი: უკუეთუ გამოკითხვად ჩემდა მოხუალთ თქუენ, ცხოველ ვარ მე, უკუეთუ მიგიგო თქუენ, -- იტყჳს ადონაი უფალი.
უკუეთუ უსაჯო მათ შჯაჲ, ძეო კაცისაო, უშჯულოებანი მამათა მათთანი უწამენ მათ.
და სთქუა მათდამი: ამათ იტყჳს ადონაი უფალი: დღით რომლითგან სათნო ვიყავ სახლი ისრაჱლისაჲ და ვეცნობე თესლსა სახლისა იაკობისსა და ვეცნობე მათ ქუეყანასა შინა ეგჳპტისასა და შევეწიე მათ ჴელითა ჩემითა მეტყუელი: მე უფალი ღმერთი თქუენი,
მას დღესა შინა შევეწეოდე მათ ჴელითა ჩემითა გამოყვანებად მათდა ქუეყანისაგან ეგჳპტისა ქუეყანად, რომელი განუმზადე მათ, ქუეყანად მადინებელად სძისა და თაფლისა, გოლი არს უფროჲს ყოვლისა ქუეყანისა.
და ვთქუ მათდამი: თითოეულმან საძაგელებანი თუალთა მისთანი განყარენინ და სიმარჯუეთა შინა ეგჳპტისათა ნუ შეიგინებით, მე ვარ უფალი ღმერთი თქუენი.
და განდგეს ჩემგან და არა ინებეს სმენად ჩემი, თითოეულმან საძაგელებანი თუალთა მისთანი არა განყარნეს და სიმარჯუენი ეგჳპტისანი არ დაუტევნეს, და ვთქუ გარდაფენად გულისწყრომაჲ ჩემი მათ ზედა, შესრულებად რისხვაჲ ჩემი მათ შორის საშუალ ქუეყანასა ეგჳპტისასა.
და ვყო, რაჲთა სახელი ჩემი ყოვლად ყოვლითურთ არ შეიგინოს. წინაშე წარმართთა, რომელთასა იგინი არიან შორის მათსა, და რომელთა შორის ვეცნობე წინაშე მათსა გამოყვანებად მათდა ეგჳპტით.
Page of ed. 1709: 174b და გამოვიყვანენ იგინი ეგჳპტისა\გან Page of ms. Ga: 257v და მივიყვანენ იგინი უდაბნოდ.
და მივსცენ მათ ბრძანებანი ჩემნი და სამართალნი ჩემნი ვაუწყენ მათ, რაოდენნი ყვნეს იგინი კაცმან, და ცხოვნდეს მათ შინა.
და შაბათნი ჩემნი მივსცენ მათ ყოფად იგინი სასწაულად შორის ჩემსა და შორის მათსა, რაჲთა ცნან მათ, ვითარმედ მე ვარ უფალი წმიდამყოფელი მათი.
და ვთქუ სახლისა მიმართ ისრაჱლისა: უდაბნოს ბრძანებათა შინა ჩემთა ვიდოდეთ. და არა ვიდოდეს და სამართალნი ჩემნი განიშორნეს, რომელნი ყვნეს იგინი კაცმან და ცხოვნდეს მათ შინა, და განმამწარეს მე სახლმან ისრაჱლისამან, უდაბნოს ზედა ბრძანებათა შინა ჩემთა არა ვიდოდეს და სამართალნი ჩემნი განიშორნეს, რომელნი ყვნეს იგინი კაცმან და ცხოვნდეს მათ შინა; და შაბათნი ჩემნი შეაგინნეს ფრიად; და ვთქუ გარდაფენად გულისწყრომაჲ ჩემი მათ ზედა უდაბნოს შინა აღსაჴოცელად მათდა.
და ვყავ, რაჲთა სახელი ჩემი ყოვლითურთ არ შეიგინოს წინაშე წარმართთასა, რომელთაგან გამოვიყვანენ იგინი წინაშე თუალთა მათთა.
და მე აღვიღე ჴელი ჩემი მათ ზედა, უდაბნოს შინა, რაჲთურთით არშეყვანებად მათდა ქუეყანად, რომელი მივეც მათ ქუეყანად მადინებელად სძესა და თაფლსა, გოლი არს უფროჲს ყოვლისა ქუეყანისა.
მათ წილ, რომელ სამართალნი ჩემნი განიშორნეს და ბრძანებათა შინა ჩემთა არა ვიდოდეს მათ შინა და შაბათთა ჩემთა შეაგინებდეს, შემდგომად გულისზრახვათა მათთასა ვიდოდეს.
და ჰრიდა მათ თუალმან ჩემმან არა აღჴოცად მათდა და არა ვყვენ იგინი მოსასრულებლად უდაბნოს ზედა.
და ვთქუ შვილთა მათთა მიმართ უდაბნოს შინა: შჯულებთა შორის მამათა თქუენთაჲსა ნუ ხუალთ და სამართალთა მათთა ნუ დაიმარხავთ და სიმარჯუეთა მათთა ნუ თანა აღერევით და ნუ შეიგინე\ბით Page of ed. 1709: 175a .
