TITUS
Middle Persian Corpus Jamasp-Asana
Part No. 4
Previous part

Text: Husr.Kaw.Red.  
[husraw ī kawādān ud rēdag-ē]


pad nām ī yazdān




Sentence: 1     ērān-winnārd-kawādīg rēdag-ē wāspuhr nām dast ēr-kaš pēš ī šāhān-šāh ēstād.

Sentence: 2     u-š stāyišn ud āfrīn was kard.

Sentence: 3     u-š guft kū šāhān-šāh anōšag ud jāwēdān, haft-kišwar xwadāy ud kāmag hanjām bēd.

Sentence: 4     framāyēd niyōxšīdan! dūdag kē man aziš būd hēm āzādīh wehān niyāgān ī ašmā rāy hamāg nāmīg ud tuwāngar, kām-zīwišn būd hēnd.

Sentence: 5     u-šān xīr pad abāyist ī xwēš ēstād.

Sentence: 6     u-m ōy ī pid pad aburnāyīh bē widard <ud> mād kē<-š> man pus bud hēm, bē man ēnyā anē pus nē būd.

Sentence: 7     u-šān bahrag man, pad stūr ī pid, <pad> pārag ī stabr, xwarišn ī gōnag gōnag ud brahm ī xūb čābuk nēk dāšt hēm.

Sentence: 8     pad hangām ō frahangestān kardan būd hēm, u-m pad frahang kardan saxt awištāft hēm.

Page: 233 
Sentence: 9     u-m yašt ud hādōxt ud baγān-yasn ud jud-dēw-dād hērbēdīhā warm, gyāg gyāg zand niyōxšīd<(an)> ēstād.

Sentence: 10     u-m dibīrīh ōwōn kū xūb-nibēg ud raγ-nibēg bārīk-dānišn, kāmak-kār angust ud frazānīg saxwan hēm.

Sentence: 11     u-m aswārīh ud kamān-warīh ōwōn kū pad farrox abāyēd dāštan ān dad kē tar asp sar man andar tuwān widardan

Sentence: 12     u-m nēzagwarīh ōwōn kū pad wadbaxt abāyēd <dāštan> ān aswār kē pad asp ud nēzag ud šamšēr ō ham-rānīh ud ham-nibardīh ī man āyēd ud pad-iz asprēs čawgān anāsūd ud damān afrasāgīhā-iz azēr tang ud pad sar asp afragūdīhā ēdōn zanēm čiyōn rōy-gar-ē kē čakuč payān hamāg abar ē gyāg paydāg.

Sentence: 13     pad čiyōn win ud barbut ud tambūr ud kennār ud har srōd, čegāmag ud pad-iz ī paywāzag-guftan, pā-wāzīg kardan awestād mard hēm.

Sentence: 14     ud pad čē čiš ī stāragān, abāxtarān ēdōn andar šud hēm Page: 234  kū awēšān kē andar ān pēšag hēnd hamāg andar man čiš-ē xwār hēnd.

Sentence: 15     ud pad čatrang ud nēwardaxšīr ud haštpāy kardan az hamahlān frāztar hēm.

Sentence: 16     pad čē zamb dō ēwēnag bastan rāy azēr ī rēšag windād gušnasp nišīnēm.

Sentence: 17     bē nūn dūdag wišuft ud nizār ud tabāh bē būd ud mād-iz pad wahišt šud.

Sentence: 18     ud ka-tān pad yazdān pahlomīh sahēd pad čiš man framāyēd nigerīdan.

Sentence: 19     šāhān-šāh ō rēdag guft kū ka tō rēdag ēdōn xwaš ārzōg hē u-t xōg pad xwarišn xwaš ud brahmag ī xūb ud čabuk andar būd ēstēd,

Sentence: 20     bē gōw kū xwarīšn-ē kadām xwaštar ud pad mizag-tar. gōwēd rēdag kū anōšag haft-kišwar xwadāy, kāmag hanjām, framāyēd šnūdan; xwarišn-ē ān xwaštar ud pad mizag-tar ī andar gušnagīh ud tan-drustīh ud abē-bīmīh xwarēnd.

Sentence: 21     bē ān pad mizag-tar wahīg ī dō māhag kē pad šīr ī mādar ud ān-iz ī gāw parward ēstēd, rūdan, ambarag ka abāg āb-kāmag handūd xwarēnd ayāb sēn ī gāw frabīh pad spēd-bāg xūb poxtan pad šakar ud tabarzad Page: 235  xwardan.

