TITUS
Edda
Part No. 6
Previous part

Song: Skm. 
Strophe: 0 
(FǪR SCÍRNIS)


Verse: 1    Freyr, sonr Niarðar, hafði sezc í Hliðsciálf oc sá um
Verse: 2    heima alla. Hann sá í Iotunheima, oc sá þar mey fagra,
Verse: 3    þá er hon gecc frá scála fǫður síns til scemmo. Þar af fecc
Verse: 4    hann hugsóttir miclar.
Verse: 5    Scírnir hét scósveinn Freys. Niorðr bað hann qveðia
Verse: 6    Frey máls. Þá mælti Scaði:

Strophe: 1 
Verse: 1    "Rístu nú, Scírnir, oc gacc at beiða
Verse: 2    occarn mála mǫg,
Verse: 3    oc þess at fregna, hveim inn fróði sé
Verse: 4    ofreiði afi."

Verse: 5    Scírnir qvað:
Strophe: 2 
Verse: 1    "Illra orða er mér ón at ycrom syni,
Verse: 2    ef ec geng at mæla við mǫg,
Verse: 3    oc þess at fregna, hveim inn fróði sé
Verse: 4    ofreiði afi.

Strophe: 3 
Verse: 1    Segðu þat, Freyr, fólcvaldi goða,
Verse: 2    oc ec vilia vita:
Verse: 3    hví þú einn sitr ennlanga sali,
Verse: 4    minn dróttinn, um daga?"

Verse: 5    Freyr qvað:
Strophe: 4 
Verse: 1    "Hví um segiac þér, seggr inn ungi,
Verse: 2    mikinn móðtrega?
Verse: 3    þvíat álfrǫðull lýsir um alla daga,
Verse: 4    oc þeygi at mínom munom."

Verse: 5    Scírnir qvað:
Strophe: 5 
Verse: 1    "Muni þína hycca ec svá micla vera,
Verse: 2    at þú mér, seggr, né segir;
Verse: 3    þvíat ungir saman várom í árdaga,
Verse: 4    vel mættim tveir trúazc."

Verse: 5    Freyr qvað:
Strophe: 6 
Verse: 1    "Í Gymis gǫrðom ec sá ganga
Verse: 2    mér tíða mey;
Verse: 3    armar lýsto, enn af þaðan
Verse: 4    alt lopt oc lǫgr.

Strophe: 7 
Verse: 1    Mær er mér tíðari enn manni hveim,
Verse: 2    ungom, í árdaga;
Verse: 3    ása oc álfa þat vill engi maðr,
Verse: 4    at við sátt sém."

Verse: 5    Scírnir qvað:
Strophe: 8 
Verse: 1    "Mar gefðu mér þá, þann er mic um myrqvan beri,
Verse: 2    vísan vafrloga,
Verse: 3    oc þat sverð, er siálft vegiz
Verse: 4    við iotna ætt."

Verse: 5    Freyr qvað:
Strophe: 9 
Verse: 1    "Mar ec þér þann gef, er þic um myrqvan berr,
Verse: 2    vísan vafrloga,
Verse: 3    oc þat sverð, er siálft mun vegaz,
Verse: 4    ef sá er horscr, er hefir."

Verse: 5    Scírnir mælti við hestinn:
Strophe: 10 
Verse: 1    "Myrct er úti, mál qveð ec ocr fara
Verse: 2    úrig fioll yfir,
Verse: 3    þyria þióð yfir;
Verse: 4    báðir við komomc, eða ocr báða tecr
Verse: 5    sá inn ámátki iotunn."

Verse: 6    Scírnir reið í Iotunheima til Gymis garða. Þar vóro
Verse: 7    hundar ólmir, oc bundnir fyrir scíðgarðz hliði, þess er um
Verse: 8    sal Gerðar var. Hann reið at, þar er féhirðir sat á haugi,
Verse: 9    oc qvaddi hann:

Strophe: 11 
Verse: 1    "Segðu þat, hirðir, er þú á haugi sitr
Verse: 2    oc varðar alla vega:
Verse: 3    hvé ec at annspilli komomc ins unga mans
Verse: 4    fyr greyiom Gymis?"

Verse: 5    Hirðir qvað:
Strophe: 12 
Verse: 1    "Hvárt ertu feigr, eða ertu framgenginn?
Verse: 2    annspillis vanr þú scalt æ vera
Verse: 3    góðrar meyiar Gymis."