მე ვარ უფალი ღმერთი თქუენი: ბრძანებათა შინა ჩემთა ვიდოდეთ და სამართალნი ჩემნი დაიმარხენით და ყვენით იგინი:
და შაბათნი ჩემნი წმიდა ყვენით იგინი და იყვნენ სასწაულად შორის ჩემსა და შორის თქუენსა, ცნობად, ვითარმედ მე ვარ უფალი ღმერთი თქუენი.
და განმამწარეს მე შვილთაცა მათთა: ბრძანებათა შინა ჩემთა არა ვიდოდეს და სამართალნი ჩემნი არ დაიმარხნეს ყოფად მათდა, რომელ\თაჲ Page of ms. Ga: 258r მოქმედი მათი კაცი ცხოვნდეს მათ შინა. და შაბათნი ჩემნი შეაგინნეს და ვთქუ მიფენად გულისწყრომაჲ ჩემი მათ ზედა, აღსრულებად რისხვაჲ ჩემი მათ ზედა, უდაბნოს შინა.
და მოვაქციე ჴელი ჩემი მათგან, რომელი ვყავ ჩემთჳს, რაჲთა სახელი ჩემი რაჲთურთით არ შეიგინოს წინაშე წარმართთასა, რომელთაგან გამოვიყვანენ იგინი წინაშე თუალთა მათთა.
და აღვიღე ჴელი ჩემი მათ ზედა უდაბნოს შინა განბნევად მათდა წარმართთა შორის და განთესვად მათდა სოფლებთა შორის.
მათ წილ, რომელ სამართალნი ჩემნი არა ყვნეს და ბრძანებანი ჩემნი განიშორნეს და შაბათნი ჩემნი შეაგინნეს და უკუანა გულისზრახვათა მამათა მათთასა იყვნეს თუალნი მათნი.
და მე მივსცენ მათ ბრძანებანი არაკეთილნი და სამართალნი, რომელთა შინა არ ცხოვნდენ მათ შინა.
და მწიკულევან ვყვნე იგინი ნიჭთა შინა მათთა განსლვასა ჩემსა ყოვლისა მიმართ განმდებისა საშოჲსაჲსა, რაჲთა უჩინო ვყო იგი, რაჲთა ცნან, ვითარმედ მე ვარ უფალი.
ამისთჳს თქუ სახლისა მიმართ ისრაჱლისა, ძეო კაცისაო, და სთქუა მათდა მიმართ: ამათ იტყჳს ადონაი უფალი: ვიდრე ამისამდე განმარისხეს მე მამათა თქუენთა დაკუეთებათა მიერ მათთა, რომელთა შინა დაეკუეთნეს თჳთ ჩემდამო.
და შევიყვანენ იგინი ქუეყანად, რომლისა მიმართ აღვიღე ჴელი ჩემი მიცემად იგი მათ, და იხილეს ყოველი ბორცჳ მაღალი და ყოველი ხე ჩრდი\ლოანი Page of ed. 1709: 175b და უზორეს მუნ ღმერთთა მათთა და დააწესეს მუნ საკუმეველი ძღუენთა მათთაჲ და დადვეს მუნ საყნოსი სულნელებისა მათისაჲ და უგეს მუნ გებანი მათნი.
და ვთქუ მათდამი: რაჲ არს ღავვანა, რამეთუ თქუენ შეხუალთ მუნ? და ეწოდა სახელი მისი ღავვანა ვიდრე დღესისა დღემდე.
ამისთჳს თქუ სახლისა მიმართ ისრაჱლისა: ამათ იტყჳს ადონაი უფალი ღმერთი: უშჯულოებათა შინა მამათა თქუენთასა შეიგინებით თქუენ და უკუანა საძაგელთა მათთა ისიძავთ თქუენ.
და დასაბამთა შინა მისაცემელთა თქუენთასა და განჩინებათა შინა თქუენთა, განვლებისა მიერ შვილთა თქუენთასა ცეცხლს\ისა Page of ms. Ga: 258v შორის, თქუენ შეიგინებით და ყოველთა შინა გულისზრახვათა მათთა ვიდრე დღესისა დღემდე და მე სიტყუაჲ გიგო თქუენ, სახლო ისრაჱლისაო? ცხოველ ვარ მე, -- იტყჳს ადონაი უფალი, უკუეთუ მიგიგო თქუენ და აღვიდეს სულსა თქუენსა ზედა ესე.
და არა იყოს, ვითარ სახედ თქუენ იტყჳთ: ვიყვნეთ, ვითარცა წარმართნი და ვითარცა ტომნი ქუეყანისანი, დაკუთნვად ძელთა და ქვათა.
ამისთჳს ცხოველ ვარ მე, იტყჳს ადონაი უფალი; არა თუ ჴელითა მტკიცითა და მკლავითა მაღლითა და გულისწყრომითა განფენილითა ვმეფობდე თქუენ ზედა.
