და აღიმსთო იისუმან განთიად და იტრნეს სატტით და მოვიდეს ვიდრე იორდანედმდე და დაიბანაკეს მუნ განსავალსა თანა.
და იყო, შემდგომად სამისა დღისა და ვლეს მწიგნობართა ბანაკი
და ამცნეს ერსა, მეტყუელთა: რაჟამს იხილოთ კიდობანი აღთქუმისა ღმრთისა ჩუენისაჲ და მღდელნი ჩუენნი და ლევიტელნი აღმდებელად მისსა, აღიტრენით ადგილთაგან თქუენთა და Page of ms. Ga: 309v ვიდოდეთ შემდგომად მისსა.
არამედ განგრძობილ იყავნ შორის თქუენსა და მისსა ვითარ ორათასებ წყრთა, დადეგით, ნუ მიეახლებით მას, რაჲთა დასდგეთ გზასა, რომელსა ვიდოდის იგი, რამეთუ არა სრულ ხართ გზასა გუშინდიდგან და მესამით დღით.
და ჰრქუა იისუმან ერსა. იუმწინკულოეთ ხვალისა, რამეთუ ხვალე ყვნეს უფალმან თქუენ შორის საკჳრველნი.
და ჰრქუა იისუმან მღდელთა: აღიღეთ კიდობანი აღთქუმისა უფლისაჲ და წინა ვიდოდეთ ერისა. და აღიღეს მღდელთა კიდობანი აღთქუმისა უფლისაჲ და ვიდოდეს წინაშე ერისა.
და თქუა უფალმან იისუჲს მიმართ: ამას დღესა ვიწყებ ამაღლებად შენდა წინაშე ყოველთა ძეთა ისრაჱლისათა, რაჲთა ცნან: ვითარ-იგი ვიყავ მოსეს თანა, ეგრეთ ვიყო შენთანაცა.
და აწ ამცენ მღდელთა აღმღეთა კიდობნისა აღთქუმისათა, მეტყუელმან: ვითარცა შეხჳდეთ კერძოსა წყლისა იორდანისასა და იორდანესა შინა დადეგით.
და ჰრქუა იისუმან ძეთა ისრაჱლისათა: შემოკერბით აქა და ისმინეთ სიტყუაჲ უფლისა ღმრთისა თქუენისაჲ.
ამის მიერ ცანთ აწ, ვითარმედ: უფალი მცხოვნი არს თქუენ შორის და მომსრველი მოჰსრავს პირისაგან თქუენისა ქანაანელსა და ქეტელსა და ფერეზელსა და ეველსა და ამორეველსა და გერგესეველსა და იებუსელსა.
აჰა, კიდობანი აღთქუმისა უფლისა ყოვლისა ქუეყანისაჲ განვალს იორდანესა.
გამოირჩიენით თქუენ ათორმეტნი კაცნი ძეთაგან Page of ms. Ga: 310r ისრაჱლისათა ერთი თითო ტომისაგან.
და იყოს, ვითარცა დასცხრენ ფერჴნი მღდელთანი. აღმღებელთანი კიდობნისა აღთქუმისა უფლისა ყოვლისა ქუეყანისათანი წყალსა შინა იორდანისასა, წყალი იორდანისაჲ მოაკლდეს, ხოლო წყალი შთამომავალი დადგეს.
და აღიტრა ყოველი ერი კარვებთაგან მათთა განვლად იორდანისა, ხოლო მღდელთა აღიღეს კიდობანი აღთქუმისა უფლისაჲ წინა კერძო ერისა.
და ვითარცა შევიდოდეს მღდელნი აღმდენი კიდობანსა აღთქუმისა უფლისასა იორდანედ და ფერჴნი მღდელთა აღმდეთა კიდობანსა აღთქუმისა უფლისასა შთაეწნეს კერძოსა წყლისა იორდანისასა, ხოლო იოროანე აღავსებდა ყოვლითურთ კმოდესა მისსა, ვითარცა დღეთა მკისა იფქლისათა.
და დადგეს წყალნი შთამომავალნი ზენაჲთ და დგა შენაყინავად ერთად განდგომილი შორს ფრიად ვიდრე კერძომდე კარითიარიმისსა, ხოლო შთამავალი შთავიდა ზღუად არაბად, ზღუად მარილთად ვიდრე სრულიად მოაკლდა და ერი დგა პირისპირ იერიქოსა.
და დგეს მღდელნი აღმღენი კიდობანსა აღთქუმისა უფლისასა ჴმელსა ზედა საშუალ იორდანესა. და ყოველნი ძენი ისრაჱლისანი განვიდოდეს ჴმელად, ვიდრემდის დაესრულა ყოველი ერი განმვლელი იორდანისაჲ.
