და იქმნა სიტყუაჲ უფლისაჲ ჩემდამო მეტყუელი:
ძეო კაცისაო, რაჲ არს თქუენდა იგავი ესე ძეთა შორის ისრაჱლისათა, მეტყუელთა: მამათა ჭამეს კაწახი და კბილნი შვილთანი მობრყჳლდეს?
ცხოველ ვარ მე! -- იტყჳს ადონაი უფალი, უკუეთუ იქმნის მერმე თქუმული ეგე იგავი ისრაჱლსა შორის.
რამეთუ ყოველნი სულნი ჩემნი არიან: ვითარ სახედ სული მამისაჲ, ეგრეთვე სულიცა ძეთაჲ -- ყოველნი სულნი ჩემნი არიან. და სული მცოდველი იგი მოკუდეს.
ხოლო კაცი, რომელი იყოს მართალ, რომელმან ყოს მშჯავრი და სიმართლე,
მთათა ზედა არა ჭამოს და თუალნი მი\სნი Page of ms. Ga: 255v არა აღიხუნეს კერპთა მიმართ სახლისა ისრაჱლისათა და ცოლი ქმრისა თჳსისაჲ არ შეაგინოს და დედაკაცისა მიმართ, დაშტნობასა შინა მყოფისა, არ მიეახლოს;
და კაცსა არა ჰმძლავროს, ნაჴუთევი თანამდებსა უკუნ-სცეს და ტაცებაჲ არა იტაცოს, პური მისი მშიერსა მისცეს და შიშუელსა შეჰმოსოს სამოსელი;
და ვეცხლი მისი აღნადგინებად არ მისცეს და განნამრავლები არა მიიღოს, სიცრუისაგან მიაქციოს ჴელი თჳსი და მშჯავრი მართალი ყოს შორის კაცისა და შორის მოყუსისა მისისა;
და ბრძანებათა შინა ჩემთა ვლოს და სამართალნი ჩემნი დაიმარხნეს ქმნად იგინი, მართალ არს ესე, ცხოვნებით ცხოვნდეს, -- იტყჳს ადონაი უფალი.
და უკუეთუ შვეს ძე ბუგრიანი, დამთხეველი სისხლსა და მოქმედი ცოდვასა,
გზასა შინა მამისა მისისა მართლისასა არა ვლო, არამედ მთათა ზედა ჭამა და ცოლი მოყუსისაჲ შეაგინა;
და გლახაკსა და დავრდომილსა ჰმძლავრა და ნატაცები იტაცა და ნაკუთევი არა უკუნ-სცა და კერპთა მიმართ მიადგნა თუალნი მისნი, უშჯულოებაჲ ქმნა;
ვეცხლი აღნადგინებად განსცა და განნამრავლები მოიღო, ესე ცხოვნებითა არა ცხოვნდეს; ყოველნი ესე უშჯულოებანი ქმნნა, სიკუდილით მოკუდეს, სისხლი მისი მის ზედა იყოს.
ხოლო უკუეთუ შვას ძე და იხილნეს ყოველნი ცოდვანი მამისა მისისანი, რომელნი ქმნნა, და შეიშინოს და არა ყოს მათებრ:
მთათა ზედა არა ჭამოს და თუალნი მისნი არა დასხნა გულისსათქუმელთა ზედა სახლისა ისრაჱლისათა და ცოლი მოყუსისაჲ არ შეაგინა
და კაცსა არა ჰმძლავრა და ნაჴუთევი არა იჴუთა და ნატაცები არა Page of ed. 1709: 372=172b იტაცა, პური მისი მშიერსა მისცა და შიშუელსა შეჰმოსა სამოსელი;
და სიცრუვისაგან მოაქცია ჴელი მისი, ვახში და განნამრავლები არა მიიღო, სიმართლე ქმნა და ბრძანებათა შინა ჩემთა ვიდოდა, ესე არა აღესრულოს სიცრუეთა შინა მამისა მისისათა, ცხოვნებით ცხოვნ დეს.
ხოლო მამამან მისმან, ვინაჲთგან ჭირვებით აჭირვა და ნატაცები იტაცა და წინააღმდგომნი ქმნნა შორის ერისა ჩემისა, და Page of ms. Ga: 256r მოკუდეს უსამართლოებითა მისითა.
