TITUS
White Yajur-Veda: Vajasaneyi-Samhita (Madhyandina)
Part No. 5
Previous part

Paragraph: 5 
Verse: 1 
Sentence: a    agnés tanū́r asi víṣṇave tvā sómasya tanū́r asi víṣṇave tvā́titʰer ātitʰyám asi víṣṇave śyenā́ya tvā somabʰŕ̥te víṣṇave tvāgnáye tvā rāyaspoṣadé víṣṇave tvā \\

Verse: 2 
Sentence: a    agnér janítram asi \
Sentence: b    vŕ̥ṣaṇau stʰaḥ \
Sentence: c    urváśy asi \
Sentence: d    āyúr asi \
Sentence: e    purūrávā asi \
Sentence: f    gāyatréṇa tvā cʰándasā mantʰāmi \
Sentence: g    tráiṣṭubʰena tvā cʰándasā mantʰāmi \
Sentence: h    jā́gatena tvā cʰándasā mantʰāmi \\

Verse: 3 
Sentence: a    bʰávataṃ naḥ sámanasau sácetasāv arepásau \
Sentence: b    mā́ yajñám̐ him̐siṣṭaṃ mā́ yajñápatiṃ jātavedasau śiváu bʰavatam adyá naḥ \\

Verse: 4 
Sentence: a    agnā́v agníś carati práviṣṭa ŕ̥ṣīṇāṃ putró abʰiśastipā́vā \
Sentence: b    sá naḥ syonáḥ suyájā yajehá devébʰyo havyám̐ sádam áprayuccʰant svā́hā \\

Verse: 5 
Sentence: a    ā́pataye tvā páripataye gr̥hṇāmi tánūnáptrye śākvarā́ya śákvana ójiṣṭʰāya \
Sentence: b    ánādʰr̥ṣṭam asy anādʰr̥ṣyáṃ devā́nām ójó nabʰiśasty abʰiśastipā́ anabʰiśastenyám áñjasā satyám úpa geṣam̐ svité mā dʰāḥ \\

Verse: 6 
Sentence: a    ágne vratapās tvé vratapā́ yā́ táva tanū́r iyám̐ sā́ máyi yó máma tanū́r eṣā́ sā́ tváyi \
Sentence: b    sahá nau vratapate vratā́ny ánu me dīkṣā́ṃ dīkṣā́patir mányatām ánu tápas tápaspatiḥ \\

Verse: 7 
Sentence: a    am̐śúr-am̐śuṣ ṭe deva somā́pyāyatām índrāyaikadʰanavíde \
Sentence: b    ā́ túbʰyam índraḥ pyā́yatām ā́ tvám índrāya pyāyasva \
Sentence: c    ā́ pyāyayāsmā́nt sákʰīnt sanyā́ medʰáyā svastí te deva soma sutyā́m aśīya \
Sentence: d    éṣṭā rā́yaḥ préṣé bʰágāya r̥tám r̥tavādíbʰyo námo dyā́vāpr̥tʰivī́bʰyām \\

Verse: 8 
Sentence: a    yā́ te agne yaḥśayā́ tanū́r várṣiṣṭʰā gahvareṣṭʰā́ \
Sentence: b    ugráṃ váco ápāvadʰīt tveṣáṃ váco ápāvadʰīt svā́hā \
Sentence: c    yā́ te agne rajaḥśayā́ tanū́r várṣiṣṭʰā gahvareṣṭʰā́ \
Sentence: d    ugráṃ váco ápāvadʰīt tveṣáṃ váco ápāvadʰīt svā́hā \
Sentence: e    yā́ te agne hariśayā́ tanū́r várṣiṣṭʰā gahvareṣṭʰā́ \
Sentence: f    ugráṃ váco ápāvadʰīt tveṣáṃ váco ápāvadʰīt svā́hā \\

Verse: 9 
Sentence: a    taptā́yanī me si \
Sentence: b    vittā́yanī me si \
Sentence: c    ávatān mā nātʰitā́t \
Sentence: d    ávatān mā vyatʰitā́t \
Sentence: e    vidéd agnír nabʰó nā́ma \
Sentence: f    ágne aṅgira ā́yunā nā́mnéhi \
Sentence: g    yò syā́ṃ pr̥tʰivyā́m ási yát té nādʰr̥ṣṭaṃ nā́ma yajñíyaṃ téna tvā́ dadʰe \
Sentence: h    vidéd agnír nabʰó nā́ma \
Sentence: i    ágne aṅgira ā́yunā nā́mnéhi \
Sentence: j    yó dvitī́yasyāṃ pr̥tʰivyā́m ási yát té nādʰr̥ṣṭaṃ nā́ma yajñíyaṃ téna tvā́ dadʰe \
Sentence: k    vidéd agnír nabʰó nā́ma \
Sentence: l    ágne aṅgira ā́yunā nā́mnéhi \
Sentence: m    yás tr̥tī́yasyāṃ pr̥tʰivyā́m ási yát té nādʰr̥ṣṭaṃ nā́ma yajñíyaṃ téna tvā́ dadʰe \
Sentence: n    ánu tvā devávītaye \\

