TITUS
White Yajur-Veda: Vajasaneyi-Samhita (Madhyandina)
Part No. 4
Previous part

Paragraph: 4 

Verse: 1 
Sentence: a    एदम॑गन्म देव॒यज॑नं पृथि॒व्या यत्र॑ दे॒वासो॒ अजु॑षन्त॒ विश्वे॑ ।
Sentence: b    ऋक्सा॒माभ्या॑ सं॒तर॑न्तो॒ यजु॑र्भी रा॒यस्पोषे॑ण॒ समि॒षा म॑देम ।
Sentence: c    इ॒मा आपः॑ शमु मे सन्तु दे॒वीः ।
Sentence: d    ओष॑धे॒ त्राय॑स्व ।
Sentence: e    स्वधि॑ते मैनँ हिँसीः ।।

Verse: 2 
Sentence: a    आपो॑ अ॒स्मान्मा॒तरः॑ शुन्धयन्तु घृ॒तेन॑ नो घृत॒प्वः॑ पुनन्तु ।
Sentence: b    विश्वँ॒ हि रि॒प्रं प्र॒वह॑न्ति दे॒वीः ।
Sentence: c    उदिदा॑भ्यः॒ शुचि॒रा पू॒त ए॑मि ।
Sentence: d    दी॑क्षात॒पसो॑स्त॒नूर॑सि॒ तं त्वा॑ शि॒वाँ श॒ग्मां परि॑ दधे भ॒द्रं वर्णं॒ पुष्य॑न् ।।

Verse: 3 
Sentence: a    म॒हीनां॒ पयो॑ सि वर्चो॒दा अ॑सि॒ वर्चो॑ मे देहि ।
Sentence: b    वृ॒त्रस्या॑सि क॒नीन॑कश्चक्षु॒र्दा अ॑सि॒ चक्षु॑र्मे देहि ।।

Verse: 4 
Sentence: a    चि॒त्पति॑र्मा पुनातु ।
Sentence: b    वा॒क्पति॑र्मा पुनातु ।
Sentence: c    दे॒वो मा॑ सवि॒ता पु॑ना॒वच्छि॑द्रेण प॒वित्रे॑ण॒ सूर्य॑स्य र॒श्मिभिः॑ ।
Sentence: d    तस्य॑ ते पवित्रपते प॒वित्र॑पूतस्य॒ यत्का॑मः पु॒ने तच्छ॑केयम् ।।

Verse: 5 
Sentence: a    आ वो॑ देवास ईमहे वा॒मं प्र॑य॒त्य॑ध्व॒रे ।
Sentence: b    आ वो॑ देवास आ॒शिषो॑ य॒ज्ञिया॑सो हवामहे ।।

Verse: 6 
Sentence: a    स्वाहा॑ य॒ज्ञं मन॑सः ।
Sentence: b    स्वाहो॒रोर॒न्तरि॑क्षात् ।
Sentence: c    स्वाहा॒ द्यावा॑पृथि॒वीभ्या॑म् ।
Sentence: d    स्वाहा॒ वाता॒दा र॑भे॒ स्वाहा॑ ।।

Verse: 7 
Sentence: a    आकू॑त्यै प्र॒युजे॒ ग्नये॒ स्वाहा॑ मे॒धायै॒ मन॑से॒ ग्नये॒ स्वाहा॑ दी॒क्षायै॒ तप॑से॒ ग्नये॒ स्वाहा॒ सर॑स्वत्यै पू॒ष्णे॒ ग्नये॒ स्वाहा॒ आपो॑ देवीर्बृहतीर्विश्वशम्भुवो॒ द्यावा॑पृथिवी॒ उरो॑ अन्तरिक्ष ।
Sentence: b    बृह॒स्पत॑ये ह॒विषा॑ विधेम॒ स्वाहा॑ ।।

Verse: 8 
Sentence: a    विश्वो॑ दे॒वस्य॑ ने॒तुर्मर्तो॑ वुरीत स॒ख्यम् ।
Sentence: b    विश्वो॑ रा॒य इ॑षुध्यति द्यु॒म्नं वृ॑णीत पु॒ष्यसे॒ स्वाहा॑ ।।

Verse: 9 
Sentence: a    ऋ॑क्सा॒मयोः॒ शिल्पे॑ स्थ॒स्ते वा॒मा र॑भे॒ ते मा॑ पात॒मास्य य॒ज्ञस्यो॒दृचः॑ ।
Sentence: b    शर्मा॑सि॒ शर्म॑ मे यच्छ॒ नम॑स्ते अस्तु॒ मा मा॑ हिँसीः ।।