Sentence: 22     šāhān-šāh passandīd u-š pad rāst dāšt.

Sentence: 23     dudīgar framāyēd pursīdan kū murw-ē kadām xwaštar ud pad mizag-tar.

Sentence: 24     gōwēd rēdag kū anōšag bawēd, ēn and murw hamāg xwaš ud nēk.

Sentence: 25     fraš-murw, čor, ud karak, tadar <ud> tīhōg, spēd-dumbag, sūrparrag ud.....(?) ud.....(?) ud čakōk .....(?) ī parwardag ud kulang juwān ud čarz ī tīr-māhīg, kabk-anjīr ud xašēnsār ud murw-ābīg.

Sentence: 26     bē abāg karak ī kadagīg ī juwān kē pad šāhdānag ud kāmag ī jawēn ud rōγn ī zaytān parward ēstēd <ēč murw> tāxt nēst ranjāg kardan pēš pad rōz ī kuštan rūdan pad pāy-ē āgustan ud rōz ī dudīgar pad gardan āgu<-stan pad> sōrābag brišt<(an)>, az ān murw <ī> xwaš ān <ī> pust xwastar ud az pušt ān xwaštar ī ō Page: 236  dumb nazdīktar.

Sentence: 27     šāhān-šāh passandīd u-š pad rāst dāšt.

Sentence: 28     sidīgar framāyēd pursīd<(an)> kū az ān ī pad afsard nihēnd gōšt-ē kadām xwaštar.

Sentence: 29     gōwēd rēdag kū anōšag bawēd, ēn and hamāg gōšt xwaš ud nēk.

Sentence: 30     gāw ud gōr ud gawazn ud warāz ud uštar-kawādak, gawdar ī ēk sālag ud gāw-mēš ud gōr ī kadagīg ud xūg ī kadagīg.

Sentence: 31     bē abāg gōr ī juwān kē pad aspast <ud> jaw parward ēstēd ud pīh dārēd, u-š pad sik ī truš....(?) ud čāšnīg ēwēnīhā dahēnd u-š pušt pad halām nihēnd, afsardī ān weh <us> xwastar.

Sentence: 32     šāhān-šāh passandīd ud pad rāst dāšt.

Sentence: 33     čahārōm framāyēd pursīdan kū xāmīzī kadām tarr-tar.

Sentence: 34     gōwēd (rēdag) kū anōšag bawēd, xāmīzī xargōš tarr-tar ud asprōd hambōy-tar ud nām-war <ud> pad mizag-tar ud dil ī <ta->dar hu-gugārtar.

Sentence: 35     bē abāg āhūg ī mādag ī starwan kē afsard ēstēd ud pīh dārēd ēč xāmīz pahikār nēst.

Sentence: 36     šāhān-šāh passandīd (u-š) pad rāst dāšt.

Page: 237 
Sentence: 37     panjōm framāyēd pursīd<(an)> kū rōγn-xwardīg-ē kadām weh ud xwaštar

Sentence: 38     gōwēd rēdag kū anōšag bawēd, ēn and rōγn-xwardīg hamāg xwaš ud nēk.

Sentence: 39     pad hāmīn ān lawzēnag ud gōzēnag ud gōz afrōšag ud čarb afrōšag ud čarb-angust kē az čarz ayāb az ān ī āhūg kunēnd, pad rōγn ī gōz wirēzēnd

Sentence: 40     pad zamestān ān lawzēnag, šiftēnag ud wafrēnag ud tabarzad ud gišnīz āwurd

Sentence: 41     bē abāg parwardag ī az āb ī sēb <ud> bēh ī....(?) kard ēstēd ēč rōγn-xwardīg pahikār nēst.

Sentence: 42     šāhānšāh passandīd ud u-š pad rāst dāšt.

Sentence: 43     šašōm framāyēd pursīd<(an)> kū ambag-ē kadām xwaštar.

Sentence: 44     gōwēd rēdag kū anōšag bawēd, ēn and ambag-ē hamāg xwaš ud nēk.

Sentence: 45     wahār-wādrang ka abāg pōst xwarēnd, bēh ud....(?) ud halīlag ud gōz ī tarr <ud> wādrang ud wahman ī spēd.

Sentence: 46     bē abāg sanjībil ī čīnīg, halīlag ī parwardag ēč ambag Page: 238  pahikār nēst.

