და ეტყოდა უფალი მოსეს და ჰრქუა:
წარავლინენ შენ კაცნი და განიმსტურედ ქუეყანა იგი ქანანელთა, რომელი მივეც მე ძეთა ისრაელისათა სამკჳდრებელად; კაცთა ტომისაგან და სახლისა მამათა მათთასა ყოველივე მთავარი წარავლინე.
და წარავლინა მოსე უდაბნოთ ფარანისათ სიტყჳთა უფლისაჲთა ყოველი მთავარი ძეთაგან ისრაელისათა.
და ესე არს სახელები მათი: ტომისაგან რუბენისა ალამიელ, ძე ზაქუროსი,
სჳმეონისი ნათესავისა საფატის, ძე სურისი,
ძეთაგან იუდასთა ქალებ, ძე იეფონისი,
ძეთაგან ისაქარისთა ქალამ, ძე იოსებისი,
ძეთაგან ეფრემისთა ისო, ძე ნავესი,
ძეთაგან ბენიამენისთა ფალტი, ძე რაფუუსი,
ძეთაგან ზაბ\ულონისთა Page of ms. S: 245v იულიელ, სუდისი,
ძეთაგან მანასესთა გადი, ძე სურისი,
ძეთაგან გადისთა ამიეს, ძე გამესი,
ძეთაგან ასერისთა სათურ, ძე მიქაელისი,
ძეთაგან ნეფთალემისთა აბი, ძე იაბისი
და ძეთაგან დანისთა ტუვიელ, ძე მაქისი.
ესე არს სახელები კაცთა მათ, რომელნი წარავლინნა მოსე განხილვად ქუეყანისა მის ქანანელთასა. და დასდვა აფესეს, ძესა ნავესსა, სახელი ისო.
და წარავლინნა იგინი მოსე უდაბნოთ ქარანისათ განმსტრობად ქუეყანისა მის ქანანელთასა და ჰრქუა მათ: აღვედით ამიერ უდაბნოთ მთასა მას,
და იხილეთ ქუეყანა იგი, რაბამ რაჲ არს და ერი იგი, რომელ მსხდომარე არს მას ზედა, ანუ თუ ძლიერ არს... გინათუ მცირედ არიან, გინათუ მრავალ.
და ვითარი არს ქუეყანა იგი, რომელსა დამკჳდრებული არიან იგინი, გინათუ კეთილ არს, გინა ბოროტ; ანუ ვითარნი არიან ქალაქნი, რომელსა შინა დამკჳდრებულ არიან იგინი, გინა თუ მოზღუდვილ არიან. გინა უზღუდველ;
გინა პოხილ არს ქუეყანა იგი, გინა მჭლე, ანუ თუ არსა ხე მას ზედა, ანუ არა. და განეკრძალენით და მოიღეთ ნაყოფი ქუეყანისა მისგან. და იყუნეს დღენი იგი ზაფხულისანი და ჟამი მსთჳსა ყურძნისაჲ.
და აღვიდეს და განიმსტურეს ქუეყანა იგი ვიდრე რააბად, შესავალით ევფრათასით.
და აღვიდეს უდაბნოთ... და მუნ იყუნეს აქინან Page of ms. S: 266r და სესი და თალმი -- ნათესავნი ენაკისნი და ქებრონი შჳდით წლით შენებულ იყო უწინარეს ტანისა, რომელ არს ეგჳპტისაჲ.
და მოვიდეს იგინი ვიდრე ჴევადმდე ტევნისა და განიმსჰტურეს იგი და მოჰკუეთეს მიერ რქაჲ და ტევანი ყურძნისაჲ მას ზედა ერთი და წარიღეს იგი მჴრითა აღებით და ბროწეულისაგან და ლეღჳსა.
და უწოდეს სახელი ადგილსა მას "ჴევ [ტევნის"] ტევნისა მისისათჳს, რომელი მოჰკუეთეს ძეთა ისრაელისათა.
და მიიქცეს მიერ და განიმსტურეს ქუეყანაჲ შმდგომად ორმეოცისა დღისა.
და წარვიდეს მიერ და მოვიდეს მოსესა და ყოვლისა კრებულისა ისრაელისა უდაბნოდ ფარანისა, რომელ არს კადესა, და მიუთხრეს სიტყუაჲ ყოველსა მას კრებულსა და უჩუენეს ნაყოფი იგი მის ქუეყანისა.
და ჰრქუეს: აღვედით ჩუენ ქუეყანასა მას, რომელსა მიმავლინენით, ქუეყანასა, მდინარესა სძისა და თაფლისასა, და ესე არს ნაყოფი მისი.
არამედ ფიცხელ არს ნათესავი იგი, რომელი მყოფ არს მას ზედა, და ქალაქნი ძნელ და მოზღუდვილ და დიდ ფრიად, და ნათესავიცა ენაკისი ვიხილეთ მუნ.
და ამალეკი დამკჳდრებულ არს მუნ სამხრით კერძო, Page of ms. S: 266v და ქეტელი იგი და იეველი და იებოსლელი და ამორეველი დამკჳდრებულ არიან მთით კერძო, და ქანანელი იგი მკჳდრ არს ზღჳს კიდესა და იორდანით კერძო.
და დაადუმა ქალებ ერი იგი მოსესა მიმართ და ჰრქუა მათ: არა, არამედ აღსლვით აღვიდეთ და დავიმკჳდროთ ქუეყანაჲ იგი, რამეთუ შეძლებით შეუძლოთ მათ.
და კაცნი იგი, რომელნი აღსრულ იყვნეს მის თანა, თქუეს: არა აღვიდეთ, რამეთუ ვერ შემძლებელ ვართ აღსლვად ერისა მის, რამეთუ უძლიერეს და უფროს ჩუენსა არიან ფრიად.
და განთქუეს გმობაჲ მის ქუეყანისა, რომელ-იგი განიმსტურეს, ძეთა მიმართ ისრაელისათა, და იტყოდეს: ქუეყანაჲ იგი, რომელ ჩუენ განვლეთ და ვიხილეთ, შემჭამელი მკჳდრთა მისთა არს, და ერი იგი, რომელი ვიხილეთ მას ზედა, კაცნი ჰასაკგრძელნი არიან.
და მუნ ვიხილენით გმირნიცა და ვიყუენით ჩუენ მათ წინაშე ვითარცა მკალნი, არამედ ესრეთ ვიყუენით მათ წინაშე.