Verse: 10 
Sentence: a    ऊर्ग॑स्याङ्गिर॒स्यूर्ण॑म्रदा॒ ऊर्जं॒ मयि॑ धेहि ।
Sentence: b    सोम॑स्य नी॒विर॑सि ।
Sentence: c    विष्णोः॒ शर्मा॑सि॒ शर्म॒ यज॑मानस्य ।
Sentence: d    इन्द्र॑स्य॒ योनि॑रसि ।
Sentence: e    सु॑स॒स्याः कृ॒षीस्कृ॑धि ।
Sentence: f    उच्छ्र॑यस्व वनस्पत ऊ॒र्ध्वो मा॑ पा॒ह्यँह॑स॒ आस्य य॑ज्%॒स्यु॒दृचः॑ ।।

Verse: 11 
Sentence: a    व्र॒तं कृ॑णुता॒ग्निर्ब्रह्मा॒ग्निर्य॒ज्ञो वन॒स्पति॑र्य॒ज्ञियः॑ ।
Sentence: b    दै॑वीं॒ धियं॑ मनामहे सुमृडी॒काम॒भिष्ट॑ये वर्चो॒धां य॒ज्ञवा॑हसँ सुती॒र्था नो॑ अस॒द्वशे॑ ।
Sentence: c    ये दे॒वा मनो॑जाता मनो॒युजो॒ दक्ष॑क्रतव॒स्ते नो॑ वन्तु॒ ते नः॑ पान्तु॒ तेभः॒ स्वाहा॑ ।।

Verse: 12 
Sentence: a    श्वा॒त्राः पी॒ता भ॑वत यू॒यमा॑पो अ॒स्माक॑म॒न्तरु॒दरे॑ सु॒शेवाः॑ ।
Sentence: b    ता अ॒स्मभ्य॑मय॒क्ष्मा अ॑नमी॒वा अना॑गसः॒ स्वद॑न्तु दे॒वीर॒मृता॑ ऋता॒वृधः॑ ।।

Verse: 13 
Sentence: a    इ॒यं ते॑ य॒ज्ञिया॑ त॒नूः ।
Sentence: b    अ॒पो मु॑ञ्चामि॒ न प्र॒जाम् ।
Sentence: c    अँ॑हो॒मुचः॒ स्वाहा॑कृताः पृथि॒वीमावि॑शत ।
Sentence: d    पृ॑थि॒व्या संभ॑व ।।

Verse: 14 
Sentence: a    अग्ने॒ त्वँ सु जा॑गृहि व॒यँ सु म॑न्दिषीमहि ।
Sentence: b    रक्षा॑ णो॒ अप्र॑युच्छन्प्र॒बुधे॑ नः॒ पुन॑स्कृधि ।।

Verse: 15 
Sentence: a    पुन॒र्मनः॒ पुन॒रायु॑र्म॒ आग॒न्पुनः॑ प्रा॒णः पुन॑रा॒त्मा म॒ आग॒न्पुन॒श्चक्षुः॒ पुनः॒ श्रोत्रं॑ म॒ आग॑न् ।
Sentence: b    वै॑श्वान॒रो अद॑ब्धस्तनू॒पा अ॒ग्निर्नः॑ पातु दुरि॒ताद॑व॒द्यात् ।।

Verse: 16 
Sentence: a    त्वम॑ग्ने व्रत॒पा अ॑सि दे॒व आ मर्त्ये॒ष्वा त्वं य॒ज्ञेष्वीड्यः॑ ।
Sentence: b    रास्वेय॑त्सो॒मा भूयो॑ भर दे॒वो नः॑ सवि॒ता वसो॑र्दा॒ता वस्व॑दात् ।।

Verse: 17 
Sentence: a    ए॒षा ते॑ शुक्र त॒नूरे॒तद्वर्च॒स्तया॒ सं भ॑व॒ भ्राजं॑ गच्छ ।
Sentence: b    जूर॑सि धृ॒ता मन॑सा॒ जुष्टा॒ विष्ण॑वे ।।

Verse: 18 
Sentence: a    तस्या॑स्ते स॒त्यस॑वसः प्रस॒वे त॒न्वो॑ य॒न्त्रम॑शीय॒ स्वाहा॑ ।
Sentence: b    शु॒क्रम॑सि च॒न्द्रम॑स्य॒मृत॑मसि वैश्वदे॒वम॑सि ।।

Verse: 19 
Sentence: a    चिद॑सि म॒नासि॒ धीर॑सि॒ दक्षि॑णासि क्ष॒त्रिया॑सि य॒ज्ञिया॒स्यदि॑तिरस्युभयतःशी॒र्ष्णी ।
Sentence: b    सा नः॒ सुप्रा॑ची॒ सुप्र॑तीच्येधि मि॒त्रस्त्वा॑ प॒दि ब॑ध्नीतां पू॒षाध्व॑नस्पा॒त्विन्द्रा॒यय ।।

