Page of ms. S: 196v Page of ms. E: 241 და თქუენ ბჭეთა მათ კარვისა მის საწამებელთასა ნუ გამოხვალთ, რაჲთა არა მოჰკუდეთ, რამეთუ ცხებულებაჲ იგი საცხებელისა მის უფლისაჲ თქუენ... ეგრე მსგავსად ბრძანებისა მისებრ მოსესა.
მას ჟამსა შინა სიტყუად იწყო უფალმან აჰრონისა და თქუა:
ღჳნოსა და ყოველსა ლუდსა ნუ სურთ შენ და ძენი ეგე შენნი შენ თანა ჟამსა, რომელსა გეგულვოს თქუენ შესლვად კარავსა მას საწამებელთასა, გინათუ წარდგებოდით მსახურებად საკურთხეველსა მას, რაჲთა არა მოჰკუდეთ. შჯული საუკუნოჲ ეგენ თქუენ თანა თესლითი თესლადმდე.
განშორებაჲ და განწვალებაჲმცა იცი შენ შორის სიწმიდეთა მათ და ბილწებასა და შორის კეთილსა მას და ბოროტსა გამორჩევასამცა აგებ.
შორის ძეთა მაგათ პირველისათა (!) ყოველივე შჯულად, ვითარცა ეტყოდა უფალი მათ ჴელითა მოსესითა.
მერმე სიტყუად იწყო მოსე აჰრონისა, ელიაზარისა და იათამარისა, ძეთა მათ აჰრონისთა ნეშტთა: მოიღეთ თქუენ ნეშტი იგი მსხუერპლთა მათ მრგულიად დასაწუელთა, შესაწ'ირველთა უფლისათა, და ჭამეთ თქუენ წინაშე საკურთხევლისა, რამეთუ წმიდა წმიდათაჲ არს.
და შეჭამეთ იგი თქუენ ადგილსა წმიდასა, რამეთუ შჯულ არს შენდა ეგე და შჯული საუკუნოჲ ძეთა მათ შენთა შესაწირველისა მისგან ძღუენთა უფლისათა, რამეთუ ეგრე მამცნო მე უფალმან.
და მკერდი იგი შესაწირველთა და მჴარი იგი მარჯუენე შესაწირველთა შეჭამოთ თქუენ ადგილსა მას წმიდასა შენ და ძეთა მათ შენთა შენ თანა, რამეთუ წესი სჯულისა მოგეცა შენ და ძეთა შენთა მსხუერპლთა მათგან მოტევებისათა ძეთა მათ ისრაელისათა.
მჴარი იგი შესაწირველთა და მკერდი იგი საგებელისათა, რომელ მოგივალს შენ მსხუერპლთა მათ მრგულიად დასაწუელთა და შესაწირველთაგან, დასაგებელთა წინაშე უფლისა, და იყოს იგი შენდა და ძეთა მათ შენთა შემდგომად [შენსა] სჯულად საუკუნოდ: უბრძანა უფალმან [მოსეს].
და ვაცი იგი ცოდვათათჳს თხოვით მოითხოვა მოსე და იხილა, რამეთუ იგიცა დამწუარ იყო. განრისხნა მოსე ელიაზარის და იათამარისთჳს, ძეთა მათ აჰრონისთა ნეშტთა, და ჰრქუა:
რად არა შეჭამეთ ეგე ადრე, რომელ ცოდვათათჳს იყო ადგილა ერთსა? წმიდა წმიდათა იყო ეგე და ეგეცა თქუენ მიგცა ჭამად, რაჲთა მოისპნენ ცოდვანი იგი ერისანი მაგის წინაშე უფლისა.
რამეთუ არა შესრულ იყო სისხლი მაგისი სიწმიდესა მას, პირისპირ შინა შეჭამეთ, იგი ადგილსა წმიდასა, ვითარცაიგი მიბრძანა მე ღმერთმან.