Verse: 4    Scírnir qvað:
Strophe: 13 
Verse: 1    "Kostir ro betri, heldr enn at kløcqva sé,
Verse: 2    hveim er fúss er fara;
Verse: 3    eino dogri mér var aldr um scapaðr
Verse: 4    oc alt líf um lagið."

Verse: 5    Gerðr qvað:
Strophe: 14 
Verse: 1    "Hvat er þat hlym hlymia, er ec hlymia heyri nú til
Verse: 2    ossom rǫnnom í?
Verse: 3    iorð bifaz, enn allir fyrir
Verse: 4    sciálfa garðar Gymis."

Verse: 5    Ambót qvað:
Strophe: 15 
Verse: 1    "Maðr er hér úti, stiginn af mars baki,
Verse: 2    ió lætr til iarðar taca."

Verse: 3    Gerðr qvað:
Strophe: 16 
Verse: 1    "Inn biððu hann ganga í occarn sal
Verse: 2    oc drecca inn mæra mioð!
Verse: 3    þó ec hitt óomc, at hér úti sé
Verse: 4    minn bróðurbani.

Strophe: 17 
Verse: 1    Hvat er þat álfa, né ása sona,
Verse: 2    né víssa vana?
Verse: 3    hví þú einn um komt eikinn fúr yfir,
Verse: 4    ór salkynni at siá?"

Verse: 5    Scírnir qvað:
Strophe: 18 
Verse: 1    "Emcat ec álfa né ása sona
Verse: 2    né víssa vana;
Verse: 3    þó ec einn um komc eikinn fúr yfir,
Verse: 4    yðor salkynni at siá.

Strophe: 19 
Verse: 1    Epli ellifo hér hefi ec, algullin,
Verse: 2    þau mun ec þér, Gerðr, gefa,
Verse: 3    frið at kaupa, at þú þér Frey qveðir
Verse: 4    óleiðastan lifa."

Verse: 5    Gerðr qvað:
Strophe: 20 
Verse: 1    "Epli ellifo ec þigg aldregi
Verse: 2    at mannzcis munom,
Verse: 3    né við Freyr, meðan occart fior lifir,
Verse: 4    byggiom bæði saman."

Verse: 5    Scírnir qvað:
Strophe: 21 
Verse: 1    "Baug ec þér þá gef, þann er brendr var
Verse: 2    með ungom Óðins syni;
Verse: 3    átta ero iafnhǫfgir, er af driúpa
Verse: 4    ina níundo hveria nótt."

Verse: 5    Gerðr qvað:
Strophe: 22 
Verse: 1    "Baug ec þiccac, þótt brendr sé
Verse: 2    með ungom Óðins syni;
Verse: 3    era mér gullz vant í gǫrðom Gymis,
Verse: 4    at deila fé fǫður."

Verse: 5    Scírnir qvað:
Strophe: 23 
Verse: 1    "Sér þú þenna mæki, mær, mióvan, málfán,
Verse: 2    er ec hefi í hendi hér?
Verse: 3    hǫfuð hǫggva ec mun þér hálsi af,
Verse: 4    nema þú mér sætt segir."

Verse: 5    Gerðr qvað:
Strophe: 24 
Verse: 1    "Ánauð þola ec vil aldregi
Verse: 2    at mannzcis munom;
Verse: 3    þó ec hins get, ef iþ Gymir finniz,
Verse: 4    vígs ótrauðir, at ycr vega tíði."

Verse: 5    Scírnir qvað:
Strophe: 25 
Verse: 1    "Sér þú þenna mæki, mær, mióvan, málfán,
Verse: 2    er ec hefi í hendi hér?
Verse: 3    fyr þessom eggiom hnígr sá inn aldni iotunn,
Verse: 4    verðr þinn feigr faðir.

Strophe: 26 
Verse: 1    Tamsvendi ec þic drep, enn ec þic temia mun,
Verse: 2    mær, at mínom munom;
Verse: 3    þar scaltu ganga, er þic gumna synir
Verse: 4    síðan æva sé.

Strophe: 27 
Verse: 1    Ara þúfo á scaltu ár sitia,
Verse: 2    horfa heimi ór, snugga heliar til;
Verse: 3    matr sé þér meirr leiðr enn manna hveim
Verse: 4    inn fráni ormr með firom.

Strophe: 28 
Verse: 1    At undrsiónom þú verðir, er þú út kømr,
Verse: 2    á þic Hrímnir hari, á þic hotvetna stari!
Verse: 3    víðkunnari þú verðir enn vorðr með goðom,
Verse: 4    gapiðu grindom frá!