Verse: 20 
Sentence: a    अनु॑ त्वा मा॒ता म॑न्यता॒मनु॑ पि॒तानु॒ भ्राता॒ सग॒र्भ्यो नु॒ सखा॒ सयू॑थ्यः ।
Sentence: b    सा दे॑वि दे॒वमच्छे॒हीन्द्रा॑य॒ सोमँ॑ रु॒द्रस्त्वा व॑र्तयतु स्व॒स्ति सोम्स॑खा॒ पुन॒रेहि॑ ।।

Verse: 21 
Sentence: a    वस्व्य॒स्यदि॑तिरस्यादि॒त्यासि॑ रु॒द्रासि॑ च॒न्द्रासि॑ ।
Sentence: b    बृह॒स्पति॑ष्ट्वा सु॒म्ने र॑म्णातु रु॒द्रो वसु॑भि॒रा च॑के ।।

Verse: 22 
Sentence: a    अदि॑त्यास्त्वा मू॒र्धन्ना जि॑घर्मि देव॒यज॑ने पृथि॒व्या इडा॑यास्प॒दम॑सि घृ॒तव॒त्स्वाहा॑ ।
Sentence: b    अ॒स्मे र॑मस्व ।
Sentence: c    अ॒स्मे ते॒ बन्धुः॑ ।
Sentence: d    त्वे रायः॑ ।
Sentence: e    मे रायः॑ ।
Sentence: f    मा व॒यँ रा॒यस्पोषे॑ण॒ वि यौ॑ष्म ।
Sentence: g    तोतो॒ रायः॑ ।।

Verse: 23 
Sentence: a    सम॑ख्ये दे॒व्या धि॒या सं दक्षि॑णयो॒रुच॑क्षसा ।
Sentence: b    मा म॒ आयुः॒ प्र मो॑षी॒र्मो अ॒हं तव॑ ।
Sentence: c    वी॒रं वि॑देय॒ तव॑ देवि सं॒दृशि॑ ।।

Verse: 24 
Sentence: a    ए॒ष ते॑ गाय॒त्रो भा॒ग इति॑ मे॒ सोमा॑य ब्रूतादे॒ष ते त्रैष्टुभो भा॒ग इति॑ मे॒ सोमा॑य ब्रूतादे॒ष ते॒ जाग॑तो भा॒ग इति॑ मे॒ सोमा॑य ब्रूताच्छन्दोना॒मानाँ॒ साम्रा॑ज्यं ग॒च्छेति॑ मे॒ सोमा॑य ब्रूतात् ।
Sentence: b    आ॑स्मा॒को॑ सि शु॒क्रस्ते॒ ग्रह्यो॑ वि॒चित॑स्त्वा॒ वि चि॑न्वन्तु ।।

Verse: 25 
Sentence: a    अ॒भि त्यं दे॒वँ स॑वि॒तार॑मो॒ण्योः॑ क॒विक्र॑तु॒मर्चा॑मि स॒त्यस॑वँ रत्न॒धाम॒भि प्रि॒यं म॒तिं क॒विम् ।
Sentence: b    ऊ॒र्ध्वा यस्या॒मति॒र्भा अदि॑द्युत॒त्सवी॑मनि॒ हिर॑ण्यपाणिरमिमीत सु॒क्रतुः॑ कृ॒पा स्वः॑ ।
Sentence: c    प्र॒जाभ्य॑स्त्वा ।
Sentence: d    प्र॒जास्त्वा॑नु॒प्राण॑न्तु प्र॒जास्त्वम॑नु॒प्राणि॑हि ।।

Verse: 26 
Sentence: a    शु॒क्रं त्वा॑ शु॒क्रेण॑ क्रीणामि च॒न्द्रं च॒न्द्रेणा॒मृत॑म॒मृते॑न ।
Sentence: b    स॒ग्मे ते॒ गोः ।
Sentence: c    अ॒स्मे ते॑ च॒न्द्राणि॑ ।
Sentence: d    तप॑सस्त॒नूर॑सि प्र॒जाप॑ते॒र्वर्णः॑ पर॒मेण॑ प॒शुना॑ क्रीयसे सहस्रपो॒षं पु॑षेयम् ।।

