TITUS
Denkard Book 7
Part No. 6
Previous part

Chapter: 5  

Paragraph: 0   abar abdīh ī paydāgīhist az padīriftan frāz ī wištāsp dēn tā wihēz ī yašt frawahar ī zarduxšt ō ān ī pahlom axwān ka uzīd ēstād az zāyišnīh frāz haftād ud haft sāl ud az hampursagīh frāz cehel ud haft az padīriftan ī wištāsp dēn frāz sīh ud panǰ sāl



Paragraph: 1     ēk ēd ī paydāg kū: ka zarduxšt andar mān ī wištāsp dēn srūd, čašm paydāg kū ahumbīhist pad-iz pahān, stōrān ātaxšān mēnōg-iz ī mān, mehan urwāhmenīh"

Paragraph: 2     az-iz be paydāgīhist wuzurg abdīh čiyōn ēd ī dēn gōwēd kū: "harwisp pah ud stōr ud ātaxš ī sōzāg ā-šān urwāhmenīh sahist, ud harwisp ī xūb winārd mēnōg [ud] mān ā-šān ōzōmandīh sahist, kū mān az nūn frāz ōzōmand pad dēn kunēd, ka-šān ān gōwišn be ašnūd, kē-š guft spitāmān ahlaw zarduxšt.

Paragraph: 3     ud ēk kardan ī zarduxšt andar wizīr ud dādwar ān ī bōxt ud ēraxt nimūdār war passāxt ī abar dādestānīhā nihuftag, ī andar dēn Page of ed.: 408  guft ēstēd čiyōn sīh ud se ēwēnag.

Paragraph: 4     ēd ī pas-iz az ān tā hanzaft ī ērān-xwadāyīh hāwištān ī zarduxšt andar kār dāšt u-š ahu ēk ān ī widāxtag rōy abar kas rēxtan, čiyōn hu-fraward ādurbād ī māraspandān pad passāxt ī abar dēn pad-iš bōxtan, āgāhīh andar gēhān stardag ud paydāgīhistan ī pad-iz ān wuzurg abdīh pad weh dēn abar ham-dar ēn-iz gōwēd kū: ān was ka nigerēnd ā-šān wurrōyēnd druwandān ān ī nērang ī war.

Paragraph: 5-6     ēk ān ī pas [pas] az pēš-kēdīgīh ī zarduxšt ud abar-gōwišnīh ī dēn ō wištāsp ud kišwarīgān paydāgīhist; čiyōn padīriftan ī wištāsp dēn ān ī zarduxšt pad bun rasišn awiš guft az dehbed dēn paydāgīh kū: "tō ēn xēm ud ēn dēn kē xrōsag ast anāstag ān nūn ō ham kunē kaywištāsp, kū be padīrē tō ēn xēm ud ēn dēn kē ast, kū frahangān frahang be dārē, dehbed! kū rawāgīh kunē, tō ēn xēm abar dārē čīyōn stūnag ī nōg āsyā. pad abar-dārišnīh abar dārēd čiyōn stūnag dāštār ī ēn dēn hē.

Paragraph: 7     ud pērōzīh ī wištāsp abar arǰāsp ī hyōn ud abārīg anērān pad ān škeft kārēzār čiyōn zarduxšt pad dēn be ō wištāsp čāšīd was ī az dēn paydāg.

Paragraph: 8     ēk āhuftan ī zarduxšt andar purr-nēkīh ud bizeškīh ud čihr-šnāsīh ud abārīg pēšag kirrōgīh rāzīgīhā ud bowandagīhā ī pad yazadīg-dānišnīh ud mēnōg-winišnīh šāyēd. ud nimūdan ī az dēn nērōgīhā ī abar spōxtan ī seǰ ud tarwēnīdan ī dēw ud parīg ud agārēnīdan ī Page of ed.: 409  ǰādūgīh ud parīgīh.

Paragraph: 9     ud bēšāzēnīdan ī wēmārīh ud hamēstārēnīdan ī gurgān ud xrafstarān ud wišādan ī wārān ud bastan ī tagarg ud tun ud magas ud sahm ud abārīg ǰōrdāgān, urwarān ud gōspandān petyārag, abd nērōg ī abar-iz hordād ud amurdād zastan, any-iz was nērang ī tā hanzaftan ī ērān-xwadāyīh pad kār dāštan ast ī nūn-iz mānd ēstēd abāg andag ī az abdīh ī pad āxtaxšān.

Paragraph: 10     ud ul paydāgīhistan ud āškārēnīdan ī ō mardōmān was ābīhā ī nēw, muhragīhā ī abd, ud darmān ī wēmārīh ī az bizeškān ōskār fragudag, was mēnōgīg ud spihrīg ud wāyīg ud zamīgīg ud any-iz gēhān sūd; rāz ī pad yazdān-xrdīh awiš šāyēd mad.

Paragraph: 11     ēk abdīh xwad abastāg ī pad hamāg pahlom ēwāzīh ī gēhān, hangirdīgīh ī wisp-dānāgīh gōwišnān abartom.

Paragraph: 12     ēk madan ī ō wištāsp ēd-iz ī amahraspandān pad pādāšn ī dēn padīriftan niwēyēnīd čiyōn pēšyōtan dīd ī farrox dehbed ōy a-marg ud a-zarmān a-niyāz xwarišn, wuzurg tan ud bowandag nērōg ud purr xwarrah amāwand ud pērōzgar ud yazdān hamtāg pus.

Paragraph: 13     ēwarz ī pēšyōtan ō kangdiz, xwadāyīh ī ānōh čiyōn dādār ohrmazd awiš baxt; paydāgīhistan ī pad-iz ān wuzurg abdīh ō wasān.



Page of ed.: 411 
Next part


This text is part of the TITUS edition of Denkard Book 7.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.