Verse: 10 
Sentence: a    sim̐hy àsi sapatnasāhī́ devébʰyaḥ kalpasva \
Sentence: b    sim̐hy àsi sapatnasāhī́ devébʰyaḥ śundʰasva \
Sentence: c    sim̐hy àsi sapatnasāhī́ devébʰyaḥ śumbʰasva \\

Verse: 11 
Sentence: a    indragʰoṣás tvā vásubʰiḥ purástāt pātu \
Sentence: b    prácetās tvā rudráiḥ paścā́t pātu \
Sentence: c    mánojavās tvā pitŕ̥bʰir dakṣiṇatáḥ pātu \
Sentence: d    viśvákarmā tvādityáir uttaratáḥ pātu \
Sentence: e    idám aháṃ taptáṃ vā́r bahirdʰā́ yajñā́n níḥ sr̥jāmi \\

Verse: 12 
Sentence: a    sim̐hy àsi svā́hā \
Sentence: b    sim̐hy àsy ādityavániḥ svā́hā \
Sentence: c    sim̐hy àsi brahmavániḥ kṣatravániḥ svā́hā \
Sentence: d    sim̐hy àsi suprajāvánī rāyaspoṣavániḥ svā́hā \
Sentence: e    sim̐hy àsy ā́vaha devā́n yájamānāya svā́hā \
Sentence: f    bʰūtébʰyas tvā \\

Verse: 13 
Sentence: a    dʰruvò si pr̥tʰivī́ṃ dr̥m̐ha \
Sentence: b    dʰruvakṣíd asy antárikṣaṃ dr̥m̐ha \
Sentence: c    acyutakṣíd asi dívaṃ dr̥m̐ha \
Sentence: d    agnéḥ púrīṣam asi \\

Verse: 14 
Sentence: a    yuñjáte mána utá yuñjate dʰíyo víprā víprasya br̥ható vipaścítaḥ \
Sentence: b    ví hótrā dadʰe vayunāvíd éka ín mahī́ devásya savitúḥ páriṣṭutiḥ svā́hā \\

Verse: 15 
Sentence: a    idáṃ víṣṇur vícakrame tredʰā́ ní dadʰe padám \
Sentence: b    sámūḍʰam asya pām̐saré svā́hā \\

Verse: 16 
Sentence: a    írāvatī dʰenumátī hí bʰūtám̐ sūyavasínī mánave daśasyā́ \
Sentence: b    vy àskabʰnā ródasī viṣṇav eté dādʰártʰa pr̥tʰivī́m abʰíto mayū́kʰaiḥ svā́hā \\

Verse: 17 
Sentence: a    devaśrútau devéṣv ā́ gʰoṣatam \
Sentence: b    prā́cī prétam adʰvaráṃ kalpáyantī ūrdʰváṃ yajñáṃ nayataṃ mā́ jihvaratam \
Sentence: c    sváṃ goṣṭʰám ā́ vadataṃ devī durye ā́yur mā́ nír vādiṣṭaṃ prajā́ṃ mā́ nír vādiṣṭam \
Sentence: d    átra rametʰāṃ várṣman pr̥tʰivyā́ḥ \\

Verse: 18 
Sentence: a    víṣṇor nú kaṃ vīryā̀ṇi prá vocaṃ yáḥ pā́rtʰivāni vimamé rájām̐si \
Sentence: b    yó áskabʰāyad úttaram̐ sadʰástʰaṃ vicakramāṇás tredʰórugāyáḥ \
Sentence: c    víṣṇave tvā \\

Verse: 19 
Sentence: a    divó vā viṣṇa utá vā pr̥tʰivyā́ mahó vā viṣṇa urór antárikṣāt \
Sentence: b    ubʰā́ hí hástā vásunā pr̥ṇásvā́ práyaccʰa dákṣiṇād ótá savyā́t \
Sentence: c    víṣṇave tvā \\

Verse: 20 
Sentence: a    prá tád víṣṇu stavate vīryèṇa mr̥gó ná bʰīmáḥ kucaró giriṣṭʰā́ḥ \
Sentence: b    yásyorúṣu triṣú vikrámaṇeṣv adʰikṣiyánti bʰúvanāni víśvā \\

