და იყოს, რაჟამს შეხჳდე შენ ქუეყანასა მას, რომელ-იგი უფალმან ღმერთმან შენმან მოგცეს შენ ნაწილად დამკჳდრებად და დაშენებად მას ზედა,
მოიდო შენ პირველი იგი ნაწილი ნაყოფთა მათ მის ქუეყანისათა, რაცა იყოს, და შთაასხა იგი კოლოფსა და მიხჳდე ადგილსა მას, რომელი-იგი გამოირჩიოს უფალმან ღმერთმან შენმან წოდებად სახელი მისი მას ზედა,
მიხჳდე შენ მღდელისა მის, რომელი იყოს მათ ჟამთა, და ჰრქუა მას: ვჰმადლობ მე დღეს უფალსა ღმერთსა ჩემსა, რამეთუ შევედ მე ქუეყანასა მას, რომელ ეფუცა უფალი ღმერთი მამათა ჩუენთა მოცემად ჩუენდა.
და მოიღოს მღდელმან მან კოლოფი იგი ჴელთაგან შენთა და დადგას წინაშე საკურთხეველსა მას უფლისა ღმრთისა შენისასა.
სიტყუად იწყო შენ წინაშე უფლისა Page of ms. E: 67V ღმრთისა და ჰრქუა: ასურეთი დაუტევა მამამან ჩუენმან და შთავიდა ეგჳპტედ დამკჳდრებად მუნ მცირედ ჟამ და შეიქმნა იგი ნათესავად დიდად და მრავალ ფრიად.
და გუაჭირვებდეს ჩუენ ფრიად და დაგუდვეს ჩუენ ზედა საქმე ფიცხელი და ბოროტი.
და ვღაღადებდით ჩუენ უფლისა მიმართ, ღმრთისა მამათა ჩუენთასა, და შეესმა უფალსა ჴმისა ჩუენისა და მოგუხედნა დამდაბლებასა ჩუენსა და ურვასა და ჭირსა ჩუენსა
და გამოგჳყვანნა ჩუენ ეგჳპტით ძალითა მრავლითა და ჴელითა მტკიცითა და მკლავითა მაღლითა და სასწაულებითა და ნიშებითა მრავლითა
და შემომიყვანნა ჩუენ ადგილსა ამას და მომცა ჩუენ ქუეყანა ესე, რომელსა გამოსდის სძე და თაფლი.
აწ, ესერა, მე მოვედ და მოვიდე პირველნაყოფი ქუეყანისა ამის, რომელ მომცა მე უფალმან, ქუეყანა, რომელსა გამოსდის სძე და თაფლი, და თაყუანი-\სცე Page of ms. E: 68R შენ წინაშე უფლისა ღმრთისა შენისა.
და აწ ესე შევსწირე პირველი ნაყოფი ქუეყანისა, რომელ მომცა მე უფალმან, ქუეყანა გამომდინარე სძისა და თაფლისა, და დამიტევე მე წინაშე უფლისა ღმრთისა შენისა და თაყუანისცე შენ უფალსა ღმერთსა შენსა.
და იხარებდე ყოვლითა მით კეთილითა, რომელი-იგი უფალმან ღმერთმან მოგცეს შენ, შენ და სახლი შენი და ლევიტელი იგი და მწირი იგი, რომელ დამკჳდრებულ იყო შენ თანა.
უკუეთუ გამოასრულო გამოცემად ყოველი იგი ათეული ნაყოფისა მის ქუეყანისა შენისა წელსა მას მესამესა, მეორე ნაწილი ათეულისა მის მისცე ლევიტელსა მას, მწირსა, ობოლსა და ქურივსა მას. ჭამდენ ქალაქსა შინა შენსა და განძღებოდიან.
და სთქუა შენ წინაშე უფლისა ღმრთისა შენისა: განვწმიდენ მე სახლისა ჩემისაგან ყოველნი იგი მსხუერპლნი. მივეც მწირსა, მსხემსა, ობოლსა და ქურივსა. და ყოველნი იგი მცნებანი შენნი, რომელ მამცენ მე, დავიმარხენ Page of ms. E: 68V და არა დავივიწყენ ყოველნი იგი მცნებანი შენნი.
და არა ვჭამე მისგანი ნაკლულევანებითა ამით ჩემითა და არცა განვაბნიე მისგანი ბილწებითა და არცა წარ-რაჲ-ვაგე მისგანი მკუდართა მიმართ, არამედ ვისმინე ჴმა უფლისა ღმრთისა ჩემისა და ვყვენ ყოველნი იგი მცნებანი მისნი.
აწ გარდამოიხილე შენ ზეცით, სამკჳდრებელით შენით, და აკურთხე ერი ესე შენი ისრაელი და ქუეყანა ესე, რომელი მოეც ამათ, ვითარ-იგი ეფუცე მამათა მათ ჩუენთა მოცემად ჩუენდა ქუეყანა იგი, რომელი გამოადინებს სძესა და თაფლსა.
ამას დღესა შინა გამცნო შენ უფალმან ღმერთმან შენმან დამარხვად და ყოფად ყოველთა მათ სამართალთა და მსჯავრთა ყოვლითა გულითა თქუენითა და ყოვლითა გონებითა თქუენითა.
გამოირჩიე შენ უფალი ღმერთი შენი ყოფად შენდა Page of ms. E: 69R ღმრთად და ვიდოდე ყოველთა გზათა მისთა და დაიმარხენ ყოველნი სამართალნი და მსჯავრნი მისნი. (18S) მორჩილ იყავ და ისმინე ჴმისა მისისა,
რამეთუ გამოგირჩია შენ დღეს უფალმან, რაჲთა იყო შენ მისა ერად საზეპუროდ და იმარხვიდე შენ ყოველთა მცნებათა მისთა,
და იყო შენ ზეშთა ყოველთავე ნათესავთა, ვითარცა გყო შენ სახელოვან და დიდებულ, რაჲთა იყო შენ ერად წმიდად უფლისა ღმრთისა შენისა, ვითარცა-იგი გეტყოდა შენ.