Strophe: 29 
Verse: 1    Tópi oc ópi, tiosull oc óþoli,
Verse: 2    vaxi þér tár með trega!
Verse: 3    Seztu niðr, enn ec mun segia þér
Verse: 4    sváran súsbreca
Verse: 5    oc tvennan trega.

Strophe: 30 
Verse: 1    Tramar gneypa þic scolo gerstan dag
Verse: 2    iotna gǫrðom í;
Verse: 3    til hrímþursa hallar þú scalt hverian dag
Verse: 4    kranga kosta laus,
Verse: 5    kranga kosta vǫn;
Verse: 6    grát at gamni scaltu í gogn hafa
Verse: 7    oc leiða með tárom trega.

Strophe: 31 
Verse: 1    Með þursi þríhǫfðoðom þú scalt æ nara,
Verse: 2    eða verlaus vera;
Verse: 3    þitt geð grípi,
Verse: 4    þic morn morni!
Verse: 5    ver þú sem þistill, sá er var þrunginn
Verse: 6    í ǫnn ofanverða.

Strophe: 32 
Verse: 1    Til holtz ec gecc oc til hrás viðar,
Verse: 2    gambantein at geta,
Verse: 3    gambantein ec gat.

Strophe: 33 
Verse: 1    Reiðr er þér Óðinn, reiðr er þér ásabragr,
Verse: 2    þic scal Freyr fiásc,
Verse: 3    in fyrinilla mær, enn þú fengit hefir
Verse: 4    gambanreiði goða.

Strophe: 34 
Verse: 1    Heyri iotnar, heyri hrímþursar,
Verse: 2    synir Suttunga, siálfir ásliðar,
Verse: 3    hvé ec fyrbýð, hvé ec fyrirbanna
Verse: 4    manna glaum mani,
Verse: 5    manna nyt mani.

Strophe: 35 
Verse: 1    Hrímgrímnir heitir þurs, er þic hafa scal,
Verse: 2    fyr nágrindr neðan;
Verse: 3    þar þér vílmegir á viðar rótom
Verse: 4    geita hland gefi!
Verse: 5    Oðri dryccio fá þú aldregi,
Verse: 6    mær, af þínom munom,
Verse: 7    mær, at mínom munom.

Strophe: 36 
Verse: 1    Þurs ríst ec þér oc þriá stafi,
Verse: 2    ergi oc oði oc óþola;
Verse: 3    svá ec þat af ríst, sem ec þat á reist,
Verse: 4    ef goraz þarfar þess."

Verse: 5    Gerðr qvað:
Strophe: 37 
Verse: 1    "Heill verðu nú heldr, sveinn, oc tac við hrímkálki,
Verse: 2    fullom forns miaðar!
Verse: 3    þó hafða ec þat ætlað, at myndac aldregi
Verse: 4    unna vaningia vel."

Verse: 5    Scírnir qvað:
Strophe: 38 
Verse: 1    "Ørindi mín vil ec ǫll vita,
Verse: 2    áðr ec ríða heim heðan,
Verse: 3    nær þú á þingi munt inom þrosca
Verse: 4    nenna Niarðar syni."

Verse: 5    Gerðr qvað:
Strophe: 39 
Verse: 1    "Barri heitir, er við bæði vitom,
Verse: 2    lundr lognfara;
Verse: 3    enn ept nætr nío þar mun Niarðar syni
Verse: 4    Gerðr unna gamans."

Verse: 5    Þá reið Scírnir heim. Freyr stóð úti oc qvaddi hann
Verse: 6    oc spurði tíðinda:
Strophe: 40 
Verse: 1    "Segðu mér þat, Scírnir, áðr þú verpir sǫðli af mar
Verse: 2    oc þú stígir feti framarr:
Verse: 3    hvat þú árnaðir í iotunheima
Verse: 4    þíns eða míns munar?"

Verse: 5    Scírnir qvað:
Strophe: 41 
Verse: 1    "Barri heitir, er við báðir vitom,
Verse: 2    lundr lognfara;
Verse: 3    enn ept nætr nío þar mun Niarðar syni
Verse: 4    Gerðr unna gamans."

Verse: 5    Freyr qvað:
Strophe: 42 
Verse: 1    "Lǫng er nótt, langar ro tvær,
Verse: 2    hvé um þreyiac þriár?
Verse: 3    opt mér mánaðr minni þótti
Verse: 4    enn siá hálf hýnótt."




Next part


This text is part of the TITUS edition of Edda.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.