TITUS
Lamprecht, Alexander (Strassburger Bearbeitung)
Part No. 6
Previous part

Chapter: 19  
Alexander reitet Bucephalus und wird als Philipps Nachfolger prophezeit


Verse: 308       Deme kuninge wart ein bote dô gesant
Verse: 309    von deme, der daz ros het erkant,

Verse: 310    und hîz iz sint baz bewarn,
Verse: 311    wande man solde dar an irvarn,

Verse: 312    weme nâh sînem lîbe
Verse: 313    sîn kunincrîche solde blîbe;

Verse: 314    und enbôt ime dâ bî,
Verse: 315    iz solde rehte derre sî,

Verse: 316    der iz allir êrist beschrite,
Verse: 317    wandiz noh diu nehein man ne gerite.

Verse: 318       Unde alse Alexander heim quam,
Verse: 319    di scrift er harte wol vernam,

Verse: 320    wîs was er zunmâzen;
Verse: 321    sîne meistere heter verlâzen.

Verse: 322    dannoh ne heter nit vernomen,
Verse: 323    wî iz umbe daz ros was comen.

Verse: 324    eines tages dô der jungelinc
Verse: 325    in der pelenze ginc,

Verse: 326    dô volgetime Vestian,
Verse: 327    der was ein edele juncman.

Verse: 328    daz ros hôrter dô weien
Verse: 329    und tubilîchen schrîen.

Verse: 330    vil starke er dô dâhte,
Verse: 331    waz daz wesen mohte,

Verse: 332    mit allen sînen sinne,
Verse: 333    wes wêre di freislîche stimme.

Verse: 334    zô Vestiane er dô sprach:
Verse: 335    'nû sage mir, waz daz sîn mach,

Verse: 336    daz mir schillit in mîne ôren
Verse: 337    und ne lâzet mih nit gehôren;

Verse: 338    iz gebârit freislîche.
Verse: 339    sîn stimme di is gelîche

Verse: 340    einem freislîchem tiere.'
Verse: 341    dô antworte ime schiere

Verse: 342    Ptolomeus unde sprach:
Verse: 343    'ih sage dir, waz daz wesen mach:

Verse: 344    iz ist ein ros freislîch.
Verse: 345    ime ne wart nie nehein gelîch

Verse: 346    in alle kriechische lant.
Verse: 347    Bucival ist iz genant.

Verse: 348    dîn vater hât iz în getân.
Verse: 349    iz ne dorfte bezzer nie gegân

Verse: 350    under neheiner stûte.
Verse: 351    iz ne hât nieman in hûte,

Verse: 352    wandiz ist vil freislîch.
Verse: 353    sîn stimme di ist eislîch.

Verse: 354    iz irbîzit man und wîb.
Verse: 355    nieman ne mach sînen lîb

Verse: 356    vor ime gesunt behalden,
Verse: 357    swes iz mûz gwalden.'

Verse: 358       Dô der hêre diz vernam,
Verse: 359    schiere er zô deme rosse quam.

Verse: 360    dô sîn daz ros wart gware
Verse: 361    und er iz begunde ane starc,

Verse: 362    iz vergaz allir sîner maht
Verse: 363    unde woldime wesen dienisthaft.

Verse: 364    iz knête fur in der nider
Verse: 365    und ne unsitete niwit sider.

Verse: 366    ime worden sîne gebêre,
Verse: 367    alsiz des kindes vil wol gewone wêre.

Verse: 368       Er begundiz streichen,
Verse: 369    daz nieman geweichen

Verse: 370    ne mohte neheine wîs;
Verse: 371    wander was vil wîs:

Verse: 372    er ne legete zoum noh seil dar ane,
Verse: 373    er begreif iz in sîne manen.

Verse: 374    ellenthaft was sîn gedanc:
Verse: 375    ûf den rucke er ime spranc.

Verse: 376    ûz dem marstalle er iz reit,
Verse: 377    daz was ein michil baltheit.

Verse: 378       Dô wart daz langer nit verdaget,
Verse: 379    dem kuninge wart dô gesagit,

Verse: 380    waz sîn sun hete getân.
Verse: 381    der kuninc der spranc ûf sân

Verse: 382    und zehenzich sînes gesindes,
Verse: 383    er frowete sih sînis kindes.

Verse: 384    di mêre er gerne vernam.
Verse: 385    dô der kuninc dar quam

Verse: 386    und in Alexander vernam,
Verse: 387    dô tet er alsime wol gezam:

Verse: 388    er warf sih nider unde ginc.
Verse: 389       Vestian daz ros entfienc,

Verse: 390    alsiz Alexander wolde,
Verse: 391    mit einem breitele von golde

Verse: 392    mit gesteine wol beslagen.
Verse: 393    sînen vater ginc er ingagen.

Verse: 394    dô si zesamene quâmen,
Verse: 395    bî henden si sih nâmen.

Verse: 396    ir rede wart vile minnesam,
Verse: 397    als ir hie mugit verstân.

Verse: 398    'heil dir', sprach er, 'sune mîn,
Verse: 399    mih dunkit du salt kuninc sîn.

Verse: 400    diu gwalt sî dir vil gerêt
Verse: 401    alsô verre sô mîn rîche gêt.'

Verse: 402    Alexander sprach zestunt:
Verse: 403    'vater, got lâze ûh sîn gesunt,

Verse: 404    allis gûtes ih û wol getrûwen.
Verse: 405    got lâz ûh lange bûwen

Verse: 406    mit froweden ûwer rîche
Verse: 407    und ouh sêliclîche.

Verse: 408    noh sult ir, vater, mih geweren
Verse: 409    eines dinges, des ih sêre geren:

Verse: 410    nû bin ih funfzehen jâr alt,
Verse: 411    daz hân ih rehte gezalt,

Verse: 412    und bin sô komen zô mînen tagen,
Verse: 413    daz ih wol wâfen mac tragen.

Verse: 414    swer diheine tugent sol gwinnen,
Verse: 415    der sal is in sîner juginde beginnen,

Verse: 416    und swer dir zins sol geben,
Verse: 417    wil er iht derwider streben,

Verse: 418    der mûz en dir mit scanden
Verse: 419    senden von sînen landen

Verse: 420    und ouh lasterlîche.'
Verse: 421    dô ne wolde der kuninc rîche

Verse: 422    niwit langer beiten:
Verse: 423    er hîz daz kint bereiten.

Verse: 424    waz sol ih mêr dar umbe sagen:
Verse: 425    er hîz ime wâfen vor tragen,

Verse: 426    sô man si under des kuninges gesinden
Verse: 427    allirbest mohte vinden;

Verse: 428    und verkore si Alexander,
Verse: 429    man gewunne ime aber ander.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.