TITUS
White Yajur-Veda: Vajasaneyi-Samhita (Madhyandina)
Part No. 5
Previous part

Paragraph: 5 
Verse: 1 
Sentence: a    अ॒ग्नेस्त॒नूर॑सि॒ विष्ण॑वे त्वा॒ सोम॑स्य त॒नूर॑सि॒ विष्ण॑वे॒ त्वाति॑थेराति॒थ्यम॑सि॒ विष्ण॑वे श्ये॒नाय॑ त्वा सोम॒भृते॒ विष्ण॑वे त्वा॒ग्नये॑ त्वा रायस्पोष॒दे विष्ण॑वे त्वा ।।

Verse: 2 
Sentence: a    अ॒ग्नेर्ज॒नित्र॑मसि ।
Sentence: b    वृष॑णौ स्थः ।
Sentence: c    उ॒र्वश्य॑सि ।
Sentence: d    आ॒युर॑सि ।
Sentence: e    पु॑रू॒रवा॑ असि ।
Sentence: f    गा॑य॒त्रेण॑ त्वा॒ छन्द॑सा मन्थामि ।
Sentence: g    त्रै॑ष्टुभेन त्वा॒ छन्द॑सा मन्थामि ।
Sentence: h    जाग॑तेन त्वा॒ छन्द॑सा मन्थामि ।।

Verse: 3 
Sentence: a    भव॑तं नः॒ सम॑नसौ॒ सचे॑तसावरे॒पसौ॑ ।
Sentence: b    मा य॒ज्ञँ हिँ॑सिष्टं॒ मा य॒ज्ञप॑तिं जातवेदसौ शिवौ भवतम॒द्य नः॑ ।।

Verse: 4 
Sentence: a    अ॒ग्नाव॒ग्निश्च॑रति॒ प्रवि॑ष्ट॒ ऋषी॑णां पु॒त्रो अ॑भिशस्ति॒पावा॑ ।
Sentence: b    स नः॑ स्यो॒नः सु॒यजा॑ यजे॒ह दे॒वेभ्यो॑ ह॒व्यँ सद॒मप्र॑युच्छ॒न्त्स्वाहा॑ ।।

Verse: 5 
Sentence: a    आप॑तये त्वा॒ परि॑पतये गृह्णामि॒ तनू॒नप्त्र्ये॑ शाक्व॒राय॒ शक्व॑न॒ ओजि॑ष्ठाय ।
Sentence: b    अना॑धृष्टमस्यनाधृ॒ष्यं दे॒वाना॒मोजो न॑भिशस्त्यभिशस्ति॒पा अ॑नभिशस्ते॒न्यमञ्ज॑सा स॒त्यमुप॑ गेषँ स्वि॒ते मा॑ धाः ।।

Verse: 6 
Sentence: a    अग्ने॑ व्रतपा॒स्त्वे व्र॑त॒पा या तव॑ त॒नूरि॒यँ सा मयि॒ यो मम॑ त॒नूरे॒षा सा त्वयि॑ ।
Sentence: b    स॒ह नौ॑ व्रतपते व्र॒तान्यनु॑ मे दी॒क्षां दी॒क्षाप॑ति॒र्मन्य॑ता॒मनु॒ तप॒स्तप॑स्पतिः ।।

Verse: 7 
Sentence: a    अँ॒शुर्॑ँशुष्टे देव सो॒माप्या॑यता॒मिन्द्रा॑यैकधन॒विदे॑ ।
Sentence: b    आ तुभ्य॒मिन्द्रः॒ प्याय॑ता॒मा त्वमिन्द्रा॑य प्यायस्व ।
Sentence: c    आ प्या॑यया॒स्मान्त्सखी॑न्त्स॒न्या मे॒धया॑ स्व॒स्ति ते॑ देव सोम सु॒त्याम॑शीय ।
Sentence: d    एष्टा॒ रायः॒ प्रेषे भगा॑य ऋ॒तमृ॑तवा॒दिभ्यो॒ नमो॒ द्यावा॑पृथि॒वीभ्या॑म् ।।

