TITUS
Seifrit, Alexander (Strassburger Fassung)
Part No. 6
Previous part

Chapter: 7  
Nectanabus täuscht Olympias

Das der kunig Nectanabus auf das veld nach wuerczen gienug.


Verse: 343       Nectanabus urlaub pat
Verse: 344    die frawen und gieng ann ein stat

Verse: 345    auf das gevild, da er vand
Verse: 346    wurczen und chreutter alczuhandt,

Verse: 347    der er bedarft czu der sachen
Verse: 348    die er mit zawber wolt machen.

Verse: 349    die geist er pienn zu maniger stund
Verse: 350    und czaubert, als er wol chundt.

Verse: 351    do es nacht warden was,
Verse: 352    Nectanabus hat gemaistert das

Verse: 353    das sy in dem trawm sech
Verse: 354    wie Amon der got wech

Verse: 355    pey ir an dem pet leg
Verse: 356    und der mynne mit ir phleg

Verse: 357    und sprach zu ir also:
Verse: 358    'fraw, du solt wesen fro:

Verse: 359    du trest den der dich schol bewarn
Verse: 360    und behuetten in dein jarn.'

Verse: 361    mit dem er von ir verswandt.
Verse: 362    die fraw erwacht zu handt.

Verse: 363    die chunigin ward unmassen fro,
Verse: 364    nach dem maister sandt sy do.

Verse: 365    die chunigin sagt im offenwar
Verse: 366    wie ir des nachts geschechen wer,

Verse: 367    wie sy den got het gesechen
Verse: 368    und wes er ir het verjechen.

Verse: 369    der maister anttwurt ir do:
Verse: 370    'ich wais es wol, im ist also:

Verse: 371    es ist dir inn dem trawm geschechen.
Verse: 372    wildu des die warhait sechen,

Verse: 373    so hais mir machen ain pettlein
Verse: 374    fuͤr die chemnatten dein!'

Verse: 375    die fraw schuͤrff im guetten gemach,
Verse: 376    in irm palas das geschach.

Verse: 377    der maister sagt der frawen do:
Verse: 378    'du wirst in heint sechen so

Verse: 379    als ain trakchen wildt.
Verse: 380    dar nach in aines mannes pild

Verse: 381    verwandelt er sich schir
Verse: 382    und wirt wispeln vor dir.

Verse: 383    er wirt sich an dein pett legen
Verse: 384    und wirt der mynn mit dir phlegen.'




Das sich Nectanabus zu ainem trakchen macht.


Verse: 385       Do es also cham
Verse: 386    das der tag ain end nam

Verse: 387    und die nacht an trat,
Verse: 388    nach der ersten hanchratt

Verse: 389    Nectanabus der weis man
Verse: 390    graiff sein zawbernuss an.

Verse: 391    zu ainem trakchen macht er sich,
Verse: 392    er wispelt und tet ayslich,

Verse: 393    ainer chuerczweil er began
Verse: 394    und wart wider zu ainem man.

Verse: 395    der frawen er zuchtiklichen naigt
Verse: 396    und zu ir an das pet staig.

Verse: 397    er halst sey und chusts,
Verse: 398    als offt in gelust.

Verse: 399    der mynn er mit ir phlag
Verse: 400    die lang nacht unczt an den tag.

Verse: 401    mynniklich er mit ir spilt,
Verse: 402    unczt das er ir ein kind geczilt.

Verse: 403    do er das an ir enphandt,
Verse: 404    auf irn pauch legt er sein handt

Verse: 405    und sprach: 'das kind wirt sighaft.
Verse: 406    das schol von menschlicher chrafft

Verse: 407    nymmer uber wunden werden,
Verse: 408    die weil es lebt auf der erden.'

Verse: 409    do die nacht zergangen was,
Verse: 410    sich hueb auf das palas

Verse: 411    Nectanabus der greis
Verse: 412    taugenlich und weis.

Verse: 413    die fraw lag aber lenger,
Verse: 414    wenn sy was warden swanger.

Verse: 415    die chunigin edel und hochgeporn
Verse: 416    hiet des tausent aydt gesworn

Verse: 417    das sey beslaffen hiet ain gatt,
Verse: 418    unczt an Nectanabo todt:

Verse: 419    der sagt ee Allexandro,
Verse: 420    do verstund sy sich erst do.




Do die kunigin in wart das sy swanger was wardenn.


Verse: 421       Do der kunigin wol getan
Verse: 422    der leib grossen began,

Verse: 423    ir was laid und antt.
Verse: 424    nach Nectanabo sy sand,

Verse: 425    sy sprach: 'du solt mir ervarn
Verse: 426    wie ich umb dissew sach schol geparn,

Verse: 427    chunig Philipp der pider
Verse: 428    wann der zu lanndt chumbt wider.'

Verse: 429    er sprach: 'fraw, umb die geschicht
Verse: 430    durft ir euch furchten nicht.

Verse: 431    Amon der got bewart dich
Verse: 432    zu allen zeitten und auch ich.'




Next part


This text is part of the TITUS edition of Seifrit, Alexander (Strassburger Fassung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.