და მომაქცეველნი აღვედით გზად ბასანად მიმართად. და გამოვიდა ოგ მეფე ბასანისაჲ შემთხუევად ჩუენდა, იგი და ყოველი ერი მისი მის თანა ბრძოლად ედრაინს.
და თქუა Page of ms. Ga: 219v უფალმან ჩემდამო: ნუ შეშინდები მისგან, რამეთუ ჴელთა შენთა მივეც იგი და ყოველი ერი მისი და ყოველი ქუეყანაჲ მისი; და უყო მას, ვითარ-იგი უყავ სიონს მეფესა ამორრეველთასა, რომელი მკჳდრ იყო ესებონს.
და მოგუცა ჩუენ უფალმან ღმერთმან ჩუენმან ჴელთა ჩუენთა ოგ მეფეცა ბასანისაჲ და ყოველი ერი მისი, და დავეცით იგი ვიდრე არა დატევებამდე მისი თესლი.
და დავიპყრენით ყოველნი ქალაქნი მისნი მას ჟამსა შინა. არა იყო ქალაქი, რომელი არა მოვიღეთ მათგან, სამეოცნი ქალაქნი, ყოველნი გარემო სოფლებნი [არგობ] მეფისა ოგისი ბასანს შინა.
ყოველნი ქალაქნი, მაგარნი ზღუდენი, მაღალნი ბჭენი და მოქლონნი თჳნიერ ქალაქებისა ფერეზელთაჲსა, რომელნი მრავალ იყვნეს ფრიად,
მოვსრენით იგინი, ვითარცა უყავთ სიონს მეფესა ესებონისასა, და მოვსართ ყოველი ქალაქი შემდგომითი შემდგომად და ცოლნი მათნი და შვილნი,
და ყოველი საცხოვარი და ნატყუენავი ქალაქთაჲ წარმოვიარეთ ჩუენდად.
და მოვიღეთ მას ჟამსა შინა ქუეყანაჲ ჴელთაგან ორთა მეფეთა ამორეველთასაჲსა, რომელნი იყვნეს წიაღ იორდანესა ნაღუარევითგან არნონისაჲთ და ვიდრე აერმონადმდე,
(ფინიკიელთა გადრასახელეს აერომონი სანიორად და ამორრეველმან გადრასახელა იგი სინირად),
ყოველი ქალაქები მისორისაჲ და ყოველი გალაადი და ყოველი ბასსანი ვიდრე ელხადმდე და ედრაინ ქალაქი მეფობისა ოგ\ისი Page of ms. Ga: 220r ბასსანს.
გარნა რამეთუ ოგ მეფე ბასანისაჲ დაშთა რაფაინთაგან. აჰა, ცხედარი მისი ცხედარი რკინისაჲ. აჰა, ესე მწუერვალსა ძეთა ამონისთასა, ცხრა წყრთა სივრცე მისი წყრთითა მამაკაცისაჲთა.
და ქუეყანაჲ იგი დავიმკჳდრეთ მას ჟამსა შინა აროირითგან, რომელი არს ბაგესა თანა ნაღუარებისა არნონისასა. და ნახევარი მთისა გალაადისაჲ და ქალაქნი მისნი მივეც რუბენს და გადს.
და ნეშტი გალაადისაჲ და ყოველი სამეფოჲ ოგისი მივეც კერძოსა ტომსა მანასსისასა და ყოველსა გარემო სოფლებსა არღოვისასა ვიდრე საზღვართამდე ღარღასისათა.
და იაირ გარდასახელა იგი სახელსა თჳსსა ზედა `ბასსანი ანოთი იაირად' ვიდრე დღედმდე ამა[დ].
და მაქირს მივეც გალაადი.
და რუბენს და გადს მივეც გალაადითგან ვიდრე ნაღუარევადმდე არნონისა, საშუალ ნაღუარევისა ზღვარი და ვიდრე იაბოკადმდე ღუარი საზღვარი ძეთა ამმანისთაჲ.
და არაბისაჲ და იორდანე საზღვრად მაქინეედითგან და ვიდრე ზღუადმდე არაბიაჲსა ზღუად მარილოვნად ქუე ასიდოთისა ფასღადმდე აღმოსავალისა.
და გამცენ თქუენ მას ჟამსა შინა მეტყუელმან: უფალმან ღმერთმან ჩუენმან მოგცა თქუენ ქუეყანაჲ ესე ნაწილად, შეჭურვილნი წინა წარედით წინაშე პირსა ძმათა Page of ms. Ga: 220v თქუენთა, ძეთა ისრაელისათა ყოველი ძლიერი.
თჳნიერ ცოლნი თქუენნი და შვილნი თქუენნი და საცხოვარი თქუენი (უწყი, რამეთუ მრავალ არს საცხოვარი თქუენი), დაემკჳდრენით ყოველთა შინა ქალაქთა თქუენთა, რომელი მიგცენ თქუენ.
ვიდრემდის დააწყნარეს უფალმან ღმერთმან თქუენმან ძმანიცა თქუენნი, ვითარცა-ეგე თქუენ, და დაიმკჳდრონ ამათცა ქუეყანაჲ, რომელი უფალმან ღმერთმან თქუენმან მისცეს მათ წიაღ იორდანესა და მიიქცეთ თითოეული სამკჳდრებელად თჳსსა, რომელი მიგეც თქუენ.
და იისუს ვამცენ მას ჟამსა შინა მეტყუელმან: თუალთა თქუენთა იხილნეს ყოველნი, რაოდენნი უყვნა უფალმან ღმერთმან თქუენმან ორთა ამათ მეფეთა. ესრეთ უყოს უფალმან ღმერთმან თქუენმან ყოველთა სამეფოთა, რომელთა მიმართ შენ წიაღ-ხუალ მუნ.
არა შეშინდეთ მათგან, რამეთუ უფალი ღმერთი თქუენი იგი ებრძოლოს თქუენ წილ.
და ვევედრე უფალსა ღმერთსა მას ჟამსა შინა მეტყუელი:
უფალო, უფალო, შენ იწყე ჩუენებად მონასა ძალი შენი და ძლიერებაჲ შენი და ჴელი მტკიცე და მკლავი მაღალი. რამეთუ ვინ არს ღმერთი ცათა შინა ანუ ქუეყანასა ზედა, რომელმან ყოს, ვითარცა ჰყავ შენ, და ძალისაებრ შენისა?
წიაღსრულმან უკუე ვიხილო ქუეყანაჲ კეთილი ისი მყოფი წიაღ იორდანესა, მთაჲ ისი კეთილი და წინა ლიბანესა.
და უგულებელს-მყო მე უფალმან თქუენთჳს და არა შეისმინა ჩემი და თქუა უფალმან ჩემდამო: კმა-არს შენდა, ნუღარა შესძინებ Page of ms. Ga: 221r მერმე თქუმად სიტყჳსა მაგის.
აღვედ თხემსა ზედა გამოთლილისასა და აღიხილენ თუალნი ზღუად მიმართ და ჩრდილოდ და სამხრად; და აღვედ თხემსა ზედა და იხილე თუალითა შენითა, რამეთუ არა განჰვლო იორდანე ესე.
და ამცენ იისუს და ჰლოცევდ მას და განაძლიერე იგი, რამეთუ იგი წიაღ-ჴდეს წინაშე პირსა ერისა ამისსა და მან დაუმკჳდროს მათ ყოველი ქუეყანაჲ, რომელი იხილე.
და ვსხედით ჩუენ ღელესა შინა მახლობელად სახლსა ფოგორისსა.