Verse: 8 
Sentence: a    या ते॑ अग्ने यःश॒या त॒नूर्वर्षि॑ष्ठा गह्वरे॒ष्ठा ।
Sentence: b    उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।
Sentence: c    या ते॑ अग्ने रजःश॒या त॒नूर्वर्षि॑ष्ठा गह्वरे॒ष्ठा ।
Sentence: d    उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।
Sentence: e    या ते॑ अग्ने हरिश॒या त॒नूर्वर्षि॑ष्ठा गह्वरे॒ष्ठा ।
Sentence: f    उ॒ग्रं वचो॒ अपा॑वधीत्त्वे॒षं वचो॒ अपा॑वधी॒त्स्वाहा॑ ।।

Verse: 9 
Sentence: a    त॒प्ताय॑नी मे सि ।
Sentence: b    वि॒त्ताय॑नी मे सि ।
Sentence: c    अव॑तान्मा नाथि॒तात् ।
Sentence: d    अव॑तान्मा व्यथि॒तात् ।
Sentence: e    वि॒देद॒ग्निर्न॒भो नाम॑ ।
Sentence: f    अग्ने॑ अङ्गिर॒ आयु॑ना॒ नाम्नेहि॑ ।
Sentence: g    यो॒ स्यां पृ॑थि॒व्यामसि॒ यत्ते ना॑धृष्टं॒ नाम॑ य॒ज्ञियं॒ तेन॒ त्वा द॑धे ।
Sentence: h    वि॒देद॒ग्निर्न॒भो नाम॑ ।
Sentence: i    अग्ने॑ अङ्गिर॒ आयु॑ना॒ नाम्नेहि॑ ।
Sentence: j    यो द्वि॒तीय॑स्यां पृथि॒व्यामसि॒ यत्ते ना॑धृष्टं॒ नाम॑ य॒ज्ञियं॒ तेन॒ त्वा द॑धे ।
Sentence: k    वि॒देद॒ग्निर्न॒भो नाम॑ ।
Sentence: l    अग्ने॑ अङ्गिर॒ आयु॑ना॒ नाम्नेहि॑ ।
Sentence: m    यस्तृ॒तीय॑स्यां पृथि॒व्यामसि॒ यत्ते ना॑धृष्टं॒ नाम॑ य॒ज्ञियं॒ तेन॒ त्वा द॑धे ।
Sentence: n    अनु॑ त्वा दे॒ववी॑तये ।।

Verse: 10 
Sentence: a    सिँ॒ह्य॑सि सपत्नसा॒ही दे॒वेभ्यः॑ कल्पस्व ।
Sentence: b    सिँ॒ह्य॑सि सपत्नसा॒ही दे॒वेभ्यः॑ शुन्धस्व ।
Sentence: c    सिँ॒ह्य॑सि सपत्नसा॒ही दे॒वेभ्यः॑ शुम्भस्व ।।

Verse: 11 
Sentence: a    इ॑न्द्रघो॒षस्त्वा॒ वसु॑भिः पु॒रस्ता॑त्पातु ।
Sentence: b    प्रचे॑तास्त्वा रुद्रैः प॒श्चात्पा॑तु ।
Sentence: c    मनो॑जवास्त्वा पि॒तृभि॑र्दक्षिण॒तः पा॑तु ।
Sentence: d    वि॒श्वक॑र्मा त्वादित्यैरुत्तर॒तः पा॑तु ।
Sentence: e    इ॒दम॒हं त॒प्तं वार्ब॑हि॒र्धा य॒ज्ञान्निः सृ॑जामि ।।

Verse: 12 
Sentence: a    सिँ॒ह्य॑सि॒ स्वाहा॑ ।
Sentence: b    सिँ॒ह्य॑स्यादित्य॒वनिः॒ स्वाहा॑ ।
Sentence: c    सिँ॒ह्य॑सि ब्रह्म॒वनिः॑ क्षत्र॒वनिः॒ स्वाहा॑ ।
Sentence: d    सिँ॒ह्य॑सि सुप्रजा॒वनी॑ रायस्पोष॒वनिः॒ स्वाहा॑ ।
Sentence: e    सिँ॒ह्य॒स्याव॑ह दे॒वान्यज॑मानाय॒ स्वाहा॑ ।
Sentence: f    भू॒तेभ्य॑स्त्वा ।।

