TITUS
Vetus Testamentum graece iuxta LXX interpretes
Part No. 7
Previous part

Chapter: 7 
Verse: 1    Καὶ εἶπεν κύριος ὁ ϑεὸς πρὸς Νωε Εἴσελϑε σὺ καὶ πᾶς ὁ οἶκός σου εἰς τὴν κιβωτόν, ὅτι σὲ εἶδον δίκαιον ἐναντίον μου ἐν τῇ γενεᾷ ταύτῃ.
Verse: 2    ἀπὸ δὲ τῶν κτηνῶν τῶν καϑαρῶν εἰσάγαγε πρὸς σὲ ἑπτὰ ἑπτά, ἄρσεν καὶ ϑῆλυ, ἀπὸ δὲ τῶν κτηνῶν τῶν μὴ καϑαρῶν δύο δύο, ἄρσεν καὶ ϑῆλυ,
Verse: 3    καὶ ἀπὸ τῶν πετεινῶν τοῦ οὐρανοῦ τῶν καϑαρῶν ἑπτὰ ἑπτά, ἄρσεν καὶ ϑῆλυ, καὶ ἀπὸ τῶν πετεινῶν τῶν μὴ καϑαρῶν δύο δύο, ἄρσεν καὶ ϑῆλυ, διαϑρέψαι σπέρμα ἐπὶ πᾶσαν τὴν γῆν.
Verse: 4    ἔτι γὰρ ἡμερῶν ἑπτὰ ἐγὼ ἐπάγω ὑετὸν ἐπὶ τὴν γῆν τεσσαράκοντα ἡμέρας καὶ τεσσαράκοντα νύκτας καὶ ἐξαλείψω πᾶσαν τὴν ἐξανάστασιν, ἣν ἐποίησα, ἀπὸ προσώπου τῆς γῆς.
Verse: 5    καὶ ἐποίησεν Νωε πάντα, ὅσα ἐνετείλατο αὐτῷ κύριος ὁ ϑεός.
Verse: 6    Νωε δὲ ἦν ἐτῶν ἑξακοσίων, καὶ ὁ κατακλυσμὸς ἐγένετο ὕδατος ἐπὶ τῆς γῆς.
Verse: 7    εἰσῆλϑεν δὲ Νωε καὶ οἱ υἱοὶ αὐτοῦ καὶ ἡ γυνὴ αὐτοῦ καὶ αἱ γυναῖκες τῶν υἱῶν αὐτοῦ μετ' αὐτοῦ εἰς τὴν κιβωτὸν διὰ τὸ ὕδωρ τοῦ κατακλυσμοῦ.
Verse: 8    καὶ ἀπὸ τῶν πετεινῶν καὶ ἀπὸ τῶν κτηνῶν τῶν καϑαρῶν καὶ ἀπὸ τῶν κτηνῶν τῶν μὴ καϑαρῶν καὶ ἀπὸ πάντων τῶν ἑρπετῶν τῶν ἐπὶ τῆς γῆς
Verse: 9    δύο δύο εἰσῆλϑον πρὸς Νωε εἰς τὴν κιβωτόν, ἄρσεν καὶ ϑῆλυ, καϑὰ ἐνετείλατο αὐτῷ ὁ ϑεός.
Verse: 10    καὶ ἐγένετο μετὰ τὰς ἑπτὰ ἡμέρας καὶ τὸ ὕδωρ τοῦ κατακλυσμοῦ ἐγένετο ἐπὶ τῆς γῆς.
Verse: 11    ἐν τῷ ἑξακοσιοστῷ ἔτει ἐν τῇ ζωῇ τοῦ Νωε, τοῦ δευτέρου μηνός, ἑβδόμῃ καὶ εἰκάδι τοῦ μηνός, τῇ ἡμέρᾳ ταύτῃ ἐρράγησαν πᾶσαι αἱ πηγαὶ τῆς ἀβύσσου, καὶ οἱ καταρράκται τοῦ οὐρανοῦ ἠνεῴχϑησαν,
Verse: 12    καὶ ἐγένετο ὁ ὑετὸς ἐπὶ τῆς γῆς τεσσαράκοντα ἡμέρας καὶ τεσσαράκοντα νύκτας.