და გამოგიყვანნე თქუენ ერთაგან და შეგიწყნარნე თქუენ სოფლებთაგან, სადა განიბნიენით მათ შორის, ჴელითა მტკიცითა და მკლავითა მაღლითა და გულისწყრომითა განფენილითა.
და მიგიყვანნე თქუენ უდაბნოდ ერთა და განგესაჯო თქუენდამი მუნ პირითა პირისა მიმართ.
ვითარ სახედ განვესაჯე მამათა თქუენთა მიმართ უდაბნოს შინა ეგჳპტისასა, ესრეთ გსაჯნე თქუენ, იტყჳს ადონაი უფალი.
და მოგიყვანნე, თქუენ ქუეშე კუერთხსა ჩემსა და შეგიყვანნე თქუენ რიცხუსა Page of ed. 1709: 176a შორის აღთქუმისასა.
და გამოვარჩინე თქუენგან უთნონი და განდგომილნი, მით რამეთუ ქუეყანისაგან მსხემობისა მათისა გამოვიყვანნე იგინი და ქუეყანად ისრაჱლისა არა შევიდენ და სცნათ, ვითარმედ მე ვარ უფალი.
ხოლო თქუენ, სახლი ისრაჱლისაჲ, ამათ იტყჳს ადონაი უფალი: კაცადმან სიმარჯუენი თჳსნი მოისპენით და ამათს შემდგომად, უკუეთუ თქუენ ისმინოთ ჩემი და სახელი მისი. წმიდაჲ არ შეაგინოთ, არღა მერმე ძღუენთაებრ თქუენთა და სიმარჯუეთაებრ თქუენთა გიყო თქუენ,
მით რამეთუ მთასა ზედა წმიდასა ჩემსა, მთასა ზედა მაღალსა ისრაჱლისასა, -- იტყჳს ადონაი უფალი, მუნ მმსახურებდეს მე ყოველი სახლი ისრაჱლისაჲ სრულიად ქუეყანასა ზედა და მუნ შევიწყნარნე მე იგინი და მუნ ზედ-მივიხილო დასაბამთა თქუენთა და დასაბამთა განნაჩინებთა თქუენთასა, ყოველთაგან სიწმიდეთა თქუენთა.
საყნოსად სულნელებისად შევიწყნარნე თქუენ, გამოგიყვანნე რაჲ თქუენ ერთაგან, და შეგი\წყნარნე Page of ms. Ga: 259r თქუენ სოფლებთაგან, რომელთა შორის განიბნიენით მათ შორის, და წმიდა ვიყო თქუენ შორის წინაშე თუალებსა ერთასა.
და სცნათ, ვითარმედ მე ვარ უფალი შეყვანებასა შინა ჩემ მიერ თქუენსა ქუეყანად ისრაჱლისა, ქუეყანად, რომლისა მიმართ აღვიღე ჴელი ჩემი მიცემად იგი მამათა თქუენთა.
და მოიჴსენოთ მუნ გზათა თქუენთაჲ და სიმარჯუეთა თქუენთა ყოველთაჲ, რომელთა შინა შეიგინებოდეთ მათ შინა; იცემდით პირთა თქუენდა ყოველთა ზედა უკეთურებათა თქუენთა, რომელთაცა იქმოდეთ.
და სცნათ, ვითარმედ მე ვარ უფალი, ესრეთ რაჲ გიყო თქუენ, რაჲთა არა შეიგინოს სახელი ჩემი არა გზათა თქუენთაებრ ბოროტთა, არცა სიმარჯუეთა თქუენთაებრ განხრწნილთა, სახლო ისრაჱლისაო, -- იტყჳს ადონაი უფალი.
და იქმნა სიტყუაჲ უფლისაჲ ჩემდამო მეტყუელი:
ძეო კაცისაო, განიმტკიცე პირი შენი თემანსა ზედა და მიიხილე Page of ed. 1709: 176b დაგონსა ზედა და წინაწარმეტყუელებდ მაღნარსა ზედა წინამძღუარსა ნაგევისსა.
ჰრქუა მაღნარსა ნაგევისსა: ისმინე სიტყუაჲ უფლისაჲ: ამას იტყჳს უფალი ღმერთი: აჰა მე აღვაგზნა შენ შორის ცეცხლი და შეჭამოს შენ შორის ყოველი ხე ნედლი და ყოველი ხე ჴმელი, არა დაშრტეს ალი აღტყინებული და დაიწუას მის შორის ყოველი პირი მზის აღმოსავალითგან ვიდრე ჩრდილოდმდე.
და ცნას ყოველმან ჴორცმან, ვითარმედ მე უფალმან აღვაგზენ იგი და არა დავშრიტო.
და ვთქუ: ნუსადა, უფალო უფალო! იგინი მეტყჳან მე, ანუ არა იგავი თქუმული არს ესე?