Sentence: 47     šāhān-šāh passandīd ud u-š pad rāst dāšt.

Sentence: 48     haftōm framāyēd pursīd<(an)> kū dārēnag-ē kadām xwastar.

Sentence: 49     gōwēd rēdag kū anōšag bawēd ēn and dārēnag hamāg xwaš ud nēk.

Sentence: 50     anārgēl ka abāg šakar xwarēnd, pad hindūg anārgēl xwānēnd ud pad pārsīg gōz ī hindūg xwānēnd.

Sentence: 51     bistag gurgānīg ka pad sōrābag brēzēnd, naxōd ī tarr kē abāg āb-kāmag xwarēnd.

Sentence: 52     xormā ī ērānīg kē pad gōz āgand ēstēd, bistag tarr ud šiftālūg ī armanīg, balūt, šāh-balūt ud šakar ud tabarzad

Sentence: 53     bē hamwār abāg šā-dānag i syā-razurīg kē pad pīh pāzen brišt ēstēd ēč dārēnag pahikār nēst, čē xwaš pad xwardan, hu-bōy pad dahān, hu-gugārd pad aškambag ud pad-iz ān kār frāztar.

Sentence: 54     šāhān-šāh passandīd u-š pad rāst dāšt.

Sentence: 55     (haštōm framāyēd) pursīd<(an)> kū may-ē kadām weh ud xwaštar.

Page: 239 
Sentence: 56     gōwēd rēdag kū anōšag bawēd, ēn and may hamāg nēk <ud> xwaš.

Sentence: 57     may kanīg ka nēk wirāyēnd ud may ī harīwag ud may ī marw-rōdīg ud may ī bustīg, bādag ī halwānīg.

Sentence: 58     bē hamwār abāg may ī asūrīg, bādag ī wāzrangīg ēč may pahikār nēst.

Sentence: 59     šāhān-šāh passandīd ud u-š pad rāst dāšt.

Sentence: 60     nōhōm framāyēd pursīdan kū huniyāgar-ē kadām xwaštar ud weh.

Sentence: 61     gōwēd rēdag kū anōšag bawēd, ēn and huniyāgar hamāg xwaš <ud> nēk.

Sentence: 62     čang-sarāy, win-sarāy ud kennār-sarāy, ud....(?) ud....(?) ud tambūr sarāy, barbut-sarāy ud nāy-sarāy ud dumbalag-sarāy....(?) ud dīrak-rasan-wāzīg ud zanjīr-wāzīg ud dār-wāzīg ud mār-wāzīg ud čambar-wāzīg ud tigr-wāzīg ud tās wāzīg ud wandag-wāzīg ud andarwāy-wāzīg....(?)....(?) tambūr ī meh (sarāy), spar-wāzīg, zēn-wāzīg ud gōy-wāzīg ud zīl-wāzīg (?) šamšēr-wāzīg ud dašnag-wāzīg ud warz-wāzīg ud šīšag-wāzīg ud kabīg-wāzīg. ēn and Page: 240  huniyāgar hamāg xwaš ud nēk.

Sentence: 63     bē abāg čang-sarāy ī kanīg {!} ī nēkōg pad šabestān [kanīzag ī čang-sarāy weh] ka-š wāng tēz ud xwaš-āwāz, pad-iz ān kār nēk šayēd <ud> win-sarāy <pad> xwaran ī wuzurg ēč huniyāgar pahikār nēst.

Sentence: 64     šāhān-šāh passandīd u-š pad rāst dāšt.

Sentence: 65     dahōm framāyēd pursīdan kū andar may (fradom ud) dudīgar, sidīgar, ud čahārōm, panjōm ud šašōm ud haftōm čē gōwē.

Sentence: 66     gōwēd rēdag kū anōšag bawēd mardān ī pahlom, andar may, fradom hu-bōy ud dudīgar dārēnag ud sidīgar halīlag ī parwardag, čahārōm xāmīz ud panjōm bazmāwurd, šašōm weh šām, ud haftōm rōγn-handūdag-bē-xuftag

Sentence: 67     šāhānšāh passandīd ud pad rāst dašt.

Sentence: 68     yāzdahōm framāyēd pursīdan kū sprahm-ē kadām hu-bōytar.