Verse: 27 
Sentence: a    मि॒त्रो न॒ एहि॒ सुमि॑त्रधः ।
Sentence: b    इन्द्र॑स्यो॒रुमा वि॑श॒ दक्षि॑णमु॒शन्नु॒शन्तँ॑ स्यो॒नः स्यो॒नम् ।
Sentence: c    स्वान॒ भ्राजा॑ङ्घारे॒ बम्भा॑रे॒ हस्त॒ सुह॑स्त॒ कृशा॑नो ।
Sentence: d    ए॒ते वः॑ सोम॒क्रय॑णा॒स्तान्र॑क्षध्वं॒ मा वो॑ दभन् ।।

Verse: 28 
Sentence: a    परि॑ माग्ने॒ दुश्च॑रिताद्बाध॒स्वा मा॒ सुच॑रिते भज ।
Sentence: b    उदायु॑षा स्वा॒युषोद॑स्थाम॒मृताँ॒ अनु॑ ।।

Verse: 29 
Sentence: a    प्रति॒ पन्था॑मपद्महि स्वस्ति॒गाम॑ने॒हस॑म् ।
Sentence: b    येन॒ विश्वाः॒ परि॒ द्विषो॑ वृ॒णक्ति॑ वि॒न्दते॒ वसु॑ ।।

Verse: 30 
Sentence: a    अदि॑त्या॒स्त्वग॑सि ।
Sentence: b    अदि॑त्यै॒ सद॒ आ सी॑द ।
Sentence: c    अस्त॑भ्ना॒द्द्यां वृ॑ष॒भो अ॒न्तरि॑क्ष॒ममि॑मीत वरि॒माणं॑ पृथि॒व्याः ।
Sentence: d    आसी॑द॒द्विश्वा॒ भुव॑नानि स॒म्राड्विश्वेत्तानि॒ वरु॑णस्य व्र॒तानि॑ ।।

Verse: 31 
Sentence: a    वने॑षु॒ व्य॒न्तरि॑क्षं ततान॒ वाज॒मर्व॑त्सु॒ पय॑ उ॒स्रिया॑सु ।
Sentence: b    हृ॒त्सु क्रतुं॒ वरु॑णो वि॒क्ष्व॒ग्निं दि॒वि सूर्य॑मदधा॒त्सोम॒मद्रौ॑ ।।

Verse: 32 
Sentence: a    सूर्य॑स्य॒ चक्षु॒रारो॑हा॒ग्नेर॒क्ष्णः क॒नीन॑कम् ।
Sentence: b    यत्रै॑त्रशेभि॒रीय॑से॒ भ्राज॑मानो विप॒श्चिता॑ ।।

Verse: 33 
Sentence: a    उस्रा॒वेतं॑ धूर्षाहौ यु॒ज्येथा॑मन॒श्रू अवी॑रहणौ ब्रह्म॒चोद॑नौ ।
Sentence: b    स्व॒स्ति यज॑मानस्य गृ॒हान्ग॑च्छतम् ।।

Verse: 34 
Sentence: a    भ॒द्रो मे॑ सि॒ प्रच्य॑वस्व भुवस्पते॒ विश्वा॑न्य॒भि धामा॑नि ।
Sentence: b    मा त्वा॑ परिप॒रिणो॑ विद॒न्मा त्वा॑ परिप॒न्थिनो॑ विद॒न्मा वृका॑ अघा॒यवो॑ विदन् ।
Sentence: c    श्ये॒नो भू॒त्वा परा॑ पत॒ यज॑मानस्य गृ॒हान्ग॑च्छ॒ तन्नौ॑ सँस्कृ॒तम् ।।

Verse: 35 
Sentence: a    नमो॑ मि॒त्रस्य॒ वरु॑णस्य॒ चक्ष॑से म॒हो दे॒वाय॒ तदृ॒तँ स॑पर्यत ।
Sentence: b    दू॑रे॒दृशे॑ दे॒वजा॑ताय के॒तवे॑ दि॒वस्पु॒त्राय॒ सूर्या॑य शँसत ।।

Verse: 36 
Sentence: a    वरु॑णस्यो॒त्तम्भ॑नमसि ।
Sentence: b    वरु॑णस्य स्कम्भ॒सर्ज॑नी स्थः ।
Sentence: c    वरु॑णस्य ऋत॒सद॑न्यसि॒ वरु॑णस्य ऋत॒सद॑नमसि ।
Sentence: d    वरु॑णस्य ऋत॒सद॑न॒मा सी॑द ।।

Verse: 37 
Sentence: a    या ते॒ धामा॑नि ह॒विषा॒ यज॑न्ति॒ ता ते॒ विश्वा॑ परि॒भूर॑स्तु य॒ज्ञम् ।
Sentence: b    ग॑य॒स्पानः॑ प्र॒तर॑णः सु॒वीरो वी॑रहा॒ प्रच॑रा सोम॒ दुर्या॑न् ।।


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.