Verse: 21 
Sentence: a    víṣṇo rarā́ṭam asi \
Sentence: b    víṣṇoḥ śnáptre stʰaḥ \
Sentence: c    víṣṇoḥ syū́r asi \
Sentence: d    víṣṇor dʰruvò si \
Sentence: e    vaiṣṇavám asi víṣṇave tvā \\

Verse: 22 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    ā́ dade nā́ry asi \
Sentence: c    idám ahám̐ rákṣasāṃ grīvā́ ápikr̥ntāmi \
Sentence: d    br̥hánn asi br̥hádravā br̥hatī́m índrāya vā́caṃ vada \\

Verse: 23 
Sentence: a    rakṣoháṇaṃ valagahánaṃ vaiṣṇavī́m \
Sentence: b    idám aháṃ táṃ valagám út kirāmi yáṃ me níṣṭyo yám amā́tyo nicakʰā́na \
Sentence: c    idám aháṃ táṃ valagám út kirāmi yáṃ me samānó yám ásamāno nicakʰā́na \
Sentence: d    idám aháṃ táṃ valagám út kirāmi yáṃ me sábandʰur yám ásabandʰur nicakʰā́na \
Sentence: e    idám aháṃ táṃ valagám út kirāmi yáṃ me sajātó yám ásajāto nicakʰā́na \
Sentence: f    út kr̥tyā́ṃ kirāmi \\

Verse: 24 
Sentence: a    svarā́ḍ asi sapatnahā́ \
Sentence: b    satrarā́ḍ asy abʰimātihā́ \
Sentence: c    janarā́ḍ asi rakṣohā́ \
Sentence: d    sarvarā́ḍ asy amitrahā́ \\

Verse: 25 
Sentence: a    rakṣoháṇo vo valagahánaḥ prókṣāmi vaiṣṇavā́n \
Sentence: b    rakṣoháṇo vo valagahánó va nayāmi vaiṣṇavā́n \
Sentence: c    rakṣoháṇo vo valagahánó va str̥ṇāmi vaiṣṇavā́n \
Sentence: d    rakṣoháṇau vāṃ valagahánā úpa dadʰāmi vaiṣṇavī́ \
Sentence: e    rakṣoháṇau vāṃ valagahánau páry ūhāmi vaiṣṇavī́ \
Sentence: f    vaiṣṇavám asi \
Sentence: g    vaiṣṇavā́ stʰa \\

Verse: 26 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    ā́ dade nā́ry asi \
Sentence: c    idám ahám̐ rákṣasāṃ grīvā́ ápi kr̥ntāmi \
Sentence: d    yávo si yaváyāsmád dvéṣo yaváyā́rātīḥ \
Sentence: e    divé tvāntárikṣāya tvā pr̥tʰivyái tvā \
Sentence: f    śúndʰantāṃ lokā́ḥ pitr̥ṣádanāḥ \
Sentence: g    pitr̥ṣádanam asi \\

Verse: 27 
Sentence: a    úd dívam̐ stabʰānāntárikṣaṃ pr̥ṇa dŕ̥m̐hasva pr̥tʰivyā́m \
Sentence: b    dyutānā́s tvā mārutó mínotu mitrā́váruṇau dʰruvéṇa dʰármaṇā \
Sentence: c    brahmaváni tvā kṣatraváni tvā rāyaspoṣaváni páry ūhāmi \
Sentence: d    bráhma dr̥m̐ha kṣatráṃ dr̥m̐hā́yur dr̥m̐ha prajā́ṃ dr̥m̐ha \\

Verse: 28 
Sentence: a    dʰruvā́si dʰruvò yáṃ yájamāno smínn āyátane prajáyā paśúbʰir bʰūyāt \
Sentence: b    gʰr̥téna dyāvāpr̥tʰivī pūryetʰām \
Sentence: c    índrasya cʰadír asi viśvajanásya cʰā́yā \\

Verse: 29 
Sentence: a    pári tvā girvaṇo gíra imā́ bʰavantu viśvátaḥ \
Sentence: b    vr̥ddʰā́yum ánu vŕ̥ddʰayo júṣṭā bʰavantu júṣṭayaḥ \\

Verse: 30 
Sentence: a    índrasya syū́r asi \
Sentence: b    índrasya dʰruvò si \
Sentence: c    aindrám asi \
Sentence: d    vaiśvadevám asi \\

Verse: 31 
Sentence: a    vibʰū́r asi pravā́haṇaḥ \
Sentence: b    váhnir asi havyavā́hanaḥ \
Sentence: c    śvātrò si prácetāḥ \
Sentence: d    tutʰò si viśvávedāḥ \\