Sentence: 69     gōwēd rēdag kū anōšag bawēd mardān ī pahlom, Page: 241  sprahm-ē yāsaman hu-bōytar čē-š bōy ēdōn čiyōn bōy ī xwadāyān mānēd.

Sentence: 70     husraw sprahm bōy ēdōn čiyōn bōy ī šahryārān.

Sentence: 71     gētīg bōy ēdōn čiyōn bōy hu-niyāg.

Sentence: 72     gul bōy ēdōn čiyōn bōy (....).

Sentence: 73     nargis bōy ēdōn čiyōn juwānīh.

Sentence: 74     hērīg suxr (bōy) ēdōn čiyōn bōy ī dōstān.

Sentence: 75     hērīg ī zard bōy ēdōn čiyōn zan ī āzād ka nē rōspīg.

Sentence: 76     kāpūr bōy ēdōn čiyōn dastwarīh.

Sentence: 77     ud saman ī spēd bōy ēdōn čiyōn bōy ī frazandān.

Sentence: 78     ud saman ī zard bōy ēdōn čiyōn bōy ī zan ī āzād ka nē rōspīg.

Sentence: 79     sōsan ī spēd bōy ēdōn čiyōn dōstīh.

Sentence: 80     ud marw ī ardaxšīrān bōy ēdōn čiyōn bōy ī mādar.

Sentence: 81     marw ī spēd bōy ēdōn čiyōn bōy ī pidarān.

Sentence: 82     wanafšag bōy ēdōn čiyōn bōy kanīzagān.

Sentence: 83     šā-esprahm bōy ēdōn čiyōn bōy grāmīgān.

Sentence: 84     mōrd bōy ēdōn čiyōn dahibedān.

Sentence: 85     nīlōpal bōy ēdōn čiyōn bōy tuwāngarīh.

Sentence: 86     ud marzangōš bōy ēdōn čiyōn bōy bizeškīh.

Sentence: 87     spēdag bōy ēdōn čiyōn bōy wēmārān.

Page: 242 
Sentence: 88     palangmušk bōy ēdōn čiyōn nēkīh

Sentence: 89     kūpal bōy ēdōn čiyōn husrawīh.

Sentence: 90     nastaran bōy ēdōn čiyōn zan pīr.

Sentence: 91     munj ka nē škōfēd bōy ēdōn čiyōn zan kāmgīh ud ka škōft ēstēd bōy ēdōn čiyōn bōy grāmīgān.

Sentence: 92     sīsīmbar bōy ēdōn čiyōn āzādagīh.

Sentence: 93     bōy ēn hamāg sprahmīhā andar yāsaman čiš-ē xwār, čē bōy ō bōy ī xwadāyān mānēd.

Sentence: 94     šāhān-šāh passandīd ud pad rāst dāšt.

Sentence: 95     dawāzdahōm framāyēd pursīd<(an)> kū zan-ē kadām weh.

Sentence: 96     gōwēd rēdag kū anōšag bawēd, zan-ē ān weh ī pad-menišn, mard dōst, u-š abzōnīh nē, bālāy mayānjīg, u-š war pahn, sar, kūn, gardan hambast u-š pāy kōtāh ud mayān bārīk ud azēr pāy wišādag, angustān dagrand, u-š handām narm ud saxt -āgand ud bēh pistān ud u-š nāxun wafrēn, u-š gōnag anārgōn u-š čašm wādām ēwēn ud lab wassadēn ud brūg tāgdēs, Page: 243  <dandān> spēd, tarr, ud hōšāb ud gēsū syā ud rōšn, drāz ud pad wistarag ī mardān saxwan nē a-šarmīhā gōwēd.

Sentence: 97     šāhān-šāh passandīd ud pad rāst dāšt.

Sentence: 98     šāhān-šāh guft kū tō was mādag kāmag hē.

Sentence: 99     rēdag guft kū anōšag bawēd mardān pahlom kē ān dah hazār kanīzag andar mašk abarzēn ī tō hēnd ēn-šān kāmag ī ēn-šān čiš bowandag, abarīh <ī> rāmistan ī ašmā rāy guft<(an)>.

Sentence: 100     šāhān-šāh passandīd ud pad rāst dāšt.

Sentence: 101     sēzdahōm framāyēd pursīd<(an)> kū bārag-ē kadām weh.

Sentence: 102     gōwēd rēdag kū anōšag bawēd, ēn hamāg bārag nēk, asp ud astar ud uštar tazāg ud stōr ī bayaspānīg.