Verse: 13 
Sentence: a    ध्रु॒वो॑ सि पृथि॒वीं दृँ॑ह ।
Sentence: b    ध्रु॑व॒क्षिद॑स्य॒न्तरि॑क्षं दृँह ।
Sentence: c    अ॑च्युत॒क्षिद॑सि॒ दिवं॑ दृँह ।
Sentence: d    अ॒ग्नेः पुरी॑षमसि ।।

Verse: 14 
Sentence: a    यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चितः॑ ।
Sentence: b    वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः॒ स्वाहा॑ ।।

Verse: 15 
Sentence: a    इ॒दं विष्णु॒र्विच॑क्रमे त्रे॒धा नि द॑धे प॒दम् ।
Sentence: b    समू॑ढमस्य पाँस॒रे स्वाहा॑ ।।

Verse: 16 
Sentence: a    उरा॑वती धेनु॒मती॒ हि भू॒तँ सू॑यव॒सिनी॒ मन॑वे दश॒स्या ।
Sentence: b    व्य॑स्कभ्ना॒ रोद॑सी विष्णवे॒ते दा॒धर्थ॑ पृथि॒वीम॒भितो॑ म॒यूखैः॒ स्वाहा॑ ।।

Verse: 17 
Sentence: a    दे॑व॒श्रुतौ॑ दे॒वेष्वा घो॑षतम् ।
Sentence: b    प्राची॒ प्रेत॑मध्व॒रं क॒ल्पय॑न्ती ऊ॒र्ध्वं य॒ज्ञं न॑यतं॒ मा जि॑ह्वरतम् ।
Sentence: c    स्वं गो॒ष्ठमा व॑दतं देवी दुर्ये॒ आयु॒र्मा निर्वा॑दिष्टं प्र॒जां मा निर्वा॑दिष्टम् ।
Sentence: d    अत्र॑ रमेथां॒ वर्ष्म॑न्पृथि॒व्याः ।।

Verse: 18 
Sentence: a    विष्णो॒र्नु कं॑ वी॒र्या॑णि॒ प्र वो॑चं॒ यः पार्थि॑वानि विम॒मे रजाँ॑सि ।
Sentence: b    यो अस्क॑भाय॒दुत्त॑रँ स॒धस्थं॑ विचक्रमा॒णस्त्रे॒धोरु॑गा॒यः ।
Sentence: c    विष्ण॑वे त्वा ।।

Verse: 19 
Sentence: a    दि॒वो वा॑ विष्ण उ॒त वा॑ पृथि॒व्या म॒हो वा॑ विष्ण उ॒रोर॒न्तरि॑क्षात् ।
Sentence: b    उ॒भा हि हस्ता॒ वसु॑ना पृ॒णस्वा प्रय॑च्छ॒ दक्षि॑णा॒दोत स॒व्यात् ।
Sentence: c    विष्ण॑वे त्वा ।।

Verse: 20 
Sentence: a    प्र तद्विष्णु॑ स्तवते वी॒र्ये॑ण मृ॒गो न भी॒मः कु॑च॒रो गि॑रि॒ष्ठाः ।
Sentence: b    यस्यो॒रुषु॑ त्रि॒षु वि॒क्रम॑णेष्वधिक्षि॒यन्ति॒ भुव॑नानि॒ विश्वा॑ ।।

Verse: 21 
Sentence: a    विष्णो॑ र॒राट॑मसि ।
Sentence: b    विष्णोः॒ श्नप्त्रे॑ स्थः ।
Sentence: c    विष्णोः॒ स्यूर॑सि ।
Sentence: d    विष्णो॑र्ध्रु॒वो॑ सि ।
Sentence: e    वै॑ष्ण॒वम॑सि॒ विष्ण॑वे त्वा ।।

