სიტყუად იწყო უფალმან მოსესა შემდგომად სიკუდილისა მის ძეთა აჰრონისთასა, ვითარ-იგი შეწირეს მათ ცეცხლი უცხო წინაშე უფლისა და მუნთქუესვე მოისპნეს.
და ჰრქუა უფალმან მოსეს: ეტყოდე შენ აჰრონს ძმასა შენსა და ნუ ეგრე ურიდად შევალნ ყოველსა ჟამსა სიწმიდესა მას შინაგანსა, ეზოსა მას პირისპირ Page of ms. S: 212v სალხინებელისა, რომელ-იგი არს ზედა კერძო კიდობანსა მას საწამებელთასა, რაჲთა არა მოკუდეს, რაჟამს ღრუბლით გამო ვეჩუენო ზედა სალხინებელსა მას.
ესრე შევიდეს არონ და მიართუას წინაშე სიწმიდესა მას, რამეთუ ჴელთ ედვას მას ზუარაკი ერთი მროწლისაგანი ცოდვათათჳს და ვერძი ერთი მრგულიად დასაწუელად მსხუერპლთა.
და კუართი ტილოსა წმიდა ეცუას და როპანაკნი ტილოსანი ესხნენ და სარტყელი მკურისა შეირტყას წელთა მისთა და ხჳრი თავსა ედგას და სამოსელი სიწმიდისა შეემოსოს და იბანოს წყლითა ყოველი გუამი თჳსი და შემოსილ იყოს სიწმიდითა.
და მოიღოს ერისაგანცა ძეთა ისრაელისათა ორნი ვაცნი ცოდვათათჳს და ვერძი ერთი მრგულიად დასაწუელთა მათთჳს მსხუერპლისათა.
და შეწიროს აჰრონ ზუარაკი იგი ცოდვათა თჳსთათჳს და მოტევებაჲ ითხოვოს თავისა თჳსისათჳს და სახლისა თჳსისა.
და მოიბნეს ორნი იგი Page of ms. S: 213r ვაცნი და წარადგინნეს წინაშე უფლისა წინაშე ბჭეთა კარვისა მის საწამებელისათა.
და დასხნეს ზედა ორთა მათ ვაცთა წილნი ორნი: ერთი იგი -- წილი უფლისაჲ, და ერთი -- აზაელისა უდაბნოდ.
და მოიბას ვაცი იგი ერთი, რომელ აღმოჴდა ნაწილად უფლისა, და შეწიროს ცოდვათათჳს.
ვაცი, რომელსა ზედა აღმოჴდა განტევება უდაბნოსა, მიიბას, წარადგინოს ცოცხალი წინაშე უფლისა, რაჲთა მას ზედა ელხინოს და განუტეოს უდაბნოდ. და მიიხუნეს ვაცმან თავით თჳსით ცოდვანი მათნი.
შეწიროს აჰრონ ზუარაკი იგი ცოდვათათჳს თავისა თჳსისა და სახლისა თჳსისა და ლხინებაჲ ითხოოს თავისა თჳსისა და სახლისა თჳსისა და დაკლას ზუარაკი იგი ცოდვათა თჳსთათჳს.
და აღიღოს ბერვარი იგი სავსე ნაკუერცხალი იგი ცეცხლისაგან, საკურთხეველ[ისა] . . . . . . . . . . . . . . . . . . . . . . . . . . . . . . . . . . . შინაგანსა მას კრეთსაბმელსა მას.