Sentence: 103     bē hamwār abāg bārag ī gāwistānīg ēč bārag pahikār nest.

Sentence: 104     šāhān-šāh passandīd ud pad xūb dāšt.

Sentence: 105     pas šāhān-šāh ō māh-husraw ī anōš-husraw framūd kū jār-ē pad čiš ī ēn rēdag abar rasēd, dawāzdah hazār drahm ī purr dahēd ud čiš ī ēn rēdag guft har rōz pad Page: 244  uzmāyišn abar rasēd har rōz xwarišn ī ēn rēdag guft kū ārāstag ud wirāstag pēš amā dārēd tā abar rasēm.

Sentence: 106     u-š har rōz čahār dēnār framūd dād<(an)>.

Sentence: 107     pas az ān, māhīgān ēw-čand, rēdag ō dar šāhān-šāh mad ud darbān sālār rāy ō pēš šāhānšāh frēstīd.

Sentence: 108     u-š pad nibištag ōwōn nibišt ēstād kū anōšag bawēd mardān pahlom, az ganj ī dād šāhān-šāh pad padēxīh ī xwarīšn, čābuk, abē-āhōg hēm.

Sentence: 109     ud ka-tān sahēd andar kār ī amā sazāgīhā nigerišn framāyēd kardan, ud ka andar ān handāzišn šāhān-šāh hamāg kard,

Sentence: 110     asūrestān sālār frāz šud ō šāhān-šāh guft kū anōšag bawēd mardān pahlom, āgāh framāyēd būdan kū dō šagr āmad kē asp ramagān az gyāg ī xwēš spōxtag dārēd.

Sentence: 111     agar ašmā abar sahēd ān šagrān az asp ramagān abāz framāyēd dāštan.

Sentence: 112     šāhān-šāh andar zamān rēdag ō pēš xwāst, u-š guft kū hunar šāyendagīh ī tō abāyēd ka ān šagrān rāy zīndag ō amā āwarēd.

Page: 245 
Sentence: 113     ud rēdag pad ham zamān šud.

Sentence: 114     andar rāh zan-ē dīd ī was nēkōg.

Sentence: 115     rēdag bē ān zan guft kū agar-it {!} sahēd man rāy hilē tā abāg tō kāmag wizārom {!}.

Sentence: 116     zan ō rēdag guft kū agar ān wināhīhā ī tā im-rōz man kard hēm tō bē padīrē ud ān kirbagīhā ī tō tā im-rōz kard hē bē man abespārē, tō rāy bē hilēm tā abāg man kāmag wizārē.

Sentence: 117     ud rēdag andar-iz zamān pēš ān abāz gašt ud raft ud ān waran bē nē wizārd.

Sentence: 118     ō widār ī šagrān šud ud pad widār šagrān bē nišast ud har dō šagr rāy pad kamand bē grift ud zīndag ō pēš šāhān-šāh āwurd.

Sentence: 119     šāhān-šāh abd sahist, ō rēdag guft kū šaw, šagrān rāy bē ōzan ud rēdag šud ud šagrān rāy bē ōzad.

Sentence: 120     ud pas rēdag pad šahr, wuzurg marzbān framūd kardan.

Sentence: 121     pas az ān āgāhīh ō šāhān-šāh rasīd ka rēdag ō griftan šagr šud, andar rāh zan-ē dīd, bē ān zan šud ud zan rāy {!} čē guft ud ān zan ō rēdag čē passox dād ud rēdag az ānōh frāz raft ud ān waran bē nē wizārd.

Sentence: 122     ud šāhān-šāh ka-š ān saxwan ašnūd guft kū ān rēdag was pad-xrad būd ka ān wināhīhā bē nē padīrift ud ān waran bē nē wizārd, bē hišt.

Sentence: 123     hān! kē ōy tā-š būd ka hamāg ēn kārīhā guft, kard.

Page: 246 
Sentence: 124     rēdag gāh ud pāyag wuzurg būd ud az ān frāz pad nazdīk ī xwēš dāšt.

Sentence: 125     anōšag ruwān bawād husraw ī šāhān-šāh ī kawādān ud ān rēdag ī xwaš-ārzōg. ēdōn bawād.


frazaft pad drōd, šādīh, rāmišn.





Page: 247 
Next part


This text is part of the TITUS edition of Middle Persian Corpus Jamasp-Asana.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.