Verse: 22 
Sentence: a    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b    आ द॑दे॒ नार्य॑सि ।
Sentence: c    इ॒दम॒हँ रक्ष॑सां ग्री॒वा अपि॑कृन्तामि ।
Sentence: d    बृ॒हन्न॑सि बृ॒हद्र॑वा बृह॒तीमिन्द्रा॑य॒ वाचं॑ वद ।।

Verse: 23 
Sentence: a    र॑क्षो॒हणं॑ वलग॒हनं॑ वैष्ण॒वीम् ।
Sentence: b    इ॒दम॒हं तं व॑ल॒गमुत्कि॑रामि॒ यं मे॒ निष्ट्यो॒ यम॒मात्यो॑ निच॒खान॑ ।
Sentence: c    इ॒दम॒हं तं व॑ल॒गमुत्कि॑रामि॒ यं मे॑ समा॒नो यमस॑मानो निच॒खान॑ ।
Sentence: d    इ॒दम॒हं तं व॑ल॒गमुत्कि॑रामि॒ यं मे॒ सब॑न्धु॒र्यमस॑बन्धुर्निच॒खान॑ ।
Sentence: e    इ॒दम॒हं तं व॑ल॒गमुत्कि॑रामि॒ यं मे॑ सजा॒तो यमस॑जातो निच॒खान॑ ।
Sentence: f    उत्कृ॒त्यां कि॑रामि ।।

Verse: 24 
Sentence: a    स्व॒राड॑सि सपत्न॒हा ।
Sentence: b    स॑त्र॒राड॑स्यभिमाति॒हा ।
Sentence: c    ज॑न॒राड॑सि रक्षो॒हा ।
Sentence: d    स॑र्व॒राड॑स्यमित्र॒हा ।।

Verse: 25 
Sentence: a    र॑क्षो॒हणो॑ वो वलग॒हनः॒ प्रोक्षा॑मि वैष्ण॒वान् ।
Sentence: b    र॑क्षो॒हणो॑ वो वलग॒हनो व॑ नयामि वैष्ण॒वान् ।
Sentence: c    र॑क्षो॒हणो॑ वो वलग॒हनो व॑ स्तृणामि वैष्ण॒वान् ।
Sentence: d    र॑क्षो॒हणौ॑ वां वलग॒हना॒ उप॑ दधामि वैष्ण॒वी ।
Sentence: e    र॑क्षो॒हणौ॑ वां वलग॒हनौ॒ पर्यू॑हामि वैष्ण॒वी ।
Sentence: f    वै॑ष्ण॒वम॑सि ।
Sentence: g    वै॑ष्ण॒वा स्थ॑ ।।

Verse: 26 
Sentence: a    दे॒वस्य॑ त्वा सवि॒तुः प्र॑स॒वे॒ श्विनो॑र्बा॒हुभ्यां॑ पू॒ष्णो हस्ता॑भ्याम् ।
Sentence: b    आ द॑दे॒ नार्य॑सि ।
Sentence: c    इ॒दम॒हँ रक्ष॑सां ग्री॒वा अपि॑ कृन्तामि ।
Sentence: d    यवो॑ सि य॒वया॒स्मद्द्वेषो॑ य॒वयारा॑तीः ।
Sentence: e    दि॒वे त्वा॒न्तरि॑क्षाय त्वा पृथिव्यै त्वा ।
Sentence: f    शुन्ध॑न्तां लो॒काः पि॑तृ॒षद॑नाः ।
Sentence: g    पि॑तृ॒षद॑नमसि ।।

Verse: 27 
Sentence: a    उद्दिवँ॑ स्तभाना॒न्तरि॑क्षं पृण॒ दृँह॑स्व पृथि॒व्याम् ।
Sentence: b    द्यु॑ता॒नास्त्वा॑ मारु॒तो मिनो॑तु मि॒त्रावरु॑णौ ध्रु॒वेण॒ धर्म॑णा ।
Sentence: c    ब्र॑ह्म॒वनि॑ त्वा क्षत्र॒वनि॑ त्वा रायस्पोष॒वनि॒ पर्यू॑हामि ।
Sentence: d    ब्रह्म॑ दृँह क्ष॒त्रं दृँ॒हायु॑र्दृँह प्र॒जां दृँ॑ह ।।

