ხოლო უკუეთუ განჴჳდე ბრძოლად მტერთა მიმართ შენთა და იხილო ცხენი და მჴედარი და ერი უმრავლესი შენსა, არა შეგეშინოს მათგან, რამეთუ უფალი ღმერთი შენი შენ თანა არსაღმომყვანებელი შენი ქუეყანით ეგჳპტით.
და იყოს, რაჟამს მიეახლო ბრძოლასა და მახლობელმან მღდელმან ჰრქუას ერსა და თქუას მათდა მიმართ:
ისმინე, ისრაელ, თქუენ მიხუალთ დღეს ბრძოლად მტერთა თქუენთა ზედა. ნუ დაჰჴსნდებინ გული თქუენი, ნუშეჰშინდებით, ნუცა შეშჯაბნდებით, ნუცა მისდრკებით პირისაგან მათისა,
რამეთუ უფალი ღმერთი თქუენი, რომელი წინა გიძღჳს თქუენ, თქუენ თანა ებრძოლოს მტერთა თქუენთა და განგარინნეს თქუენ.
და იტყოდინ მწიგნობარნი ერისა მიმართ მეტყუელნი: ვინ არს კაცი, რომელმან აღაშენა სახლი ახალი და არა ყო სატფური მისი, ვიდოდენ და მიიქეცინ სახით თჳსსა, ნუუკუე მოკუდეს ბრძოლასა შინა და სხუამან კაცმან ყოს სატფური მისი.
და ვინ არს კაცი, რომელმან დაჰნერგა ვენაჴი და არა განიშუა მის\გან, Page of ms. Ga: 252v ვიდოდენ, მიიქეცინ სახიდ თჳსსა, ნუსადა მოკუდეს ბრძოლასა შინა და კაცმან სხუამან დაიპყრას იგი.
და ვინ არს კაცი, რომელსა მიეთხოოს ცოლი და არღა შეერთოს, ვიდოდენ და მიიქეცინ სახიდ თჳსსა, ნუსადა მოკუდეს ბრძოლასა შინა და კაცმან სხუამან შეირთოს იგი.
და შესძინონ მწიგნობართა სიტყუად ერისა მიმართ და თქუან: ვინ არს კაცი შეშინებული, შეჯაბნებული გულითა, ვიდოდენ და მიიქე\ცინ Page of ms. Ga: 253r სახიდ თჳსსა, რაჲთა არა შეაჯაბნოს გული ძმისა თჳსისაჲ, ვითარცა თჳსი.
და იყოს, ვითარცა დასცხრენ მწიგნობარნი მეტყუელნი ერისა მიმართ და დაადგინნენ მთავარნი მჴედრობისანი, მძღუანველნი ერისანი,
და უკუეთუ მიხჳდე ქალაქისა მიმართ ბრძოლი-ყოფად მისსა და ეზრახო მათ მშჳდობისა თანა.
და იყოს, უკუეთუ მშჳდობით ვიდრემე მოგიგონ შენ და განგიღონ შენ, იყოს ყოველი ერი, რომელნი იპოვნენ მას შინა, იყვნენ შენდა მოხარკე და Page of ms. Ga: 253v მორჩილ შენდა.
ხოლო არათუ ისმინონ შენი და ყონ შენდა მიმართ ბრძოლაჲ, და გარე მოადგე მას,
და მოგცეს იგი უფალმან ღმერთმან შენმან ჴელთა და დასცე ყოველი წული მათი კლვითა მახჳლისაჲთა,
თჳნიერ დედებისა და ჭურჭლისა. და ყოველი საცხოვარი, რაოდენი იყოს ქალაქსა შინა, და ყოველი საცხორებელი წარმოსტყუენო თავისა შენისად და შეშჭამო ყოველი იავარი მტერთა შენთაჲ, რომელნი უფალმან ღმერთმან მოგცეს შენ.
ესრეთ უყო ყოველთა ქალაქთა შორიელთა შენგან ფრიად, რომელნი არა იყვნენ ქალაქებისაგან ამათ მათესავთაჲსა.
ხოლო, აჰა, ქალაქებისაგან ამათ ნათესავთაჲსა, რომელთასა უფალი ღმერთი შენი მიგცემს შენ დამკჳდრებად, ქუეყანასა მასა არა წარმოსტყუენოთ მათგან ყოველი აღმომფშჳნველი,
არამედ შეჩუენებით შეჩუენებულ-ჰყვნეთ იგინი: ქეტელი და ამორრეველი და ქანანელი და იებუსელი და გერგესეველი, ვითარ-სახედ გამცნო შენ უფალმან ღმერთმან შენმან.
რაჲთა არა გასწავონ შენ ქმნად ყოველთა საძაგელებათა მათთა, რაოდენთა უყოფდეს ღმერთთა, და სცოდოთ წინაშე უფლისა ღმრთისა თქუენისა.
უკუეთუ გარე მოადგე ქალაქსა დღეთა მრავალტა ბრძოლად მისსა გამოღებისათჳს მისისა, არა მოჰკაფნე ხევნარნი მისნი დიდებითა მათ ზედა მახჳლისაჲთა, არამედ მათგან შჭამო. ხოლო იგინი არა მოჰკუეთნე, რამეთუ ნუ კაცი არსა ხე მაღნარად შესლვად პირისაგან შენისა საპატნეზეობასა მას?
არამედ ხე, რომლისაჲ უწყოდი, ვითარმედ არა ნაყოფსა Page of ms. Ga: 254r ჭამადი არს, ესე მოჰსრა და მოშჭრა და აღადგა პატნეზ ქალაქსა ზედა, რომელმან ყოს შენდა მიმართ ბრძოლაჲ, ვიდრე არა მოგეცეს.
