ეტყოდა უფალი მოსეს და ჰრქუა:
იქმნენ თავისა შენისა ორნი ნესტუნი, ჭედილნი ვეცხლისანი, და იყვნენ შენდა მოწოდებად კრებულისა და ტრვად Page of ms. S: 264r ბანაკისა.
დაჰბერო მით და შემოკრბეს ყოველი კრებული კარად კარვისა საწამებელისა.
უკუეთუ ერთსა დაჰბერო, მოვიდოდიან შენდა მთავარნი იგი, წინამძღუარნი ისრაელისანი.
და დაჰბეროთ საუწყებელად და იტრას ბანაკი იგი, რომელი დაბანაკებულ იყოს მზის აღმოსავალით;
და დაჰბეროთ საუწყებელსა მას მეორესა და იტრას ბანაკი, რომელი დაბანაკებულ იყოს ჩრდილოთ; და დაჰბერეთ საუწყებელითა მესამითა და იტრას ბანაკი იგი, რომელი დაბანაკებულ იყოს ზღჳთ კერძო; და დაჰბერეთ საუწყებელსა მეოთხესა და იტრას ბანაკი იგი, რომელი დაბანაკებულ იყოს ბღუარით; და საუწყებელსა დაჰბეროდიან ტრვასა მათსა.
და რაჟამს შეჰკრიბოთ კრებული, დაჰბერით და ნუ საუწყებელად.
და ძეთა აჰრონისთა, მღდელთა, დაჰბეროდიან ნესტუებითა მით, და იყოს იგი თქუენდა შჯულად საუკუნოდ ნათესავსა შორის თქუენსა.
უკუეთუ გარდახჳდეთ ბრძოლად მტერთა თქუენთა ქუეყანასა თქუენსა და აუწყოდით ნესტუებითა მით, და მოიჴსენნეთ წინაშე უფლისა, განერნეთ მტერთაგან თქუენთა.
და დღეთა სიხარულისა თქუენისათა, დღესასწაულთა და თთჳსთავთა თქუენთა დაჰბერით ნესტუებითა მით მსხუერპლთა თქუენთა ზედა და შესაწირავთა ცხორებისა თქუენისათა, და იყოს თქუენდა მოსაჴსენებელ წინაშე ღმრთისა თქუენისა, რამეთუ მე ვარ უფალი, ღმერთი თქუენი.
და იყო, წელთ მეორესა და თთუესა მეორესა, ოცსა თთჳსასა აღიმაღლა ღრუბელმან კარვისა მისგან წამებისა,
და წარიტრნეს ძენი ისრაელისანი კარვითურთ უდაბნოსა მისგან სინასა და დადგა ღრუბელი იგი უდაბნოსა მას ფარანისასა.
და იტრნეს Page of ms. S: 264v პირველად სიტყჳთა უფლისაჲთა, ჴელითა მოსესითა.
და იტრა განწესებული ბანაკი ძეთა იუდასთა ძალითურთ მათით, და ერსა მას ზედა მათსა იყო ნასონ, ძე ამინადაბისი,
და ერსა მას ზედა ტომისა ძეთა ისაქარისთა ნათანაელ, ძე სოგრისი,
და ერსა ზედა ტომისა ძეთა ზაბულონისთასა ელიაბ, ძე ქელონისი.
და დაჰჴსნენ კარავი იგი და იტრნენ ძენი გეთსონისნი და ძენი მერარისნი და აღიღონ კარავი იგი.
და წარიძრა განწესებული ბანაკი ძეთა რუბენისთა ძალითურთ მათით, და იყო ერსა მას ზედა მათსა ელისურ, ძე სედეურისი,
და ერსა ზედა ნათესავისა ძეთა სჳმეონისთასა სალამიელ, ძე სურისადაჲსი,
და ერნსა ზედა ნათესავისა ძეთა გადისთასა ელისაფან, ძე რაგოელისი.
და იტრნენ ძენი კაათისნი და აღიღონ სიწმიდე იგი და აღმართონ კარავი იგი ვიდრე მისლვადმდე მათა.
და იტრას განწესებული ბანაკი ეფრემისი... ......................
