და იყო ნოომმინის კაცი მეცნიერი, ქმრ\ისა Page of ms. Ga: 396r მისისაჲ. და კაცი ძლიერი ძალითა ნათესვობისაგან ელიმელიქისსა და სახელი მისი ბოოს.
ხოლო თქუა რუთმან მოაბელმან ნოომმინის მიმართ: წარვიდე ყანებად და შევკრიბნე ჴუვილნი უკუანა, რომლისაცა ვჴოო მადლი წინაშე თუალთა მისთა. ხოლო მან ჰრქუა: წარვედ, ასულო.
და წარვიდა და მოსრული შეჰკრებდა ყანასა შინა შემდგომად მომკალთასა. და დაემთხჳა იგი დამთხუევით ნაწილსა ყანისა ბოოზის ნა\თესვობისაგანისა Page of ms. Ga: 396v ელიმელექისსა.
და, აჰა, ბოოზი მოვიდა ბეთლეემით და ჰრქუა მომკალთა: უფალი თქუენ თანა! და ჰრქუეს მას: უფალმან გაკურთხენინ შენ!
და ჰრქუა ბოოსმან ყრმასა მისსა, ზედამდგომსა მომკალთასა. ვინ არს ჭაბუკიდი ისი?
და მიუგო ყრმამან ზედამდგომმან მომკალთამან და ჰრქუა: მოაბელი არს ყრმიდი, მოქცეული ნოომმის თანა ვერ ლით მოაბისაჲთ.
და თქუა: ვარჩევდე და შევჰკრებდე მჭელეულთა შორის შემდგომად მომკალთასა. და მოვიდა და დადგა განთიადითგან მწუხრამდე, არა დასცხრა ყანასა შინა მცირედცა.
და თქუა ბოოსმან რუთისა მიმართ: გესმოდენ, ასულო: ნუ წარხუალ ყანასა სხუასა კრებად და შენ არა წარხჳდე ამიერ, აქა შეეყავ ქალთა ჩემთა თანა.
და თუალნი შენნი იყვნედ ყანასა ზედა, რომელსაცა მკიან, და ვიდოდე შემდგომად მათსა. აჰა, მიმცნიეს ყრმათადა არა წარდევნად შენდა. და ოდეს მოგეწყუროს, და მივედ ჭურჭელთა მიმართ და სუ, სადაჲთ Page of ms. Ga: 397r სუმენ ყრმებნი.
და დავარდა პირსა ზედა თჳსსა და თაყუანის-სცა ქუეყანასა ზედა და თქუა მისდამი: რაჲ არს, რამეთუ ვპოე მადლი წინაშე თუალთა შენთა ცნობად ჩემდა? და მე ვარ უცხოჲ.
და მიუგო ბოოსმან და ჰრქუა მას: თხრობით მეთხრა მე, რაოდენი უყავ დედამთილსა შენსა შემდგომად სიკუდილისა ქმრისა შენისა და ვითარ დაუტევე მამაჲ შენი და დედაჲ შენი და ქუეყანაჲ ქმნისა (!)შენისაჲ და მოხუედ ერისა მომართ, რომელი არა უწყოდე გუშინდითგან და მესამით.
მოგაგენ უფალმან მოქმედებაჲ შენი და იყავნ სასყიდელი შენი სავსე უფლისა მიერ ღმრთისა ისრაჱლისა, რომლისა მომართ მოხუედ მოსავ-ყოფად ფრთეთა ქუეშე მისთა.
ხოლო მან ჰრქუა: მიპოვნიესმცა მადლი წინაშე თუალთა შენთა, უფალო, რამეთუ ნუგეშინის-მეც მე და რამეთუ ეზრახე გულსა მჴევლისა შენისასა და, აჰა, მე ვიყო ვითარცა ერთი მჴევალთა შენთაგანი.
და ჰრქუა ბოოსმან: ეგერა ჟამსა ჭამისასა მოუჴედ და ჭამე აქა პური და დააწე პური შენი ძმარსა. და დაჯდა რუთ მგუარდლ მომკალთასა და შეუბორცუა მას ბოოსმან ჴალი და ჭამა და განძღა.
და აღდგა კრებად და ამცნო ბოოსმან ყრმათა მისთა, მეტყუელმან: შორის მჭელეულთასა შეჰკრებდინ და ნუ Page of ms. Ga: 397v არცხუენთ მას.
და მტჳრთველთა იტჳრთეთ ეგე და მჭამველნი აჭამებდით მას შებორცუებულთაგან და უტევეთ ეგე და ჭამოს და კრიბოს და არა შეჰრისხნეთ მას.
და კრიბა ყანასა შინა ვიდრე მწუხრამდე და განარგნა, რომელი შეეკრიბა, და იქმნა ვითარ სათოელი ქრთილთაჲ.
და აღიღო და შევიდა ქალაქად. და იხილა დედამთილმან მისმან, რომელი შეეკრიბნა და მიმრთუმელმან რუთმან მისცნა, რომელნი დაუშთეს, რომელთაგან განძღა.
და ჰრქუა მას დედამთილმან მისმან. სადა ჰკრიბე დღეს და სადა ჰშუერ? იყავნ, რომელმან გიცნა შენ, კურთხეულ. და უთხრა რუთმან დედამთილსა თჳსსა, სადა შურა, და ჰრქუა სახელი კაცისაჲ: რომლისა თანა ვშუერ დღეს -- ბოოსი.
და ჰრქუა ნოომინ სძალსა თჳსსა: კურთხეულ არს უფლისა მიერ, რამეთუ არა დააკლო წყალობაჲ მისი ცოცხალთა თანა და მომკუდართა თანა. და ჰრქუა მას ნოომმინმან: გუახს ჩუენ კაცი, თჳსთაგანი ჩუენთაჲ არს.
და თქუა რუთმან დედამთილისა მიმართ თჳსისა: და მერმეცა თქუა ჩემდამო: ქალთა ჩემთა თანა Page of ms. Ga: 398r შეეყავ, ვიდრემდის დასრულდეს სამკალი ყოველი, რაოდენი არს ჩემდა.
და თქუა ნოომმინმან რუთის მიმართ, სძლისა თჳსისა: კეთილ, ასულო, რამეთუ ჰვლე ქალთა თანა მისთა, არა შეგაცთუნებენ შენ აგარაკისა მიმართ სხჳსა.
და შეეყო რუთ ქალთა ბოოსისთა შეკრებად, ვიდრემდის დაასრულა მკაჲ ქრთილთა და იფქლთაჲ, და დაჯდა დედამთილისა თანა თჳსისა.