Verse: 32 
Sentence: a    uśíg asi kavíḥ \
Sentence: b    áṅgʰārir asi bámbʰāriḥ \
Sentence: c    avasyū́r asi dúvasvān \
Sentence: d    śundʰyū́r asi mārjālī́yaḥ \
Sentence: e    samrā́ḍ asi kr̥śā́nuḥ \
Sentence: f    pariṣádyo si pávamānaḥ \
Sentence: g    nábʰo si pratákvā \
Sentence: h    mr̥ṣṭò si havyasū́danaḥ \
Sentence: i    r̥tadʰā́māsi svàrjyotiḥ \\

Verse: 33 
Sentence: a    samudro si viśvávyacāḥ \
Sentence: b    ajò sy ékapāt \
Sentence: c    áhir asi budʰnyàḥ \
Sentence: d    vā́g asy aindrám asi sádo si \
Sentence: e    r̥tásya dvārau mā́ mā sáṃtāptam \
Sentence: f    ádʰvanām adʰvapate prá mā tira svastí me smín patʰí devayā́ne bʰūyāt \\

Verse: 34 
Sentence: a    mitrásya mā cákṣuṣekṣadʰvam \
Sentence: b    ágnayaḥ sagarāḥ ságarā stʰa ságareṇa nā́mnā ráudreṇā́nīkena pātá māgnayaḥ pipr̥tá māgnayo gopāyáta mā námo vo stu mā́ mā him̐siṣṭa \\

Verse: 35 
Sentence: a    jyótir asi viśvárūpaṃ víśveṣāṃ devā́nām̐ samít \
Sentence: b    tvám̐ soma tanūkŕ̥dbʰyo dvéṣobʰyo nyákr̥tebʰya urú yantā́si várūtʰam̐ svā́hā \
Sentence: c    juṣāṇó aptúr ā́jyasya vetu svā́hā \\

Verse: 36 
Sentence: a    ágne náya supátʰā rāyá asmā́n víśvāni deva vayúnāni vidvā́n \
Sentence: b    yuyodʰy àsmáj juhurāṇám éno bʰū́yiṣṭʰāṃ te námaüktiṃ vidʰema \\

Verse: 37 
Sentence: a    ayáṃ no agnír várivas kr̥ṇotv ayáṃ mŕ̥dʰaḥ purá etu prabʰindán \
Sentence: b    ayáṃ vā́jān jayatu vā́jasātāv ayám̐ śátrūn jayatu járhr̥ṣāṇaḥ svā́hā \\

Verse: 38 
Sentence: a    urú viṣṇo ví kramasvorú kṣáyāya nas kr̥dʰi \
Sentence: b    gʰr̥táṃ gʰr̥tayone piba prá-pra yajñápatiṃ tira svā́hā \\

Verse: 39 
Sentence: a    déva savitar eṣá te sómas tám̐ rakṣasva mā́ tvā dabʰan \
Sentence: b    etát tváṃ deva soma devó devā́m̐ úpāgā idám aháṃ manuṣyā̀nt sahá rāyáspóṣeṇa \
Sentence: c    svā́hā nír váruṇasya pā́śān mucye \\

Verse: 40 
Sentence: a    ágne vratapās tvé vratapā́ yā́ táva tanū́r máyy ábʰūd eṣā́ sā́ tváyi yó máma tanū́s tváyy ábʰūd iyám̐ sā́ máyi \
Sentence: b    yatʰāyatʰáṃ nau vratapate vratā́ny ánu me dīkṣā́ṃ dīkṣā́patir amám̐stā́nu tápas tápaspatiḥ \\

Verse: 41 
Sentence: a    urú viṣṇo ví kramasvorú kṣáyāya nas kr̥dʰi \
Sentence: b    gʰr̥táṃ gʰr̥tayone piba prá-pra yajñápatiṃ tira svā́hā \\

Verse: 42 
Sentence: a    áty anyā́m̐ agāṃ nā́nyā́m̐ úpāgām arvā́k tvā párebʰyó vidaṃ paró varebʰyaḥ \
Sentence: b    táṃ tvā juṣāmahe deva vanaspatedevayajyā́yai devā́s tvā devayajyā́yai juṣantāṃ víṣṇave tvā \
Sentence: c    óṣadʰe trā́yasva \
Sentence: d    svádʰite máinam̐ him̐sīḥ \\

Verse: 43 
Sentence: a    dyā́ṃ mā́ lekʰīr antárikṣaṃ mā́ him̐sīḥ pr̥tʰivyā́ sáṃ bʰava \
Sentence: b    ayám̐ hí tvā svádʰitis tétijānaḥ praṇinā́ya mahaté sáubʰagāya \
Sentence: c    átas tváṃ deva vanaspate śatávalśo ví roha sahásravalśā ví vayám̐ ruhema \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.