Verse: 28 
Sentence: a    ध्रु॒वासि॑ ध्रु॒वो॒ यं यज॑मानो॒ स्मिन्ना॒यत॑ने प्र॒जया॑ प॒शुभि॑र्भूयात् ।
Sentence: b    घृ॒तेन॑ द्यावापृथिवी पूर्येथाम् ।
Sentence: c    इन्द्र॑स्य छ॒दिर॑सि विश्वज॒नस्य॒ छाया॑ ।।

Verse: 29 
Sentence: a    परि॑ त्वा गिर्वणो॒ गिर॑ इ॒मा भ॑वन्तु वि॒श्वतः॑ ।
Sentence: b    वृ॒द्धायु॒मनु॒ वृद्ध॑यो॒ जुष्टा॑ भवन्तु॒ जुष्ट॑यः ।।

Verse: 30 
Sentence: a    इन्द्र॑स्य॒ स्यूर॑सि ।
Sentence: b    इन्द्र॑स्य ध्रु॒वो॑ सि ।
Sentence: c    अै॒न्द्रम॑सि ।
Sentence: d    वै॑श्वदे॒वम॑सि ।।

Verse: 31 
Sentence: a    वि॒भूर॑सि प्र॒वाह॑णः ।
Sentence: b    वह्नि॑रसि हव्य॒वाह॑नः ।
Sentence: c    श्वा॒त्रो॑ सि॒ प्रचे॑ताः ।
Sentence: d    तु॒थो॑ सि वि॒श्ववे॑दाः ।।

Verse: 32 
Sentence: a    उ॒शिग॑सि क॒विः ।
Sentence: b    अङ्घा॑रिरसि॒ बम्भा॑रिः ।
Sentence: c    अ॑व॒स्यूर॑सि॒ दुव॑स्वान् ।
Sentence: d    शु॒न्ध्यूर॑सि मार्जा॒लीयः॑ ।
Sentence: e    स॒म्राड॑सि कृ॒शानुः॑ ।
Sentence: f    प॑रि॒षद्यो॑ सि॒ पव॑मानः ।
Sentence: g    नभो॑ सि प्र॒तक्वा॑ ।
Sentence: h    मृ॒ष्टो॑ सि हव्य॒सूद॑नः ।
Sentence: i    ऋ॑त॒धामा॑सि॒ स्व॑र्ज्योतिः ।।

Verse: 33 
Sentence: a    स॑मुद्रो सि वि॒श्वव्य॑चाः ।
Sentence: b    अ॒जो॒ स्येक॑पात् ।
Sentence: c    अहि॑रसि बु॒ध्न्यः॑ ।
Sentence: d    वाग॑स्ऐ॒न्द्रम॑सि॒ सदो॑ सि ।
Sentence: e    ऋ॒तस्य॑ द्वारौ॒ मा मा॒ संता॑प्तम् ।
Sentence: f    अध्व॑नामध्वपते॒ प्र मा॑ तिर स्व॒स्ति मे॒ स्मिन्प॒थि दे॑व॒याने॑ भूयात् ।।

Verse: 34 
Sentence: a    मि॒त्रस्य॑ मा॒ चक्षु॑षेक्षध्वम् ।
Sentence: b    अग्न॑यः सगराः॒ सग॑रा स्थ॒ सग॑रेण॒ नाम्ना रौद्रे॒णानी॑केन पा॒त मा॑ग्नयः पिपृ॒त मा॑ग्नयो गोपा॒यत॑ मा॒ नमो॑ वो स्तु॒ मा मा॑ हिँसिष्ट ।।

Verse: 35 
Sentence: a    ज्योति॑रसि वि॒श्वरू॑पं॒ विश्वे॑षां दे॒वानाँ॑ स॒मित् ।
Sentence: b    त्वँ सो॑म तनू॒कृद्भ्यो॒ द्वेषो॑भ्यो॒ न्यकृ॑तेभ्य उ॒रु य॒न्तासि॒ वरू॑थँ॒ स्वाहा॑ ।
Sentence: c    जु॑षा॒णो अ॒प्तुराज्य॑स्य वेतु॒ स्वाहा॑ ।।