და სთქუთ: რად, რამეთუ არა მიიღო ძემან სიცრუე მამისა მისისაჲ? რამეთუ ძემან მშჯავრი და სიმართლე და წყალობა ქმნა, ყოველნი შჯულვილნი ჩემნი დაიცვნა და [ქმნნა იგინი], ცხორებით ცოცხალ იყოს.
ხოლო სული მცოდველი იგი მოკუდეს; ძემან არა მოიღოს სიცრუვე მამისა მისისად, არცა მამამან მოიღოს სიცრუვე ძისა მისისად, სიმართლე მართლისაჲ მის ზედა იყოს და უშჯულოებაჲ უშჯულოჲსა მის ზედა იყოს.
და უშჯულომან უკუეთუ მოაქციოს ყოველთაგან უშჯულოებათა მისთა, რომელნი ქმნნა, და დაიცვნეს ყოველნი მცნებანი ჩემნი და ყოს მშჯავრი და სიმართლე და წყალობაჲ, ცხოვნებით ცხოვნდეს და არა მოკუდეს.
ყოველნი უსამართლოებანი მისნი, რომელნი ქმნნა, არა აღეჴსენნენ მას; სიმართლესა შინა მისსა, რომელი ქმნა, ცხოვნდეს.
არა ნებებით მნებავს სიკუდილი უშჯულოჲსაჲ, -- იტყჳს უფალი უფალი, ვითარ მოქცევაჲ მისი გზისაგან ბოროტისა და ცხოვნებაჲ მისი.
და მიქცევასა შინა მართლისასა სიმართლისაგან მისისა და ქმნასა უსამართლოებათასა ყოველთაებრ უშჯულოებათა, რომელნი ქმნნა უშჯულომან, ყვნეს თუ არა, ცხოვნდეს; ყოველნი სიმართლენი მისნი, რომელნი ქმნნა, არ მოჴსენებულ იქმნენ დაცემასა შინა მისსა, რომელ დაეცა; და ცოდვათა შინა მისთა, რომელნი ცოდნა, მათ შინა მოკუდეს.
და სთქუთ: არ წარემართ\ების Page of ed. 1709: 173a გზაჲ უფლისაჲ მოქცევად მისსა გზისაგან მისისა და ცხოვნებად სული მისი, -- იტყჳს ადონაი უფალი. აწ ისმინეთ, ყოველო სახლო ისრაჱლისაო! ნუ გზაჲ ჩემი არ წარემართების, ანუ არა გზაჲ თქუენი არ წარემართებისა?
მი-თუ-აქციოს მართალმან სიმართლისაგან თჳსისა და ყოს შეცოდებაჲ და მოკუდეს, ცოდვასა შინა თჳსსა, რომელ ქმნა, მას შინაცა მოკუდეს.
და მო-თუ-აქციოს უშჯულომან უშჯულოებათაგან თჳსთა, რომელნი ქმნნა, და იქმოდის განკითხვასა და სიმართლესა, ამან სული თჳსი დაიცვა.
და იხილა და მოაქცია ყოველთაგან უშჯულოებათა თჳსთა, რომელნი ქმნნა, ცხოვნებით ცხოვნდეს და არა მოკუდეს.
და იტყჳან სახლი ისრაჱლისაჲ: არამართალ არს გზაჲ უფლისაჲ; ნუ გზაჲ ჩემი არამართალ არსა, სახლო ისრაჱლისაო! არა გზაჲ Page of ms. Ga: 256v თქუენი არამართალ არსა?
ამისთჳს და კაცადი გზათაებრ თქუენთა გსაჯნე თქუენ, სახლო ისრაჱლისაო, -- იტყჳს ადონა უფალი. მოიქეცით და მოაქციეთ ყოველთაგან უშჯულოებათა თქუენთა და არა იყვნეთ თქუენ დასაშჯელად სიცრუისა.
მოიქეცით თავით თჳსით და განიშორენით თქუენგან ყოველნი უშჯულოებანი თქუენნი, რომლითა უშჯულო იქმნებით ჩემდამო, და ყავთ თავისა თქუენისა გული ახალი და სული ახალი და რაისათჳს მოსწყდებით, სახლო ისრაჱლისაო?
რამეთუ არა მნებავს სიკუდილი მოსიკუდიდისაჲ, მის, -- იტყჳს ადონაი უფალი, ვითარ მოქცევაჲ მისი გზისაგან მისისა და ცხოვნებად სული მისი, -- იტყჳს ადონაი უფალი, და მოიქეცით და ცხოვნდით.