Verse: 13    ἐν τῇ ἡμέρᾳ ταύτῃ εἰσῆλϑεν Νωε, Σημ, Χαμ, Ιαϕεϑ, υἱοὶ Νωε, καὶ ἡ γυνὴ Νωε καὶ αἱ τρεῖς γυναῖκες τῶν υἱῶν αὐτοῦ μετ' αὐτοῦ εἰς τὴν κιβωτόν.
Verse: 14    καὶ πάντα τὰ ϑηρία κατὰ γένος καὶ πάντα τὰ κτήνη κατὰ γένος καὶ πᾶν ἑρπετὸν κινούμενον ἐπὶ τῆς γῆς κατὰ γένος καὶ πᾶν πετεινὸν κατὰ γένος
Verse: 15    εἰσῆλϑον πρὸς Νωε εἰς τὴν κιβωτόν, δύο δύο ἀπὸ πάσης σαρκός, ἐν ᾧ ἐστιν πνεῦμα ζωῆς.
Verse: 16    καὶ τὰ εἰσπορευόμενα ἄρσεν καὶ ϑῆλυ ἀπὸ πάσης σαρκὸς εἰσῆλϑεν, καϑὰ ἐνετείλατο ὁ ϑεὸς τῷ Νωε. καὶ ἔκλεισεν κύριος ὁ ϑεὸς ἔξωϑεν αὐτοῦ τὴν κιβωτόν.
Verse: 17    Καὶ ἐγένετο ὁ κατακλυσμὸς τεσσαράκοντα ἡμέρας καὶ τεσσαράκοντα νύκτας ἐπὶ τῆς γῆς, καὶ ἐπληϑύνϑη τὸ ὕδωρ καὶ ἐπῆρεν τὴν κιβωτόν, καὶ ὑψώϑη ἀπὸ τῆς γῆς.
Verse: 18    καὶ ἐπεκράτει τὸ ὕδωρ καὶ ἐπληϑύνετο σϕόδρα ἐπὶ τῆς γῆς, καὶ ἐπεϕέρετο ἡ κιβωτὸς ἐπάνω τοῦ ὕδατος.
Verse: 19    τὸ δὲ ὕδωρ ἐπεκράτει σϕόδρα σϕοδρῶς ἐπὶ τῆς γῆς καὶ ἐπεκάλυψεν πάντα τὰ ὄρη τὰ ὑψηλά, ἃ ἦν ὑποκάτω τοῦ οὐρανοῦ·
Verse: 20    δέκα πέντε πήχεις ἐπάνω ὑψώϑη τὸ ὕδωρ καὶ ἐπεκάλυψεν πάντα τὰ ὄρη τὰ ὑψηλά.
Verse: 21    καὶ ἀπέϑανεν πᾶσα σὰρξ κινουμένη ἐπὶ τῆς γῆς τῶν πετεινῶν καὶ τῶν κτηνῶν καὶ τῶν ϑηρίων καὶ πᾶν ἑρπετὸν κινούμενον ἐπὶ τῆς γῆς καὶ πᾶς ἄνϑρωπος.
Verse: 22    καὶ πάντα, ὅσα ἔχει πνοὴν ζωῆς, καὶ πᾶς, ὃς ἦν ἐπὶ τῆς ξηρᾶς, ἀπέϑανεν.
Verse: 23    καὶ ἐξήλειψεν πᾶν τὸ ἀνάστημα, ὃ ἦν ἐπὶ προσώπου πάσης τῆς γῆς, ἀπὸ ἀνϑρώπου ἕως κτήνους καὶ ἑρπετῶν καὶ τῶν πετεινῶν τοῦ οὐρανοῦ, καὶ ἐξηλείϕϑησαν ἀπὸ τῆς γῆς· καὶ κατελείϕϑη μόνος Νωε καὶ οἱ μετ' αὐτοῦ ἐν τῇ κιβωτῷ.
Verse: 24    καὶ ὑψώϑη τὸ ὕδωρ ἐπὶ τῆς γῆς ἡμέρας ἑκατὸν πεντήκοντα.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.