Verse: 36 
Sentence: a    अग्ने॒ नय॑ सु॒पथा॑ रा॒य अ॒स्मान्विश्वा॑नि देव व॒युना॑नि वि॒द्वान् ।
Sentence: b    यु॑यो॒ध्य॒स्मज्जु॑हुरा॒णमेनो॒ भूयि॑ष्ठां ते॒ नम॑उक्तिं विधेम ।।

Verse: 37 
Sentence: a    अ॒यं नो॑ अ॒ग्निर्वरि॑वस्कृणोत्व॒यं मृधः॑ पु॒र ए॑तु प्रभि॒न्दन् ।
Sentence: b    अ॒यं वाजा॑न्जयतु॒ वाज॑साताव॒यँ शत्रू॑न्जयतु॒ जर्हृ॑षाणः॒ स्वाहा॑ ।।

Verse: 38 
Sentence: a    उ॒रु वि॑ष्णो॒ वि क्र॑मस्वो॒रु क्षया॑य नस्कृधि ।
Sentence: b    घृ॒तं घृ॑तयोने पिब॒ प्रप्र॑ य॒ज्ञप॑तिं तिर॒ स्वाहा॑ ।।

Verse: 39 
Sentence: a    देव॑ सवितरे॒ष ते॒ सोम॒स्तँ र॑क्षस्व॒ मा त्वा॑ दभन् ।
Sentence: b    ए॒तत्त्वं दे॑व सोम दे॒वो दे॒वाँ उपा॑गा इ॒दम॒हं म॑नु॒ष्या॑न्त्स॒ह रा॒यस्पोषे॑ण ।
Sentence: c    स्वाहा॒ निर्वरु॑णस्य॒ पाशा॑न्मुच्ये ।।

Verse: 40 
Sentence: a    अग्ने॑ व्रतपा॒स्त्वे व्र॑त॒पा या तव॑ त॒नूर्मय्यभू॑दे॒षा सा त्वयि॒ यो मम॑ त॒नूस्त्वय्यभू॑दे॒षा सा मयि॑ ।
Sentence: b    य॑थाय॒थं नौ॑ व्रतपते व्र॒तान्यनु॑ मे दी॒क्षां दी॒क्षाप॑तिर॒मँस्तानु॒ तप॒स्तप॑स्पतिः ।।

Verse: 41 
Sentence: a    उ॒रु वि॑ष्णो॒ वि क्र॑मस्वो॒रु क्षया॑य नस्कृधि ।
Sentence: b    घृ॒तं घृ॑तयोने पिब॒ प्रप्र॑ य॒ज्ञप॑तिं तिर॒ स्वाहा॑ ।।

Verse: 42 
Sentence: a    अत्य॒न्याँ अ॑गां॒ नान्याँ उपा॑गाम॒र्वाक्त्वा॒ परे॒भ्यो वि॑दं प॒रो व॑रेभ्यः ।
Sentence: b    तं त्वा॑ जुषामहे देव वनस्पतेदेवय॒ज्यायै॑ दे॒वास्त्वा॑ देवय॒ज्यायै॑ जुषन्तां॒ विष्ण॑वे त्वा ।
Sentence: c    ओष॑धे॒ त्राय॑स्व ।
Sentence: d    स्वधि॑ते मैनँ हिँसीः ।।

Verse: 43 
Sentence: a    द्यां मा ले॑खीर॒न्तरि॑क्षं॒ मा हिँ॑सीः पृथि॒व्या सं भ॑व ।
Sentence: b    अ॒यँ हि त्वा॒ स्वधि॑ति॒स्तेति॑जानः प्रणि॒नाय॑ मह॒ते सौ॑भगाय ।
Sentence: c    अत॒स्त्वं दे॑व वनस्पते श॒तव॑ल्शो॒ वि रो॑ह स॒हस्र॑वल्शा॒ वि व॒यँ रु॑हेम ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.