და იქმნა წელსა, დასაბამით მეფე-ყოფასა სედეკია მეფისა იუდაჲსსა, წელსა მეოთხესა, თთუესა შინა მეხუთესა, თქუა ანანია, ძემან აზორისმან, ცრუ-წინაჲსწარმეტყუელმან გაბაონე[ლ]მან, სახლსა შინა უფლისასა წინაშე თუალებსა მღდელთასა და ყოვლისა ერისასა, მეტყუელმან.
ესრეთ თქუა უფალმან ღმერთმან ისრაილისმან: შევმუსრე უღელი მეფისა ბაბილონისაჲ.
შემდგომად ორისა წლისა დღეთა და მოვაქციო მე ადგილსა ამას ყოველი ჭურჭლები სახლისა უფლისაჲ, რომელ წარიღო ნაბუხოდონოსორ მეფემან ბაბილონისამან ამის ადგილისაგან და შეიღო იგი ბაბილონდ.
და იექონია, ძე იოაკიმისი, მეფისა იუდაჲსი, და ყოველი გასახლებაჲ იუდაჲსი, რომელნი მივიდეს ბაბილონდ, მე მოვაქციო ამასვე ადგილსა, [თქუა] უფალმან ეგრე, და იექონია და ნატყუენავი იუდაჲსი, რამეთუ შევმუსრო უღელი მეფისა ბაბილონისაჲ.
და თქუა იერემია ანანაჲს მიმართ ცრუ-წინაჲსწარმეტყუელისა წინაშე თუალებსა მღდელთასა და ყოვლისა ერისა, მდგომარეთასა სახლსა შინა უფლისასა.
და თქუა იერემია წინაჲსწარმეტყუელმან: ჭეშმარიტად ეგრეთ ყავნ უფალმან, დაამტკიცენ უფალმან სიტყუაჲ შენი, რომელსა შენ წინაჲსწარმეტყუელებ მოქცევად ჭურჭელთა სახლისა უფლისათა და ყოვლისა განსახლებისათა ბაბილონით ადგილისა ამის მომართ.
თჳნიერ ისმინეთ სიტყუაჲ უფლისაჲ, რომელსა ვიტყჳ მე ყურთა მომართ თქუენთა და ყურთა მომართ ყოვლისა ერისათა.
წინაჲსწარმეტყუელნი, ქმნილნი უწინარეს ჩემსა, და უწინარესნი თქუენსა საუკუნითგან, და წინაჲსწარმეტყუელებდეს ქუეყანასა ზედა მრავალსა და მეფობათა ზედა დიდთა ბრძოლისათჳს და ძჳ\რთა Page of ed. 1709: 98b და სიკუდილისა.
წინაჲსწარმეტყუელნი, რომელი წინაჲსწარმეტყუელებდა მშჳდობად, მოსლვასა სიტყჳსასა იცნობებოდა წინაჲსწარმეტყუელი, რომელი მოავლინა მათდა უფალმან სარწმუნოდ.
და მოიხუნა ანანია წინაშე თუალებსა ყოვლისა ერისასა საჴივნი ქედისაგან იერემია წინაჲსწარმეტყუელისა და შემუსრნა იგინი.
და თქუა ანანია წინაშე თუალთა ყოვლისა ერისათა, მეტყუელმან. ესრეთ თქუა უფალმან: ესრეთ შევმუსრო უღელი ნაბუქოდონორ მეფისა ბაბილონელისანი დღეთა შინა ორთა წელიწადთასა Page of ms. Ga: _ ქედისაგან ყოველთა ნათესავთაჲსა.
და წარვიდა იერემია წინაჲსწარმეტყუელი გზასა თჳსსა. და იქმნა სიტყუაჲ უფლისაჲ იერემიაჲსა მიმართ შემდგომად შემუსრვისა ანანია ცრუწინაჲსწარმეტყუელისა საჴივთაჲსა ქედისაგან მისისა, მეტყუელი.
ვიდოდე და თქუ ანანაჲს მიმართ, მეტყუელმან: ესრეთ თქუა უფალმან, საჴივნი შეშისანი დაჰმუსრენ, და ვქმნნე მათ წილ საჴივნი რკინისანი.
რამეთუ ესრეთ თქუა უფალმან ძალთამან, ღმერთმან ისრაილისამან: უღელი რკინისაჲ დავსდევ ქედსა ზედა ყოველთა ნათესავთასა, რაჲთა უქმოდინ ნაბუქოდონოსორს მეფესა ბაბილოვნისასა და მონებდენ მას, და მჴეცნიცა ველისანი მი-ვე-ვსცენ მას.
და ჰრქუა იერემია წინაჲსწარმეტყუელმან ანანიას ცრუ-წინაჲსწარმეტყუელსა: ისმენე, ანანია, არა მოგავლინა შენ უფალმან და შენ მოსავჰყავ ერი ესე ცრუთა ზედა.
ამისთჳს ესრეთ თქუა უფალმან: აჰა, მე განგავლენ შენ პირისაგან ქუეყანისა თჳთ ამას საუკუნესა მოსიკუდიდ, რამეთუ განდრეკაჲ სთქუ უფლისა მიმართ.
და მოკუდა ანანია ცრუ-წინაჲსწარმეტყუელი მას წელიწადსა შინა, თთუესა მეშჳდესა.
